හකාවතී|teraki

සිහින තුනක්

2011-08-09T03:25:00.000-07:00

1. ඇම්බසි හීනයක්

ඇම්බසියක් වගේ තැනක හිටියා මමත් හීන් නිල් ඉරි සහිත අත් දිග කමිසයක් ඇඳගෙන. ඒක හරියටම කීවොත් පිජාමාවක් වගේ රාත්‍රියට අඳින ඇඳුමක් වගේ. බොහෝ අය එහෙ මෙහේ කොරිඩෝවල ගැවසි ගැවසි නම් කතා කරනතුරු වගේ රස්තියාදු වෙමින් හිටියා. සමහරුන්ගේ මුහුණේ අධික බලාපොරොත්තු තියෙනවා දැක්ක. මමත් හිටියේ මොකද්දෝ මහ විශාල ගැලවීමක් සහනයක් වැනි දෙයක් ස්ථිරව සිදුවන්නට ආසන්න මොහොතකට ලං වූවා වැනි අභ්‍යන්තර සතුටකින්. සැහැල්ලුවකින්.

ඊළඟට මට මතකයි මම ඒ එලිමහන් කොරිඩෝවක වැතිරිලා සැහැල්ලුවෙන් නින්දකට වැටුණා. හොඳට අත පය විසුරුවල මිනිස්සු යන එන ඉස්පිරිතාලෙක ඕපීඩී එක වගේ තැනක් ඒක. නමුත් මම හොඳ තද නින්දකට වැටුණා. ඒ නින්ද ඇතුලෙත් මට දැණුනේ හරිම සැහැල්ලුවක්.

මාව එක පාරටම කවුදෝ කීද්දුව.

මම යටි අතට පොළවට ඔබාගෙන මගේ අත්වල රාමුවකට බර දී තිබ්බ මුහුණ උඩු අතට හරවල බැලුවම කවුදෝ මැදිවියේ කෙනෙක් හරියටම අරාබිකාරයෙක් වගේ උඩුකය ඇඳුමින් සැරසුණ කෙනෙක් බොහොම සුහදව මා දිහා බලං හිටියා හරියටම එයා සොයා ආව කෙනා හමු වුණා වගේම සන්තෝෂයෙන්. මට තේරුණා එයාට වැරදීමක් වුනා කියල. එයාගේ මුහුණේ සන්තෝෂය මැකී ගියා. සමා වෙන්න කියලා කියන්නා සේ මා දිහා බලාගෙනම පස්සෙන් පස්සට ගිහින් හැරිල වේගයෙන් ගේට්ටුවක් වැනි අප සිටි ස්ථානයට මිනිස්සු එන යන පටු පාරට වැටිලා ඈතට ඈතට යනවා පෙනුණා.

මට මහ තූෂ්නිම්භූත හැඟීමක් ආවා. තෝන්තු ගතියක් දැනුණා. නින්ද කැඩුණ නිසා වෙන්න ඕන.

මම ආයෙත් කැඩිච්ච නින්ද හදාගන්න වගේ පොළවට මුහුණ හරවා ගන්න හදද්දිම මා අසළම හිටි කෙනෙක් මට සුහදව ඔහුගේ මුහුණ පෙන්නුවා වගේ මම දැක්කා. ඒ එක්කම එයා මට කීවා දැක්ක නේද කෙනෙක් ගෙ නින්ද කඩලා එයා ගිය ලස්සන. අපට පුළුවන් ද ඒ වගේ කරන්න කියලා. මට එක පාරටම දැනුණා මම ඇයි ඒ මිනිහට කිසිම ප්‍රතිචාරයක් නොදැක්වූවේ කියලා. එක පාරටම මට හිතුණා ඒ මිනිහට හරි නම් වචනයක් දෙකක් කියල මගේ නින්ද කැඩුම ගැන අප්‍රසාදය පළ කරන්නට තිබ්බා නේද කියල වගේ අදහස් ගොඩක් ඔලුවට එන්න ගත්ත.

මම නැගිටල ඒ මිනිහ ඇවිද ගිය පැත්තට ඇවිද ගෙන ගියා.

මම දැක්කා ඈතින් එයා ඉදිරියටම ඇවිදගෙන යනවා. මම ඉක්මන් කරල ඔහු වෙතටම ගොස් උරයට තට්ටුවක් දැම්මා. එයා එක පාරටම මා දිහාවට හැරුණා. එයා අරාබිකාරයෙක්. හොඳට සිංහල කතා කරන්න පුළුවන් බැව් පෙනුණා. වඩාත්ම සිත් ගත් කාරණය වුනේ එතුවක් මගේ උසින්ම වගේ හිටි මේ මිනිහා එක පාරටම ලයිට් කණුවක් වගේ උස යන්න ගත්ත. මම එයාගේ ඔලුව දිහා බලං හිටියේ ලයිට් කණුවක් යට ඉඳන් ඒකෙ මුදුන දිහා බලං ඉන්නවා වගේ අමාරුවකින්. එයා හඳට වගේ කිට්ටුවෙන් මුහුණ තියං මා සමග හිනා වෙමින් මොනවදෝ දිගිං දිගටම කියං කියං ගියා මට ඒ කිසි දෙයක් තේරුණේවත් අඛණ්ඩව ඇහුණේවත් නෑ...

2. රබර් වැනි කකුල් සහිත මා...

මම අතිශය උස ගොඩනැගිලි වලින් බිමට නිරුපද්‍රිතව බිමට පනින්නෙක්.

මම හැම තිස්සෙම මගේ කකුල්වල යටිපතුල් ගැන ඒවා අස්ථිවලින් මාංෂ පේශීවලින් දණිස් කටු වලින් මගේ කලවා උකුලට සවි වී ඇති ශක්තිමත් බම්ප්වන සුළු ඉලාස්ටික් ගතිගුණ ගැන මෙණෙහි කරමින් හිටියා. සමහර වෙලාවට මටම ප්‍රශ්නයක් ඇයි මට මේ තරම් ඉහළක ඉඳලා පහලට ගුරුත්වය යටතේ වැටෙද්දිත් එහෙම වැටීගෙන පහලට ඇවිත් පොළවට පතිත වද්දීත් දැනෙන මහ විශාල කම්පනය ගැටුම මගේ කකුල්වලට ඔරොත්තු දෙන්නේ කියලා. මම පොළවට පතිත වන හැම අවස්ථාවක දීම දෙකකුල් පොළව මත ස්පර්ශ වනවාත් සමගම මම කොඳු නාරටිය නවා ඉදිරියට හිස බර කර දණිස් සමාන්තරව නවා මහ පොළවට මගේ අත් දෙකත් ළං කරවන සූක්ෂම යාන්ත්‍රණයකට හුරුවෙලා හිටියා. ඒ බොහොම නිරවද්‍ය ඉරියව් නිසාවෙන් මට ඕනම උසක සිට පහළට පැනීම ඉතාම සුළු දෙයක් වුණා. මට තිබ්බ එකම සංත්‍රාස අවස්ථාව වූයේ ගොඩනැගිල්ලක මුදුනේ දාරයක් දිගේ පහළ බලාගෙන සෙමෙන් සෙමෙන් ඇවිද ගොස් බිමට පැනීමට සුදුසු තැන සොයා ගත් පසු ක්‍රමාණුකූලව පහත් වී එහි දාරය අත් දෙකෙන් අල්ලාගෙන සිරුර පහතට ලම්බකව පිනුමට සුදුසු ආකාරයට සකස් කරගන්නා තුරු කාලය කළමනාකරණය කර ගැනීමයි. මගේ පිනුම වචනයේ අර්ථයෙන් නම් පිනුමක් නොවෙයි. ඒක හරියටම ගොඩනැගිල්ලේ මුහුණතක් දිගේ ඊට සමාන්තරව පහළට ගුරුත්වය යටතේ නිදහසේ වැටීමක් පමණයි. පිනුම තිබ්බේ අවසන් මොහොතෙදි කියලයි මට හිතෙන්නේ. ඒ ගැන ආයෙම කියන්න තරම් දෙයක් නෑ. හැම තිස්සෙම පහළට වැටෙමින් ගත වූ තත්පර කීපය හදවත කීරි ගැස්සුවා. පොළවට පතිත වුණාට පස්සේ දෙකකුල්වලින් ගිනි උණුසුමක් පිට වෙනවා වගේ මොහොතකට දැනෙනවා හැරෙන්න වෙන කිසිම අමුතු දෙයක් වුණේ නෑ.

හැබැයි මේ එකම පිම්මක්වත් මා පනිනවා කිසිවෙකුත් දැක්කේ නෑ. කොටින්ම මම බිමට පැන්න හැම ගොඩනැගිල්ලක්ම අත්හැර දමන ලද හෝ විනාශයට පත් වෙමින් මිනිස් ප්‍ර යෝජනයෙන් ඈත් කර තිබූ ගොඩනැගිලි. සමහර විට මා ඒ තෝරාගත් ගොඩනැගිලි පිහිටා තිබුණෙම මිනිස් වාසයෙන් තොර අත්හැර දමන ලද නාගරික පෙදෙස්වල. ඒවායේ මංමාවත් දිගේ පරණ කරදහි සුංබුං ද්‍රව්‍ය පෝස්ටර් වගේ දැන්වීම් නිතර සුළඟට ගසා යන ආකාරය මා ගොඩනැගිලි මුදුන්වල සිට පහත බැලූ සෑම විටෙකම දැක්ක.

මා අවසන් වරට පනින ලද පිම්ම නිරීක්ෂණය කරන්නට කිසිම ප්‍රාණියෙක් ඒ අවට නොසිටි බව මට හොඳටම මතකයි. ඒක ලා කුණු ලේ පාට ගොඩනැගිල්ලක්. ඒ ගොඩනැගිල්ලේ බිත්තිවල පාටටම හරියන විදියට හාත්පස තිබ්බෙත් ඝණ අඳුරු වැහිබර අහසක්. හැම දේකම තිබ්බේ වැඩි අඩුවෙන් අළු පාට. එහෙම නැත්නම් කුණු ලේ පාට. හිතාමතා ඇඳපු චිත්‍රයක් වගෙයි පසුබිම.

3. සිහිනයක කාලය

මම එකපාරටම ඇවිදිමින් හිටියා පළාතේ මට මතක ඇති කාලෙක ඉඳලම පත්තර බිස්නස්වලින්ම කෝටිපතියෙක් වුණ මගේ පියාගේ වයසේ ප්‍රසිද්ධ මුදලාලි කෙනෙක් එක්කල. අපි ඇවිදිමින් සිටියේ මීට වසර විස්සකට තිහකට පමණ පෙර අරක්කු වෙළඳාමෙන් ජීවිකාව ගත කළ මෙන්ඩිස් අයියගේ පරණ යකඩ බඩු කඩේ තිබ්බ භූමියේ. මැන්ඩිස් අයියා පොලිසියෙන් වටලපු දවසක අරක්කු එක්කලම අහුවෙලා ඒ කාලේ හැටියට උසාවි දැම්ම දවසේ රෑම ආයෙම ඇවිත් යකඩ බඩු කඩේට- එල්ලිලා මළා බාල්කෙක. පහුවදා මෙන්ඩිස් අයියගෙන් අරක්කු බීපු සේරම පාරිභෝගිකයෝ සුපුරුදු පරිදි යකඩ බඩු කඩේට වාර්තා කළේ මැන්ඩිස් අයියගේ අනපේක්ෂිත බාල්කයේ එල්ලෙමින් තිබ්බ දේහය දැක බලා ගන්නයි. ඒ සේරම වෙලා දැං අවුරුදු තිහකටත් වැඩියි.

දැං එතන සමතලා බිමක්. මැන්ඩිස් අයියාගෙ ගැඹුරු ළිඳ ඒ කාලේ කවුරුත් හවසට නාන්න ආව ළිඳ තිබ්බා ඒ පරණ දිය සෙවෙල් පරිසරයේ මුත්‍ර ගඳ වහනය වන වට පිටාවේ ඒ කාලේ තිබ්බ විදියටම. මොකද්දෝ වැටක් වගේ අලුත් දෙයකුත් ඒ අසලම තිබ්බා ඒක එච්චර මට පැහැදිලි නෑ. අපි ඒ පැතිරුණ භූමියේ එහාට මෙහාට ඇවිද්දා හරියට මමත් කෝටිපතියෙක් වගේ මුදලාලිව අනුකරණය කරමින්. වැරහැලි හැඳගත් ඒ කාලේ තරුණ බේබද්දෙක් වෙච්චි මතියස් අප්පු හඩු ගඳ ගහන සරම්මාල්ලක් ඇඳගෙන හිස කහමින් අපට මද දුරකින් බයාදු විදියට බලං ඉන්නව දැක්කා. දැං වයසට ගිහිං අසූවකටත් එහා ඇති මයේ හිතේ. එයා තමයි මේ මැන්ඩිස් අයියාගේ භූමියේ කෙළවර ඉතිරි වෙච්ච හරි හතරැස් ටකරං ගුබ්බෑයමේ දැං වාසය කරන්නේ හරියට පෙරේත පැටියෙක් වගේ. මට එක පාරටම මතක් වුණා ඒ කාලේ ඒ ගොල්ලෝ හවසට බීගෙන කුණු හබ්බ කියාගෙන පළාතම දෙවනත් කරං හිටි හැටි.

මුදලාලි හරිම සන්තෝෂෙන් මට ඒ භූමි භාගයේ තිබ්බ මායිම් පෙන්නන්න වුණා. මුදලාලි සුදු සරමක් ෂර්ට් එකක් ඇඳලයි හිටියේ.රත්තරං පාට ඔරලෝසුවෙ දිස්නෙ හැම තිස්සෙම මට පෙනුණා අත වනද්දි. මායිමෙන් එහා පැත්තේ ඉස්කෝලේ. මහ විසාල ගොඩනැගිලි පෙනුනා පන්තිකාමර වල එල්ලපු කාල සටහන් එක්කලම මම ඉන්න තැනටත් පේන තරමට. මුදලාලිට මේ නගරය මැද්දේ ඉතිරිව ඇති මේ ඉඩම් කෑල්ල මිළට ගන්න එක කජු කනවා වගේ සරල දෙයක් බව මම දැනං හිටියා. ඒත් මට මතක නෑ හරියටම මුදලාලි ද මම ද ඒ ඉඩම ගන්න යන්නේ කියලා. කොහොම වුණත් මුදලාලිගෙ හිතේ මටත් ඒ ඉඩම මිළ දී ගන්නට තරම් වත්කමක් ඇතිය කියලා එයාට හිතෙනවා ඇති කියලයි මට හිතුණේ. මමත් දහ අතේ කල්පනා කළා ඇයි මම මේ මගුල් ඉඩමක් බලන්න මේ කෝටිපති මුදලාලි එක්කල පෑහෙමින් මේ කරක් ගහන්නේ කියලා.

ඉඩම කෙළවරට වෙන්න තිබ්බ කොහොඹ ගහ අවුරුදු තිස් ගාණකට ඉස්සර තිබ්ච්ච තරමටම උසින් සමව තියෙනව දැක්ක මම වටපිට බලද්දී.

මාරාව

2011-07-08T08:36:00.001-07:00

අපි දෙන්නම ගහළ ගාලෙන් පනිද්දි මට ඒකිගෙ අත අතෑරුනා ඇහිපිල්ලමක් ගහන ඉක්මනට. මම නැවතිලා ආපහු හැරෙද්දි පේමක්කා චීත්තේ ඇඟිලි තුඩුවලින් කකුල් පාදා ගන්න තරමට උස්සං ලැහැස්ති වෙනව ආයෙම පනින්න ඇඹුල් මූණෙන් බිම බලාගෙන. මම ආයෙම අනික්පැත්තට පැනලා පේමක්ක අල්ලගෙනම මේ පැත්තට පැන්නා හනිකට. වෙලාව තිබ්බේ නෑ විශ්වයටම කැරකිලා යන්න ගත්තා ආකාහේ වළාපටි සේරම කෑදැත්තො තටු ගහපු වේගෙට. පයට පෑගුණු මඩ තල්ලි චිරි චිරි ගාලා ලෙස්සලා යැව්වා කකුල් දෙක පැද්දිලා දෙන්නට දෙන්න ආදාරකර ගෙන සමබර වුනා දුවද්දිම. පේමක්කා හීතලට හීතලවෙලා හිටියේ මට අතේ එතිච්ච මොහොතට දැනුණා අයිස්පලමක් වගේ හංදියේ කඩේ ශීත පෙට්ටියේ ඇසිරිච්ච. අඳුර ගලා ගෙන එන්නේ කුණාටුවක් වගේ ඉහ ඉද්දරින් ආකාහෙ වැහි බීරමකුත් මුහු වෙලා තිබ්බා ගස් අස්සෙන්. ගඳපාන මල් තැලුනු හැම පඳුරක්ම හෙලවෙද්දි ඒ සුවඳ පැතිරෙව්වා හාත්පස මුකළානෙ. අපි අපේ අත් දැඩිව හිර කරං දුවන්නට වුනා. ඉඟුරු මුසු හඳුන් සුවඳක් ඇගේ හැට්ටෙ අස්සෙන් එනවා වගේ පිම්මේ දුවද්දි ළඟ ළඟම තං දෙකම උඩ පැන්නා තරගෙට වගේ එකිනෙක සිඹ සිඹ මට උහුලන්ට බැරි වුනා ඒ ගැස්සුම ඇහැ අද්දරින් පේන කොට. ගඳපාන මල් සුවඳ හරි කාමුකයි කියලා එවෙලෙ මට හිතුනා. ලැම අස්සෙ හිරවෙච්ච ඒ සුවඳ හිත එක්කල හටං කරද්දි ගඳපාන සුවඳ වාතයේ තිබ්බ වැහි දූලි සුවඳ එක්කල මුහු වෙද්දි ඇඟ උණුහුම් වෙන්න ගන්නවා වගේ දැනුනා. මොකද්දෝ හීනි රස්නයක් විදුලි කොටන්නා වගේ කොඳු නාරටිය දිගේ දිව්වා වගේ දැනුණා බිජ්ජ දිහාවට. එතකොටත් අහසේ විදුලි ඉරි ඇඳෙන්න ගත්තමයි. චීත්තෙ සටසට ගාද්දි ඒ සුවඳ තව තවත් මට දැනුණා බූමිතෙල් සුවඳ එක්කල.තව මොහොතකින් මහ වරුසාව ගස් කොළං පොඩිකොරං බිම පතබාන බව මට සුවඳින් දැනුණා. වැහි සුවඳ බැද්දේ ගස්කොලං අස්සෙන් දිව්‍ය ලෝකෙන් හමා එන සුවඳක් වගෙයි දැනුණේ. වැහි සුවඳ-ගඳපාන මල් සුවඳ-හැට්ටේ අස්සෙන් එන හඳුන් සුවඳ අතෝරක් නැතුව අපේ නාස්පුඩුවල බැඳුනා කාරමක් වගේ. බැද්දට කෙළවරක් නෑ වුනාට අපි දෙන්නට කෙළවරක් තිබුණා හැඟවිල්ලේ හෙවණ දෙන මහ ගස් අතර වල් කොටුවක රහසිගත. කටු පඳුරු වට කරපු අන්දර ගස් හෙවණ යට තැලිච්ච තණ ඇතිරිල්ල හැම පෝයකටම වකුටු කොඳු දිග ඇරන් ඉන්නට ලබන අවසාන මොහොතට කලිනුයි මේ අපෙ දිවිල්ල...ළතැවිල්ල.

මම සරම කඩල දමල චීත්තෙත් එක පාරින් කඩල දැම්මා ඉර එළිය යම්තමට වළාකුළු අස්සෙන් ඝණ සැරේට විහිද විහිද තිබ්බා මොහොතකට විතර. චීත්තෙ තිබ්බ මල් පොහොට්ටු හතරවටේ පඳුරුවල පිබිදුනා වගේ මම දැක්කේ අහසේ විදුලි කෙටුමකුත් එක්කලම. යටිකය නිරුවස්තරේ එයා බිමට වකුටු වුනාම පිටිපැත්තේ කොඳුනාරටිය තට්ටමේ දෙබෙදුමට පැතිරිච්ච හරිය ඉර බහින මුකලානේ කඳු පංතිය වගේ දිස්නෙ දුන්නා ආලෝකෙට. එතනදි අපි දෙන්න පෙරළුනා...පේමක්කා හිනා වුනා. දිගටම හිනා වුනා..නතර නොකර හිනා වුනා කිතියෙන් වගේ. මට පිස්සු කියලා පේමක්කා කියද්දිම මම කට හිර කරගත්තා මගේ කටින් දෙපැත්තට දමලා පේමක්කගෙ කකුල් මැදින් හිර කරගන්න ගමනෙම තණ බිස්සට දැනුණා උණුසුම මෙච්චර වෙලා හැංගිච්ච. ඒ එක්කලම පේමක්කා ඇස්දෙක ගිනිබෝල දෙකක් වගේ ලොකු කරගත්ත ගමන්ම මාව ඒකිගෙ ඇඟෙන් ඉවතට විසිවෙලා යන්න මුළු දහිරියෙන් තල්ලුකරලා කැඩිච්ච චීත්තෙ කුකුල් හිකිල්ලක වේගෙන් ක්සනිකව අත්දෙකෙන්ම පෙරවගෙන ආපු පැත්තෙන්ම ගාල කඩාගෙන දුවන්න උනහම ඇසිල්ලකින් මම මගේ පිබිදුනු ඉඳුරන් එක්කලම තණ ගොල්ලේ හතර අතට අතපය විසිකරාන අන්දර ගහේ මුදුන දිහා ඇස් එල්ල කරගත්තමයි දැක්කේ මහතුං ගහේ අත්තක දිගෑ වෙලා පහළ බලං ඉන්න හැටි...වේස බල්ලා!

ඒ ඔක්කොටම ගියේ බඹරෙක් මූනට කිට්ටුවෙං රූං ගාං යන්න යන වෙලාවක් වෙන්නැති.

"මොකද්ද හු... තෝ ගහ උඩ කරන්නේ? "

මට යකා වැහුණා..පරල වුනා. මගේ ඇඟ වෙව්ලන්න ගත්ත.මම සරම උඩහට ඇදල දාගන්න ගමන් හුන් තැනින් දනිපනි ගාලා නැගිට්ටුනා. සරම කැසපට ගහල මහතුං ට පහලට බහින්න කෑ ගෑවා යටිගිරියෙං. මූ ගහේ බඩගාං බලං ඉඳලා පරයා මම මෙතෙන්ට එනතුරු පේමා එක්කල. මුගේ මාලුකෑවට මදි කියලා හිතද්දීම මගේ මූණට ලාටු වගේ උගේ ධාතු වැටුණා...

තොගේ අ...ට කියලා මමත් ගහ උඩට බඩගාන්න ගත්තට එකතැනම උඩ පැන්නා මිසක් කිසි චලනයක් වුනේ නෑ..කකුල් වෙව්ලුවේ මට දරාගංට බැරි වේගෙට. මහතුං අවසිහියෙන් වගේ ගහේ අනෙක් පැත්තෙ අත්තකට දඩෝං ගාලා පැන්නගමන් සරම ලිහිල තව අත්තක පැටලුනා. ඌ අමු හෙලුවෙන් අප්‍රාණික වෙමින් තිබ්බ පුරුස නිමිත්තත් එක්කල පහලට මට කලිං රූටල මගේ කරට උඩින් බිමට පැන්නේ ගිඩිස් සද්දෙන් එහෙම්ම ඉද්ද ගැහැව්වා වාගෙ උණ්ඩිවෙච්ච වෙගෙන්ම ඉදිරියට නැමිච්ච විදියටම ඇදිලා ගිහිං නිරුවස්තරෙන්ම බැද්ද කඩාගෙන දුවද්දි මම උගේ සරමත් අරං මගේ සරමත් ලෙහං බඩ උඩට උණ්ඩිකරං උගෙ පස්සෙම පැන්නුවා.

ආයෙම මහ අහසම පොළවට කඩං වැටුණා වගේ ගොරබිරං සද්දෙන් විදුලියක් කොටද්දිම පොල් ගෙඩි තරම් වතුර බිංදු එක්කල ධාරාණිපාත වැස්ස කඩං හැලුණා. මම අනේක වාරයක් ගහේ පඳුරේ හැපි හැපි සර සර සද්දෙන් දුවං මහතුං දිසාවටම වැහි සද්දේ අස්සෙන් කණ තියාගෙන දුවන්න ගත්තා. එක පාරටමයි මේ අස්සේ මම දැක්කේ මූ ඉද්ද ගැහැව්ව වගේ මගෙන් යාර විසිපහක් නෑ දුරින් හිටං හිටියේ බහිරවයා වගේ ඔලුව බිමට නමං ඇස් දෙක මයේ ඇස් දෙකට මානං හරියට අතේ බිල්ලක් තියං ඉන්නවා වගේමයි මහසෝනා. මම හිටු පාදරයා කියාගෙන ඌ දිහාවටම දුවද්දියි දැක්කේ උගේ අතේ තිබ්බෙ මොකද්ද කියලා මහ වැහි බිංදු අස්සෙන් සටසට ගාලා ඇඟපත ඔලුව මූණ හරහා වැටෙද්දි.

තුවක්කුවක්!

මගේ මූණ ඇදවෙනවා මටම දැණුනා..හකුපාඩ ගැලවිලා දනිස් උඩට වැක්කුරුණා. මම එකපාරටම ගල්බීතවෙලා හිටුවනම නැවතුනා. පිටකරගන්න බැරුව හිරවෙච්ච ධාතු ද කොහෙද නිසා යටිබඩ කොරවෙච්චි ගතිය වැඩිපුර දැනෙද්දි උගේ ඇඟ සේරම ලේ ගලනවා මම දැක්කා හරියට ලේ විලක ඔබලා ඔලුව ගත්තා වගේ. ඉහේ ඉඳං ලේ ගලා ගියා වැහි බිංදු එක්කල සටසට ගාලා මුහු වෙවී බෙල්ල දිගේ හෙළු ඇඟ පුරාම ඉහේ ඉදං පාදාන්තෙටම. බිජ්ජෙ කෙළවරිං ලේ මුහු වෙච්ච ඝණ ලේ කැටි දිය වෙච්ච වතුර බිංදු බිංදු වැටුනා දුරට පෙනුණා රාවණ ඇල්ල වගේ එක තාලෙට. හෙළුවෙං තුවක්කුවක් මානං ඉන්න එකෙක් ඉස්සරහ විලිසංගෙ මොටද කියල ලිහල දැම්ම මාත් සරම බිමට ඒක කොහොමත් තුන්ගුණයක් විතර බරවෙලා තිබ්බා තෙමිච්ච ගතියට. මහතුං මාරයා වගේ මා දිහාවම බලං උන්නා වැහි බිංදු අනෝරාවක් අපි දෙන්න අතරින් මහ පොළවට ඇදං වැටෙද්දි ගස් ඇඹරි ඇඹරි මහ කුනාටු හුළං කැරකෙද්දි වැහි වතුර රේඛා එක්කල අපි දෙන්න ගල් පිළිම දෙකක් වගේ උන්නා යාර දහයකට එහා මෙහා එකිනෙකා දිහාව බලං හෙළුවෙං බයෙං ත්‍රස්තෙං.

"ඉතිං බලං ඉන්නේ... පත්තු කොරහං යකෝ මම බය නෑ මැරෙන්න! "

මම කියං කියං ගියා එහෙමම දෙපැත්තට පැද්දි පැද්දි ඌ තුවක්කුව එක්කලම කෙහෙල් කඳක් මුලින් කපා හෙලුවා වගේම ඇදං වැටුනා ගිඩිං කියාගෙන මහ පොළවට වතුර බිඳිති මලක් වගේ හතරවටේට විසික් වෙලා ගියා හරියට ජබොග් ගාලා උන්දෑ පීල්ල ගාව වලට පැන්න වගේ. තුවක්කුව එහෙම්ම උරේට හිරවෙලා කෙලිං වෙලා තිබ්බා වැට ඉන්නක් වගේ පසා කරගෙන උගේ පපුවෙන් නෙරලා ආව. වැහි බිංදු කෝටි ගාණක් ඌයි මායි අතරින් පොළවට ගහගෙන ගහගෙන ගියා කසෙන් ගහන්නා වාගේ මගේ පිට රිදුං දුන්නා මහ විසාලෙට අහසෙ මැද්දෙන් මහ එළි වැටෙද්දි මට පෙනුණා කට ඇරිච්ච තාලෙන්ම මැරිල ඉන්න හැටි මහතුංව. උගේ ඔලුව මැද්දෙන් ගිහිං තිබ්බා පැල්මක් මොළේ කෑලි ටික ටික සේදි සේදි පේන්න ගත්තම මට ඔක්කාරෙට ආවා.

"කවුද යකො තොට කෙටුවේ?"

මම ඇඟ සේරම ගලා ගෙන හැලෙන වතුර බල්ලෙක් වගේ ගසා දාලා නළල අතගාගෙන ඇහි බැම මැද්දෑවෙන් ගලා ගෙන ආව මහ ජල කඳ පිහිලා ගසා දැම්මා අත දකුණු පැත්තට විසික් වෙන්න දබරැඟිල්ලට එකතු වීගෙන ආව වතුර ටික. මම දෙකට නැවිලා මහතුං දිහාවට නැඹුරු වුනාම දැක්කෙ උගේ ඇස් දෙකේ තිබ්බ මාරාන්තික පෙනුමට මුහු උන මහා භීතිය.

"කාටද යකෝ තෝ බය වුනේ? "

"මට ද ?? "කියල වටපිට හිතාගන්න දෙයක් නැතිව මම මෙලෙක් වෙද්දි හිත අයෙම තද කරගත්තා කවුද මුගේ ඔලුවට කෙටුවේ ඌම මටත් කොටයි ද කියන පරාණබයෙන් මම හතරවටේම වැහි බිංදු අස්සෙන් නාගයෙක් වගේ බලන්න ගත්තා ඉහට කොටල පොල්ල වැරදුනු. වැහි වතුර හෙණ ගහන්නා වගේ පඳුරු අස්සට කඩං පාත් වෙද්දී ඒ හැම වතුර කස පාරකින්ම කීස් කීස් ගගා පහර කන හබරල කොල ආයෙම ආයෙම ඔලුව උස්සන්ට වාගේ ඉස්මත්තට පැන්නා තරගෙට. මට මහ විසාල හුජ්ජබරක් හැදිලා ඒක එතනම නිදහස් වෙලා ගියා කළවා අස්සෙන් උණුවතුර කේතලයක් මද රස්නෙට මහ වැස්ස මැද්දෑවේ තට්ටම් අස්සෙන් වක්කරනවා වගේ දැඩි හීතලක් ඇති කරන පරිසරයේ ඇති එකම රස්න දහර වශයෙන්. දෙකකුල් අස්සෙන් පිටි පස්සේ මහ මුකලානේ ගස් උඩින් මහ හෙණයක් ඒ එක්කලම කෙටුවා ගහ මුදුනේ ගිනි රස්න පුළිඟු දහරාවක් මල් වෙඩිල්ලක් වගේ ඉහිරෙද්දි සද්දෙත් පැතිරුණා කන් බිහිරි කරවන තරමට මට රෙවුනා එතනම. මම ඇදං වැටුණා මහතුංගේ උණුසුම් මළකඳ උඩට ජරබරාස් ගාගෙන මහ අතු කීපයක් මහපොළවට ඇදං වැටෙද්දී ගන්දස්සාරය එක්කම මගේ ඇඟේ දුවගෙන ගියා විදුලි පුංජ වගේ වතුර බිංදු සීරාවට දෙගුණයක් විතර ඇදං වැටිච්ච කොල පත්‍ර දඩු සේරම ඇඟ උඩ. අපි දෙන්න මළවුන් සහ නොමළවුන් එකම තෙරපිල්ලේ ලේ පිලී ගඳවල් අස්සෙන් මළමුත්‍ර ඌස්නය අස්සෙන් පෙරිපෙරී තවතවත් වතුර හතරවටෙන් මඩත් එක්කල ගලා ගියා එන්න එන්නම දළුලාගෙන ආව ඝණ අන්ධකාරයත් එක්කලම මගේ ඇඟට කඩං වැටිච්ච මහ අතු දඩු විසාල තෙරපුමක් ඇති කරල තිබ්බා මගේ උරහිසට සහ තට්ටමට කිසිම බුරුලක් ඇති නොකර.

මට දැනුණා කෙටේරියක් ලේ පෙරිච්ච කැරකෙනවා මගේ ඉහ ඉද්දරින් හීනයකින් වගේ දැඩි සීතල අස්සෙන් බොඳ වෙච්ච. පේමක්කා නිරුවස්තරෙන් ඇවිද ඇවිද හිටියා අවසිහියෙං වගේ දියවෙවී ගියා ඇගේ රූපය මගේ ඇස් තුළ සහ ඇගේ තට්ටං තෙමාගෙන ආ ජල දහරාවල් ඇදං වැටුණා මගේ නළලට දහ වද දෙන්නා වගේ වතුර වක්කර වක්කර මොළේට ප්‍රශ්න කරනවා වගේ කේ පොයින්ට් එකේ වදකයෝ ඉස්සර. මගේ ඇස්වලට උඩිං ගලාගෙන ගිය වතුර මඩ අස්සෙන් මට හීන් කෙඳිරියක් ඇහෙන්න ගත්තා මහ වතුර බුබුලක් බුගුබුගු ගානවා වගේ කවුරු හරි හුස්ම අල්ල ගන්න ජීවිතෙ රැක ගන්න පණ ගහන.

ඔහු වෙනුවෙන් ලියූ අපූරු යතුරුපුවරුව

2010-12-28T20:21:00.000-08:00

ඔලිම්පියා ව‍ර්ගයේ යතුරුලියනයක් ඔහුට මිළ දී ගන්නට මුදල් ලැබුණේ එක්තරා අපූරු ආකාරයකටය. එනම් මීට වසර තිස්පහකට පෙර අනපේක්ෂිත ලෙස නිර්භීතම පුවත්පත් කලාවේදියා සම්මානයට පාත්‍ර වූ අවස්ථාවේ රජයෙන් ලද මුදල් ත්‍යාගයෙනි. එකල ඔහුගේ නිර්භීත ක්‍රියාව වූයේ බෝගල පතලක අධික වැසි වැටීමෙන් පසුව පස් කඳු කඩා වැටී ‍පොළව යට සිරව හුන් කම්කරුවන් පිරිසක් බේරා ගන්නා අතිශය දුෂ්කර අන්තරායකර බිම් ගුහා හාරාගෙන ගිය ගමනට සම්බන්ධ වීමය. එම වසරේ ත්‍යාගයට රෙකමදාරු වූයේ ඒ වීර ගමන ගැන ලියූ පරිසර වාර්තා ඇගයීමට ලක්වීමෙනි. එකල රටෙහි වූ නිර්භීත ක්‍රියා එතෙකින් සීමා වූයේ දැහැමි පාලනයක් වූයෙන් යැයි දැයි ඔහු මෑතකදී සිය පුවත්පත් කොලමේ ලියා තැබීය. වීර ක්‍රියාවකට මග පෑදුනේම ස්වාභාවික විපතක් නිසාවෙන් බැවින් වසර තිස්පහක කාලයක් තුළ වීර ක්‍රියාවේ ක්ෂිතිජය සිතා ගත නොහැකි තරම් ඈත් වී වෙනස් වී දුෂ්කර වී ම්ලේච්ඡ වී ඇතැයි ද ඔහු ට සිතුනද එය සිය කොලමේ ලිවීමෙන් වැළකී සිටියේ ය. එතෙකින් මෙතුවකට කරගෙන ආ පත්තර රස්සාවෙන් ඔහු ලද්දේ එදා වේල - පරිගනකයක් සහ අන්තර්ජාල පිවිසුම -ආත්ම තෘප්තිය සහ මරණ තර්ජන පමණි.

අද ඔහු පණස් විය ඉක්මවා වයසින් ගොස් ඔලිම්පියාව වෙනුවට පරිගනක යතුරුපුවරුවක් සිය ඇඟිලි තුඩු අගින් ස්වල්ප පරිශ්‍රමයකින් තලා දමමින් ලියන කොලම විද්‍යුත් පණිවිඩයක් හරහා පුවත්පතට යවා එහි ‍ආදායම ණයවර පත්‍ර ගිණුමට බැර කරගනිමින් සිය නිවසේ සිටම වෘතියේ යෙදෙන යුගයට අවතීර්ණ වී සි‍ටියේය. ඔහු වඩාත් විශාල නිදහසක් භුක්ති වින්දේ ලිවීමේ පහසුකම ඔස්සේ මිස සමාජ‍ය තුළ ලියන්නට ඇති ‍දෑ ලිවීමට ඇති පහසුව ඔස්සේ නොවේ. ලියන්නට අතිශය පහසුම තාක්ෂණයක් වර්ධනය වී ඇතිමුත් ලියන්නට ඇති දේවල් ලිවීමේ නිසාවෙන් උපදින ප්‍රතිඵල මැඩ ගැනීමේ තාක්ෂණයක් දියුණු වී ඇති වගක් ඔහු‍ට නෙපෙණුනි. ඔහුගේ කාලය බොහෝ සෙයින් ගතව ඇත්තේ ඉස්පිරිතාලවල පොලීසිවල සහ උසාවිවල ය. වරක් ඔහු පාලකයාගේ රහසිගත රාජ මන්දිරයක් ගොඩනගන නගරයෙන් ඈත දුෂ්කර වනදුර්ගයට රහසිගත ලෙස පාගමනින් ගොස් එකතු කරගත් තොරතුරු ලියා ප්‍රසිද්ධ කළෙන් දුරකතනයෙන් සහ ලිපි මගින් එක දිගටම ලද මරණීය තර්ජන හේතුවෙන් සිය කුලී ගෙදර අත්හැර දමා නන්නාඳුනන පලාතක සැඟවී මාස කීපයක කාලයක් ගත කරන්නට සිදු විය. එබඳු කාල පරිච්ඡේද කීපයක් පසුගිය වසර දශක එකහමාරක් තුළ උදා වූයේ තමාටත් නොදැනීම බැව් ඔහුට නිරතුරුව මතක් විය. වීරත්වයේ සැබෑ මායිම් රේඛා වෙනස් වී ඇත්තේ යැයි ඔහු අදහන්නේ එබැවිනි.

පසුගිය සතියේ ඔහු ලද අපූරු තොරතුරක් නිසාවෙන් ඔහුගේ සමස්ත ජීවිතයම මෙයාකාරයෙන් වෙනස් වේයැයි ඔහුට සිහිනෙකුදු නොසිතුණේය. ඔහු තම සිරුරේම සිරකරුවකු වී සිටියේය.

***

සිය සියළු මනෝභාවයන් සළිත කරවූ එම ප්‍රවෘත්තිය දුරකතනයෙන් ඇසුමෙන් ඔහුගේ අතැඟිලි නලියන්නට වූයේය. මෙය අතිශය සාපරාධී පාපකාරී අවස්ථාවක් ලෙස සිතෙහි හටගත් තැවිල්ල හේතුවෙන් ඔහු පරිගනකය දෙස බලා සුසුම් හෙලමින් බලා සිටින්නට විය. ඔහු මේ කාරණය අරභයා කොලමක් ලියන්නේ නම් එය තම සමස්ත ජීවිතයේ දී ලබන්නට යන උපරිම ත්‍යාගය ලැබුමට ප්‍රමාණවත් වන බැව් කල්පනා විය. ඒ ත්‍යාගය නම් මරණය යි. පාලකයාට එරෙහි මෙබඳු කාරණාවක් ලියන්නට මනස මෙහෙය වන්නෙක් උත්තරීතර වීරත්වයට පත්වනු නොඅනුමාන වුව ද පසුගිය වසර දහය තුළ එවැන්නෙක් ඉතිරි වී ඇත්නම් ඒ තමා පමණක් බැව් ඔහු සක් සුදක් සේ පැහැදිලිව දැන හුන්නේය. ඔහුගේ අතිජාත මිතුරන් වූ පුණ්ඩදූල ,කාකනාම ,හිඳඹුසේන, සුමණදීන ,කීරදෙණිය යනාදීහු දැන් වෙසෙන්නේ රජ මැදුරේය. ඔවුන් ගමන් බිමන් යන්නේ රජවාසල රථවලිනි. කෑම බීම තරු පහේ හතේ හෝටල වලය. ඔවුනගේ‍ එකම කාරිය රජු වෙනුවෙන් උසස් ව්‍යාකරණානුකූලව ලිපි රචනා ලියා එක්කෝ පුවත්පත් කතෘවරුන්ට යැවීමයි. නොඑසේනම් රජතුමාට ප්‍රසිද්ධියේ දේශන රැලි වලදී කියවන්නට සකස් කර දීමයි. අවශේෂ වශයෙන් රජතුමා ගේ නියමයෙන් පොත්පත් ලියා පළකරන ඊනියා විශාරද ඥාතීන් දරුවන් වෙනුවෙන් ගොස්ට් රයිටර්ලා විදියට සේවා සැපයීමයි. මේ කොයික කළත් ඔවුනට රජ සම්පත්තියෙන් අණූන සැප සම්පත් නිරන්තරයෙන් ලබන්නට වාසනා වී ඇත්තේය. ඔවුනගේ දරුවන්ගේ අධ්‍යාපනය එංගලන්තයේ හෝ ඇමරිකාවේය. ඒ තතු ජීවිතයේ සැබෑ වූ සිහින වන්නේ මේ ජීවිතයට ඔවුන් පිළිපන් බැවිනි. ඔවුන් ර‍ට පිළිගත් බුද්ධිමතුන් ගේ ශ්‍රේණියට උසස් වී ඇත. ඔවුන් කියනා දෙයක් උත්කර්ෂයෙන් පිළි ගන්නට සියල්ලෝ සැදි පැහැදී සිටිති. ඒ ජීවිතයට ඇතුළු වීමේ යතුරු ඔහු අත වුවද කිසිකලෙකත් වාසල දොරටුව වෙත පා නගන්නට ඔහු සිත් නොවීය. දොරටුව අභිමුව ජෙලග්නයිට් කූරක් සේ පත්තු වන්නට පතමින් හේ කල් මැරීය. සැබෑ ජීවිතය දුෂ්කරය. තැතිගැන්මෙන් ගත වුවද රජ වාසල වාසය ඔහුගේ ආත්මය පාවා දීමක් ලෙස නිරන්තරයෙන් හැඟුණි.

පසු දින ඔහුගේ කොලමේ ලියැවී ඇති කාරණා සම්බන්ධව පුවත්පත් කතෘ මාණ්ඩලික ප්‍රධානියා ඔහු වෙත දුරකතනයෙන් උදෑසන කතා කළේය. කස්සප විශ්මයට පත් විය. තමන් එය නොලියූ බව සපථ කර කීවද කතෘතුමා කීවේ එය විද්‍යුත් තැපෑලෙන් ලද බවත් එය පුවත්පතේ පළකිරීමට තමන් රෙකමාදරු කළ බවත් එවැන්නක් ලිවීමෙන් තම පුවත්පතට කළ ලාභය නිසාවෙන් තම ගෙවීම තුන්ගුණයකින් වැඩි කළ බවත් මෙබඳු ප්‍රචණ්ඩ- නිර්භීත ලිපිවලට ජනයා අතිශය උනන්දුව දක්වන බවත් පුවත්පත උණු කැවුම් මෙන් විකිණී යන්නට එය හේතුවන බවත් පැවසූ හෙතෙම ඔහුට සුභ පතා තවත් මේ වැනිම ලිපියක් ඊළඟ නිකුතුවට ද එවන ලෙස බැගෑපත් විය.

කස්සප අතිශය ලෙස කම්පාවට පත්විය. නැවත නැවතත් කල්පනා කළ ඔහු එබඳු ලිපියක් තමා නොලියූ බැවින් මේ කාරණය අරභයා තමන්ගේ නිර්දෝශීභාවය ඔප්පු කරන්නේ කෙසේදැයි කල්පනා කරන්නට විය. කවුරුන් හෝ තමන්ගේ විද්‍යුත් ලිපිනය සොරාගෙන මේ කඩාකප්පල්කාරී කටයුත්ත කරන්නට ඇතැයි ඔහුට සිතුණද දැන් මේ ලියැවිල්ලේ වගකීම තමන් වෙත පැවරී ඇති හෙයින් එබඳු ළාමක දේ කීමට සූදානම් වීමෙන් ඵලක් නොවන බැව් හෙතෙම කල්පනා කරන්නට විය.

ඔහු පරිගනකය ඉදිරියේ වාඩි වීමට ද බිය විය. පරිගනකය සුපුරුදු ලෙස මේසය මත නිසොල්මනේ ඔහු දෙස මොනිටර නෙත දල්වාගෙන බලා සිටී. එහි යතුරු හෙමින් සීරුවේ රිද්මයකට එබි එබී යන්නා සේ ඔහුට පෙනී ගියේය. දෙයියනේ මා වෙනුවෙන් යතුරුපුවරුව යතුරුලියනව ද?

හදිසියේම සිය කුලී නිවසේ දොර මහ හඩ නංවමින් විවර වී සිය දෙටු දියණිය පෙනී සිටියාය.

"මොකද්ද තාත්තේ මේ කරන්නේ? අපිවත් මරාගෙන මැරෙන්න ද හදන්නේ? මේ බලන්න මගේ පුංචි එවුන් දෙන්නා දිහා. උන්ට තවම අවුරුදු හතයි හතරයි. තාත්තා හදන්නේ අපිවත් පණපිටින් වළලන්න ද?"

එසැණින් සිය බෑණා ද දියණිය පසෙකට තල්ලු කර ඔහු ඉදිරියේ සිට ගත්තේ සිය දබර ඇඟිල්ල ඔහුගේ නාසයට එල්ල කරගෙනය.

"තාත්තේ...හොඳ හිතින් මේ කියන්නේ...අපි කන්න බොන්න දෙන්නම් ... ඔය පත්තරේට ලියන එක නවත්තල දමල යං අපිත් එක්කල. මේක පුදුම කරුමයක්නේ? තාත්තට මොකද්ද තියෙන පිස්සුව මේ? රටේ රජතුමාගේ දේවල් එලිපිට ලියන්න යන්නේ එතුමා කවුරු කියල හිතා ගෙනද ? අපි මොක්කුද? මේ පත්තරේට ලියපු එකම ඇති අපි සේරටම වලපල්ලට යන්න. පුදුම පිස්සුවක් නේ තාත්තේ තාත්තට තියෙන්නේ? යං යං මේ මගුල් සේරම දමලා අපේ අහ යං..."

පුවත්පතේ කතෘතුමා නොසෑහෙන උන්මාදයකින් පුවත්පතේ අයිතිකරු ‍හමුවී සිය ව්‍යාපෘතිය මල්පල ගැන්වූ ආකාරය විස්තර කර ඔහුගේ අමන්දානන්දය තව තවත් වර්ධනය වන සේ කතා කරන්නට විය.

"අපි මේ පාර මේ රජතුමා ගෙදර යවන්නේ පාරවල් ගානේ උද්ඝෝෂණ අරව මේව කරල නොවෙයි. එකම එක කොලම් එකකින්! ඔබතුමා දන්නව ද දැං මුළු රටම මේ කස්සපගේ කොලම් එක කියවනවා. පත්තර විකුණුම හතරගුණයකින් වැඩි වුණා පහුගිය සති හතර ඇතුළේ. මිනිස්සු පාරට බස්සන්නේ අර පක්ෂෙන් මේ පක්ෂෙන් නොවෙයි. මේ කස්සපගේ කොලම් එකෙන්!"

කස්සප සිය දියණියගේ ගෙදර පදිංචියට ගිය දිනයේ සිටම බෑණා ඔහු අසලම නිදි වර්ජිතව දිවා රෑ දෙකෙහිම ඔහු කිසිම‍ දෙයක් නොලියන්නේ යැයි සපථ කරමින් ඔහු අසලම සි‍ටියේය. සත්‍ය වශයෙන්ම ඔහු වැසිකිළියට ගියද බෑණා ඔහු අසලම රැකවල් ලා සිටියේ ඒ අතරතුර හෝ ඔහු යමක් නොලියන බැව් තහවුරු කරගන්නට ය. සියල්ල හොඳින් සිදුවිය. කස්සපගේ කුළී නිවස ප්‍රචණ්ඩ ජනතාව විසින් ගිනිබත් කර ඇති බැව් පසුදින ජාතික පුවත්පත්වල ප්‍රධාන ශීර්ෂපාඨය ලෙස මුල්පිටුවල බැබලි බැබලී තිබුණු අතර ඔහුගේ වතගොත ජීව දත්ත වලින් ඇතුළු පිටු පිරී ‍ගොස් තිබුණි. ඔහු මේ සියල්ල දත්තේ සිය දියණිය වැඩ‍ හමාර වී ගෙදර එනවිට ගෙනැවිත් තිබූ දවසේ පත්තර සියල්ලම පිටුවක් නෑර පරීක්ෂාවෙන් කියවීමෙනි. යසෝමා ලෝකාවසානය වෙත ලංවූ බැළලියක් මෙන් ගර්හිතව සිටියාය.

"පුතේ විශ්වාස කරන්න මම මේ කිසිම දෙයක් ලීවේ නැහැ. විශ්වාස කරන්න. දැං මේ කස්සප කොලම් එකේ යන ඒවා කිසි දෙයක් මා අතින් ලියැවුණු දේ නොවෙයි. මේක මහ විශාල පුදුමයක්. නමුත් මේ ලියැවෙන දේවල් සැබෑවටම මිනිසුන් දතයුතු දේවල් බැව් හැබෑව! මේ ඔක්කොම මා දන්නා විස්තර තමයි. නමුත් දෙවියනේ මම මේ කිසිවක් ලීවේ නැහැ. කවරුහරි මගේ නමින් මේවා පුවත්පතට විද්‍යුත්තැපෑලෙන් යවනවා. ඉතිං මං මොනවා කරන්නද දෙයියනේ...මම මේවා ලියන්න හිතුවත් ලීවේ නැහැ."

"පිස්සු විකාර දොඩවන්න එපා තාත්තෙ. මේවා සේරම තාත්තගේ මතිමතාන්තර එක්ක යසට ගැළපෙනවා. තාත්තා හිතන විදියටම ඒ ශෛලියටම වෙන කාටවත් ලියන්න පුළුවන් ද? දැං රජවාසල ප්‍රකාශයකුත් නිකුත් කරල තියෙනවා තාත්තා ද්‍රෝහියෙක් කියලා. මේවා ගැන මේ විදියට බොළඳ කතා කියන්න එපා. මගේ ජීවිතෙත් ඉවරයි තාත්තේ. කොයි වෙලාවක හරි අපි සේරමත් සූන්නද්දූලි වෙනවා අද හෙටම. මේ බලන්න මේ පත්තරේ...මේ කියල තියෙන්නේ යසෝමා ගැන. දෙයියනේ මගේ දරුවො දෙන්නා... යසෝමා...අපි අද රෑම තාත්තත් අරං අපේ අහ යමු. නැත්තං අද රෑට සොයාගන්න වෙන්නේ අපේ භෂ්මාවශේෂ තමයි."

ඔවුහු සියල්ලම එදිනම රාත්‍රියේ කුලී රියක නැගී අසේලලයි මහගෙදරට පිටත් විය. යසෝමා මේ සියළු කරදර විපත්ති ගෙන ආ සිය පියා දෙස උපේක්ෂාවෙන් බලා සිටියාය. කස්සප රියේ වහල දෙස අඩවන් දෑසින් බලා ගත්වනම ඔහේ සිටින්නට විය. ඔහු මැතිරුවේ තමන් මේ කිසිවක් තම කොලමට නොලියූ බවයි. එය අඩෝවැඩියාවක් මෙන් ගමනාන්තය තෙක්ම ‍යසෝමාගේ කණට වැක්කිරිණි.අසේල භයභ්‍රාන්තරව දල්වා ගත් දෙනෙතින් අඳුරු මහමග දෙසට නෙත් යොමා නොඉවසිලිමත්ව සිය සිවුහැවිරිදි දියණිය තුරුළු කරගෙන සිටියේය. ඔහුගේ පියා මේ සියලු ආරංචි පුවත්පත් වලින් කියවා අතිශය භීතියටත් සංත්‍රාසයටත් පත්ව ඇඳේ වැතිරී සිටියේය. ඔහුගේ රුධිර පීඩනය ඉහළ ගොස් තිබුණි.

කතෘතුමා මේ සතියේ පළ වූ කස්සප කොලම ගැන දුරකතනයෙන් රාජ්‍ය රහස් අංශයේ නිලධාරීන් සමග කතා කරමින් සිටියේය. ඔහු අභියස රහස් පරීක්ෂණ අං‍ශයෙන් පැමිණි නිලධාරීහු දහ දෙනෙක් සිට ගෙන සිටියෝය. ඔවුහු කඩිමුඩියේ විශේෂාංග දෙපාර්තුමේන්තුවේ ලිපි ගොනු සහ පරිගනක දත්ත පරීක්ෂා කරමින් ද කතෘතුමා ප්‍රශ්න කරමින් ද යුහුසුළු වූහ.

"මහත්වරුණි මේ කස්සප ලිපිය අප වෙත එවන්නේ විද්‍යුත් තැපැල් මගින්. කස්සප ඉන්නේ කොහෙද කියන්න මම දන්නේ නැහැ‍. අපි ළඟ තියෙන්නේ මේ ලිපිනය විතරයි. ඉතිං ඔහෙල මට වඩා හොඳින් දන්නවා ඇති නොවැ ඒ කුලී ගෙදර ගිනිබත් කරල කියල ඊයේ රාත්තිරියේ. මට කියන්න තියෙන්නේ මේ ලිපිය අපට ලැබෙන තාක් අපි ඒක පළ කරනවා. ඕගොල්ලෝ නීති මගින් ක්‍රියාත්මක වීම අපට ගැටළුවක් නැහැ. අපි ඒවට පෙනී සිටිනවා. මේක කිසිම ආකාරයක නීති උල්ලංඝණය කිරීමක් නොවේ වග ඔබතුමන්ලා දන්නවා. ඔබතුමන්ලගේ ප්‍රශ්නයත් මේ කස්සප කොලමේ ම කීප වතාවක් ලියැවිලා තියෙනවා නොවැ. ඒවා අපිට වඩා හොඳට තේරුම් යන්නෙත් ඔය මහත්වරුන්ටම නෙව."

කස්සප කොලම අඛණ්ඩව පුවත්පතේ පළ වන බැව් දුටු අසේලට පිස්සු හැදෙන්නට ඔන්න මෙන්න යැයි සිතුණු එක් අවස්ථාවක කස්සපට තමා මේ කොලම ලියන්නේ නැතැයි ඔප්පු කිරීමට අතැඟිලි තලා ගන්නට සිදු විය. ඔහු එය කළේ වංගෙඩිය සවිමත් බාල්කයක කඹයක් ආධාරයෙන් ඉහලට ඔසවා සිය දෑත් මතට පතිත වන ලෙස සැකසූ ලීවර ආධාරකයක් සිය කකුලින් පන්නා දමමිනි. කස්සප සිය අකර්මන්‍ය වූ දෑතේ ඇඟිලි ඉමහත් ආඩම්බරයෙන් සිය දියණියටද පෙන්වා පෞද්ගලික රෝහලෙන් පිටත්ව ආවේ දින තුනකට පසුවය. යසෝමා සිය පඩිපත පෞද්ගලික රෝහලට වැය කර සිය පියාගේ අකර්මන්‍ය දෑතේ තුවාලවලට බෙහෙත් ගල්වා සනීප කරගත්තාය. කස්සප කොලම අඛණ්ඩව පුවත්පතේ පළ විය. එදිනෙදා රජ වාසලේ අකටයුතුකම් වංචා දූෂණ එළිදරව් කරමින් නිර්දය ලෙස විවේචනාත්මකව ලියැවුණු මේ කොලම රජතුමා ද නිතිපතා කියවන්නට වූයෙන් රජතුමා නොදන්නා තම පවුලේ ඥාතීන් විසින් කරන අකටයුතු කම් පවා දැනගත්තෙන් ඉමහත් ප්‍රචණ්ඩත්වයට පත්ව සිටියේය. පොලිසියේ විශේෂ ඒකකයක් පොලිස්පතිගේ නියමයෙන් විවෘත වූයේ කස්සප අත්අඩංගුවට ගැනුමේ මෙහෙයුම ක්‍රියාත්මක කරන්නටය. මෙම පොලිස් අංශය හැඳින්වූයේ කේපී ඔපරේෂන් නමිනි.

කස්සපගේ අකර්මන්‍ය දෑත් නිසාවෙන් ඔහුගේ අසරණ විලාසය බලා සිටිනා යසෝමා සහ අසේල ද කම්පිතව වැහැරී සිටියහ. ඔවුනගේ දෛනික ජීවිත අවුල්ජාලා බවට පත්වී තිබුණි. අසේල වැඩට යන්නේ යසෝමා සමග මාරුවෙන් මාරුවටය. කස්සප කොලම නවතින දවසක් නොදැකම තිබියදී මෙය ලියැවෙන්නේ කෙසේදැයි අසේලට සිතාගත නොහැකිව තිබිය දී දිනක් යසෝමා සහ අසේල තම පියා වෙනුවෙන් රාජකාරී මාරුකර ගන්නා ස්වල්ප කාලාන්තරයක දී කස්සප සිය දෑස් ඇඳ මිට්ටමේ වූ තියුණු ගැටියක හප්පා දෑස් ලේ විලක් බවට පත්කර ගත්තේය. එදින රාත්‍රිය රෝහලේ කටුක ලෙස ගෙවන්නට අසේලටත් යසෝමාටත් දියණියන් දෙදෙනාටත් සිදු විය. කස්සපගේ දෑස් අඳ වී තිබුණේ සිදු වී ඇති හානි‍ය යලි කිසිදු දිනක ප්‍රතිකර්මයකින් සකස් කර ගැනුමට‍ නොහැකි ලෙසිනි.

කස්සප කොලම නොනවත්වා ලියැවුණි. පුවත්පත් රට පුරා විකිණෙද්දී දහස් ගණන් මිනිසුන් රාජවාසලේ අත්තනෝමතික ක්‍රියා ගැන සිය විරෝධය පතුරද්දී පුවත්පතේ කතුවරු සහ ව්‍යාපාරික සමූහය එක රැයකදී අතුරුදන් වූ අතර පුවත්පත් මුද්‍රණාලය ගිනිබත් විය. කස්සප කොලම අන්තර්ජාලයේ සැරිසරන්නට වූයෙන් කස්සප සොයා ක්‍රියාත්මක වූ කේපී ඔපරේෂන් එක සාර්ථක වී තිබුණි.

කස්සප ගෙලෙන් පහලට අක්‍රිය වූ දේහයක් සහ නොපෙනෙන දෑසකින් යුතුව ඇඳක වැතිරී සිටිය දී අසේල සහ යසෝමා ද ඔවුනගේ දරු දෙදෙනාද සමගින් අත්අඩංගුවට පත්වුව ද අන්තර්ජාලයේ අස්සක් මුල්ලක් නෑර කස්සප කොලම දිනෙන් දින ව්‍යාප්ත වනු නිලධාරීන්ටද රාජාණ්ඩුවටද දැක ගත හැකි විය.

පාසාණ යන්ත්‍ර මහා භාණ්ඩාගාර සූත්‍රය

2010-09-08T21:00:00.000-07:00

රාජෝත්තමයාණන් වහන්සේ රාජ භාණ්ඩාගාරය සංචාරය කරනු පිණිස වීදියට බට හොත්තේ දහසකුත් හස්තීන් පිට නැගි දිගු දුර මෙහෙයුම් බලකායේ න්‍යෂ්ටික අවි හිස දරාගත් ජාන ඉංජිනේරු තාක්ෂණයෙන් අලි ඩීඑන්නේ සහ මකර ඩීඑන්නේ මුහුකර නිමැවුනු හෝමෝසේපියන් ජාතික මිනිසුන් දහසක් සමග පූර්ණ ආරක්ෂාව යටතේය. භාණ්ඩාගාරය පිහිටා තිබුණේ හිමාලයට නොදෙවෙනි මහා ගිජිකුළු පව්වේ හුදකලා ගිනි කන්දක් පාමුල යොදුනක් යටින් වූ උමගක කෙළවරය.

භාණ්ඩාගාරය ට ඇතුළු වන මාර්ගය දෙපස පොලිස් මුර යොදා තිබුණේ මිලි මී‍ටරයෙන් මිලි මීටරය සන්නද්ධ කුළු පොලු හෙල්මට්ධාරී ජල විහිදුම් උපකරණ පොම්ප අතැති ලෝහ සන්නායක පැළඳ ගත් මුරකාවල් පවුරක් සේ දිස්වන පරිද්දෙනි.

රජතුමා භාණ්ඩාගාරයට ඇතුළු වත්ම ආකාශය පැරා ආලෝකයෙන් දිදුලන්නට විය. හෙලිකොප්ටර දෙසිය පණස් හයක් අහසේ කුරුළු රෑනක් සේ ඉහලටත් පහලටත් හරහටත් යනාදී වශයෙන් මැහි මදුරු කෝඳුරුවකුටවත් පියඹා යන්නට බැරි තරමින් ආරක්ෂක විධිවිධාන පවත්වන අතරතුර රජතුමා රාජ භාණ්ඩාගාරයේ සෙමෙන් සෙමෙන් පියවර තබන්නට විය.

රාජ භාණ්ඩාගාරයේ පොළව දූවිල්ලෙන් වැසී බිත්ති පුරා මකුළු දැල් සහ ඝණට වැඩුණු හරිත වර්ණ පෙඳ පාසි සහ දිය සීරාවල් සිඟිති දිය ඇලි මෙන් ගල් බිත්ති මතුපිට උතුරා හැලෙමින් පැවතුනි.
භාණ්ඩාගාර සැළසුමේ නැති දැවැන්ත දෝනාවක් භාණ්ඩාගාර මධ්‍යයේ හෑරි තිබුනෙන් එම අඳුරු අගක් මුලක් නොපෙනෙන කුහරය ගැට්ටේ රජ නතර විය.

"එම්බා භාණ්ඩාගාර ඇමතිය. කුමක් ද මේ ‍අගක් මුලක් නොපෙනෙන ආගාධ දෝනාව? මම මින් පෙර කිසි කලෙකත් මෙබඳු දෝනාවක් භාණ්ඩාගාරයේ නොදුටුවෙමි. වහා මේ දෝනාව කිමැයි පහදව?"

"රජතුමනි. මේ දෝනාව ඔබ රජධුරන්දර උත්සව දිනයේ දීත් පැවතුනි. මෙය ඔබගේ පිය රජුන්ගේ කාලයටත් පෙර පැවතුනි. නමුත් ඒ කාලයේ මේ දෝනාව ඉතා කුඩාවටත් පැවත කාලයාගේ ඇවෑමෙන් මෙය මේ තාක් විශාලව ඇත්තේයැ."

"මොනවා? කාලයාගේ ඇවෑමෙන්? කවුරුන් විසින් හාරන ලද්දක් මේ ? මට කිසිවක් නොවැටහේ මන්ත්‍රී?"

"රජතුමනි. මෙම දෝනාව හාරන්නේ කිසිවෙකුත් නොවේ. මෙය ඉබේම හෑරෙන්නකි. අපගේ භාණ්ඩාගාරයේ වස්තුව හිඟ වූ විට අප අසල රාජ්‍ය දනව්වලින් ණයට ගත් ධන සම්භාරය හේතුවෙන් මේ දෝනාව දැන් ඒ තරමටම විශාල වී ඇත්තේය."

"ඉතිං ඇමතිය අප රාජ්‍යය නිපදවන මේසා විශාල ධනය මෙහි පිරවූ කල්හි කුමක් වන්නේ ද? මට පෙනෙන්නේ ඒ සියල්ල මේ දෝනා කටින් අප රාජ්‍යයෙන් පිටුවහල් වන බවයි."

"එසේය ස්වාමීනි. මේ දෝනාව මුව විටක් නොපුරවා අපගේ ධනය මෙහි රඳවා ගත නොහැකිය. අප රාජ්‍ය උපයන වාර්ෂික මුළු සේසතම මෙහි ගෙනත් තැන්පත් කළද මේ දෝනා කට නොපිරෙයි. දමන දමන තරමක් සියළු ධනය මෝය ක‍ටේ පොල් ලෙලි දමන්නා සේ අතුරුදන් වන්නේ මේසා විශාල ණය බරක් අප රාජ්‍යයේ ඇති බැවිනි රජතුමනි."

"අහා! මුදල් මන්ත්‍රී මට වැටහුණි. කැඳවනු වහා අග්‍ර පුරෝහිත මෙහි. වහා විසඳුම් ඇවැසියැ මේ දෝනා කට පිරෙන්නට ධනය දමා අපගේ ණය බරින් නිදහස් වී රාජ්‍ය කරගෙන යාමට ඇවැසි ධනය ඉතිරි කර මාගේ රටවැසියන්ගේ ජීවිත සුඛිත මුදිත කිරීමට වහා සැළසුමක් සකස් කරව."

මුදල් මන්ත්‍රී වහා සැළලිහිණියකු ගෙන්වා උන් පාමුල පණිවිඩ පත්‍රයක් රෝල් කර ගැට ගසා ලිහිණි අධෝ මුඛයට අහස් ගුණ්ඩුවක් ගසා පත්තුකර අත හැරීය.

පුරෝහිත වහා පරිසර හිතකාමී දඩු මොණරයෙන් ආකාශ ගංගාව තරණය කර රාජභාණ්ඩාගාර මස්තකප්‍රාප්තව රජුන් ඉදිරියේ රුසියන් ජිම්නාස්ටික් ක්‍රීඩකයකු මෙන් බල්ටි කීපයක් ගසාගෙන පැමිණ එකත් පස්ව හිට ගත්තේය.
"පුරෝහිත නුඹගේ නුවණින් මාගේ භාණ්ඩාගාරයේ ඇති මේ පිටිවහල් දේශ දේශාන්තරවලට අප රාජ්‍යයේ ධනය ගලා යන මේ භයංකර දෝනා කුහරය පුරවා ලන්නට ශූර අදහසක් ඇවැසිය. වහා කල්පනා කර මට උපදෙස් දෙව. මෙය නම් හෙට ඉර පායන්නටත් මත්තෙන් විසඳිය යුතු ප්‍රශ්නයක් බව හිතට ගෙන වහා ක්‍රියාත්මක වෙය. "

පුරෝහිත වහාම තමන්ගේ ඉනේ තිබූ ලැප්‍ ටොප් යන්ත්‍රය ගෙන එයට දුම්මල අල්ලා එහි ප්ලගය ගස් බෙනයකට ගසා ඔන්ලයින් ගොස් ගූගල් සෙවුම් යන්ත්‍රයට වැදී විශ්වය හතරදිග්බාගයේ ඇති සියළු තොරතුරු ඉරබටු තරුව මතුවන තුරුම සොයා බලා ඉමහත් වෙහෙසකාරීව උර තල පද්දමින් රජතුමා අභියසට වහා පැමිණියේය.

"රජතුමනි. කුඹුරු අස්වැද්දීමෙන් වුවද ලබන්නා වූ ධනයෙක් වෙද ඊට කන්නයක් බලා සිටින්නට වන්නේය. අල ලබු වගේද ගෝවා ආදී හේන් වගාවෙන් ලබන ආදායම් දෙස බලාපොරොත්තුවක් තැබිය නොහැක්කේ තෙත් කලාපය සහ වියලි කලාපය දැන් සිතියමේ එහේ මෙහේ පැන දුව හැංගි මුත්තන් කෙළීමක් හේතුවෙන් වැසි දිය ලැබුම අවිනිශ්චිත බැවිනි. පස්ගෝ රස යනාදී සත්ව කර්මාන්තයෙන් ද එහෙමකට ආදායමක් ලදුවත් එය මේ ආගාධය නොව මේ පයට පෑගෙන පාපිස්ස වසා දමන්නට හෝ ප්‍රමාණවත් නොවන්නේය. "

"ඉතිං පුරෝහිත තොප දැං අර ලැප්ටොපය ගස් බෙනයක ගසාගෙන වරුවක් පමණ කඹුරා ආවේ කළ නොහැකි දේවල් දෙසා බාන්ට ද? මට ඇවැසි මේ ආගාධය පුරවා දමන ක්‍රමයක් විනා තොපගේ නොහැකියාවන් පිළිබඳ අඩොවැඩියාවන් ඇසුම නොවේ."

රජතුමා ඉණ බැඳි ලේසර් කිරිච්චිය නොකියා මොබයිල් මාලය අස්සෙන් එළියට ඇද්දේය.

"රජතුමනි. කලබල වන්නට කාරි නැත. අප රටේ මිලියන් විස්සක් වන ජනපදිකයන් සියල්ලටම හස්තපෝන් ඇත්තේයැ. ඒ පෝන් වලින් රජයට මෙතෙක් ලද ආදායම් නම් ඉතා සුළුයැ. මාගේ අදහස නම් මේ පෝන් වලින් කතා කරනවා වැනි පෞරාණික වැඩ දිගින් දිගටම කරන්නට යෑමෙන් අප රජයට ඇති ආදායමක් නැත්තේයැ. එබැවින් මේ පෝන් වලින් එක එක විජ්ජා මවා පා එම විජ්ජාවල් වලට ජනපදිකයන්ගේ කැමැත්තෙන් එක එකාගෙන් නොදැනෙන තරමේ සුළු මුදල් එකතු කරගන්නට සැළසුම් කළොත් නම් මේ ආගාධය පමණක් නොව අසල් දනව්වල ආගාධ පවා පුරවා ලන්නට ධනය රැස් කෙරෙනවා නොඅනුමානය."

"පුරෝහිත නොකෙරෙන වැඩ පවසමින් මාගේ අනතහ්පුර‍යේ ගත කළ හැකි වටිනා කාලය කා නොදමව. කියව කියන දෙයක් තේරෙන ආකාරයෙන්. "

රජතුමා සිය කුරහන් සහ වානේ ෆියුෂන් කොට තැනූ මඟුල් කඩුවේ සේ‍ෆ්ටි කැච් එක ගලවන්නට විය.

"රජතුමනි. මම උදාහරණයකින් ම කියන්නම්. දැං අර රූපවාහිනි අංජන රේඛා වල පැවැත්වෙන හැටහුටහමාරක් කුප්පස්ටාර් තේරීම් වල දී මෙන් ජනපදිකයන්ගේ කැමැත්තෙන් ඉතා සුළු මුදල බැගින් අපගේ මේ භාණ්ඩාගාරයට වැටෙන පරිදි කුමක් හෝ අංගමාලයක් පටන් ගත යුත්තේයැ. එවිට රජතුමනි එකෙක් රුපියලක් අපට වැටෙන පරිදි හස්තපෝන් ජාලා සමග ඇති කරගන්නා ඇසැම්මෙස් ගිණුමකින් අපගේ භාණ්ඩාගාරය දවසකට රුපියල් මිලියන විස්සකින් තැන්පත් ධනය ‍වැඩි වෙන්නාහ. එවැනි ජෝගි හතරක් පහක් සංවිධානය කළ හොත් එක රැයින් මේ භාණ්ඩාගාරය පිරෙන්නට ජනපදිකයන්ගේ මුදල් එකතු වන්නාහ. රජතුමනි මේ ජනපදිකයන්ට දවසකට රුපියල් දෙතුන් සීයක් වුවද මේ බඳු ආතල් වැඩසටහනක් වෙනුවෙන් වැය කිරීම සුළුම සුළු දෙයක් බැව් සමීක්ෂණ වාර්තා තහවුරු කර ඇති හෙයින් දැං ඉතිං කළ යුත්තේ කුමක්දැයි වැටහෙන්නට ඇති නොව මහ රජතුමනි?"

"අහා! කදිමයි පුරෝහිත! නුඹගේ නුවණ කදිමයි! නුඹට එක අතකට ලැප්ටොපයක් දී මෙහෙම නම් කකුල් දෙකටත් වම් අතටත් ලැප්ටොපයක් බැගින් දීමෙන් තව කුමන ආශ්චර්යමත් නුවණ ක්‍රියාත්මකව මේ නුවර ධනයෙන් පුරවා ලන්නට හැකි වන්නේ ද? මුදල් මන්ත්‍රී වහාම ජපානයට කතා කොට අප පුරෝහිතට තව ලැප්ටොපයන් තුනක් ගෙන්වා දෙව‍. හෙට රාජ අණබෙරයක් රූපවාහිනි අංජන රේඛාව හරහා වහා විකාශ කරනු. අපගේ අභිලාෂ හෙලි නොවන අයුරින් මේ සියළු කටයුතු සංවිධානය පිණිස ඌරුවරිගෙලාගේ ප්‍රාණපුත්‍රයා කැඳවා යස ‍රූපවාහිනි අංජන රේඛාවක් නිමවා නාඹර කැකුළියන්ගේ ලැම -නාභිය- දෙවොටර හා නිතඹ ආදී දේ පැහැසරව උලුප්පා දැක්විය හැකි රාගනීශ්‍රිත ලයිව් වැඩසටහනක් අරඹවා එහි උසස්ම ප්ලාස්ටික් සර්ජරි කර ප්‍රතිව්‍යුහගත වූ නාරිදේහය ඇත්තිය තෝරා ගන්නට ඇසැම්මෙස් බණවා අපගේ භාණ්ඩාගාරයේ දෝනා කුහරය පුරවා ලන්නට තරම් ධනය එක්රැස් කරවන්නට කටයුතු කරව!"

ප්‍රාණපුත්‍රයා එවිටත් දිනකට රුපියල් පන්සීය බැගින් ගෙවමින් කම්කරුවන් දෙ‍ළොසක් යොදවා කරිජ්ජ මංගල්‍යයෙන් උපයා ගත් ධන සම්භාරය කහවණු දහසේ පොදිවලට බඳීමින් දිවා රාත්‍රී තුනක් සිය මිදුලේ ගත කරමින් උන්නේ රාජ අණ ලද්දෙන් වහා කුරුබිලියෙන් රාජ මන්දිරයට රිංගා ගියේය.

21/08/2010

ව්‍යාකරණ බිඳුනු සිහින [18+]

2010-08-19T20:49:00.000-07:00

ව්‍යාකරණ බිඳුනු සිහින

ජීවිතයම ඇනග්‍රමයකි. සියළු ජීවිත තුළ ඇත්තේ ද එකම සිදුවීම් ය. ව්‍යාකරණය නිසා ඒවායේ සමහරකට තේරුම් ලැබෙන වගන්ති වීමට වාසනාව ලැබේ. අනිත් ඒවා සියල්ල විකාර බවට පත්වේ.

***

ඇයගේ සිරුර තුවාල වලින් වැසී ගොස් තිබුණි. ඔහු ප්‍රාණවත් ලිඟුව ඒ සියලු තුවාල තුල ඔබමින් සිරුර පුරා ඇවිද්දේය. අවසානයේ නොසිතු තැනක තිබී නිවැරදි තුවාලය ඔහු සොයා ගත්තේය. ඔහුට අවශ්‍ය වූයේ සිය ලිඟුව දවටා ගත හැකි තද මස් කෑල්ලකි.

***

රිය ලයිට් කණුවට අභිලම්බව සෘජුව සමමිතිකව වැදී තිබුණි. රියේ ගමන් කළ ස්වර්ණාගේ සිරුර යෝනියේ පැති කඩක් කපමින් සමමිතිකව දෙකට වෙන් වී උදරයේ අතුණුබහන් එලියට පැන තිබුණි. ආලයේ නුරාවේ අඟපසඟ සියල්ල සුරතාන්තය සොයා යකඩ කැබලි ඇණ මුරිච්චි සහ වීදුරු කටු අතරින් වහනය වන අමු රුධිරය අස්සෙන් සිහින් රාගනීශ්‍රිත කෙඳිරියකට හුවමාරු වී තිබුණි. ඔහු කිසිදා නොදුටු යෝනි මගේ කෙළවර ගැබ් ගෙල කැපී ගිය යකඩ තහඩු අස්සෙන් රෝස රතු පාටින් දිලිසුනු මස්වැදලි අතර කුණු ලේ වැගිරුණි. මස්‍‍ ‍ලේ යකඩ තහඩු එකිනෙක මුසුවී කැපී ‍ගිය ඇගේ පියයුරු දැකුමෙන් ඔහුට ප්‍රාණවත් විය. ඔහු ඇයගේ මස් වැදලි බවට කැපී ඉරී ගිය යෝනිය රුධිරය පිසිමින් අතගා බැලීය. එය උණුසුම් බව ඔහුට දැනුණි.

***

යුද පිටියේ ත්‍රස්ත සෙබලියන්ගේ නිරුවත් මළ කඳන් සහිත පින්තූර මිටිය ඔහුගේ දෑස් අභියස දැල්වෙමින් තිබුණි. ස්ත්‍රී සිරුරුවල කැමෆ්ලාජයන් ඉරා ඉනෙන් පහළට ඇද දමා රහස් පෙදෙසේ රෝමයන් පඳුරු ‍ගසා ඇති පිරුණු කලවා සහිත විකෘති සිරුරුවල කෙලවර දෑස් ඇරී ගිය මුඛ විවෘත වූ බියකරු මුහුණු සහ කැබලි වී ගිය හිස් ගෙඩි අතර හිර වුණු පියයුරු කැබලි දැකුමෙන් ඔහු සිරුර රක්ත තප්ත වූ ලෝහ දණ්ඩක් මෙන් නැගී සිටියේය. අප සමලිංගිකයන් වූයේ ඊ‍ට මොහොතකට පසුවයි.

"මට මළ කඳන් දැක්කත් දැං නගිනවා"

අපි බංකරයේ ඇතුළු කුහරයේ නිරුවත් වීමු.

"මොකද්ද බං ‍මේ ජීවිතේ?"

මම මගේ තුවක්කුවේ බයිනෙත්තුව ගලවා අතට ගත්තෙමි. අපට දැඩි වූ ශිෂ්ණයක් ඇවැසිය. ඔහු සන්තර්පණය කළ හැකි එතරම් දැඩි ශිෂ්ණයක් මට නොවීමේ හේතුවෙන් තව මොහොතකින් මා ඔහු අතින් දූෂණය විය යුතුය.

සුරතාන්තය කෙළවර ඔහු ශුක්‍රාණු ද රුධිරය ද විදිමින් හත්වතාවක් ගැස්සී උඩුබැලි අතට වැටී නිසොල්මන් විය.
මා ජීවි‍තයේ ලද පරමානන්ද සුරතාන්නතය මේ යැයි ඔලුවේ කෙටිණි.

ඉන්පසු ගැහැණුන්ගේ සිරුරේ රාගයෙන් සිරී කැපී ගිය තුවාල සොයා පිලිසකර කරන්නටත් ස්වර්ණාගේ වැනි දහසකුත් එකක් මළ කඳන් නැවත පිළිසකර කරන්නට කුලරත්න මල් ශාලාවේ පිටුපස එම්බාම් කාමරයේ මද අඳුරේ මා ලද අනන්ත සන්තර්පණයත් යුධ පිටියේ කැබලි වූ සෙබලියන්ගේ සිරුරුවල මතකයත් මා ජිවත් කරවීය.

සමහර දවස්වල මට විදුලි බුබුලුවල ආලෝකය නොදැරිය හැකි තරම් විය. කාමරය ඇතුලේ ඉර පායා ඇති සේ කහ විදුලි බුබුල දැල්වුන සෑම අවස්ථාවකම මම එයට උඩ පැන අතින් පහර දුන්නෙමි.
ඒ සෑම විටකම මගේ ශිෂ්ණයෙන් ගලා යන රුධිරය දැකුමින් මා අනන්ත සතුටක් ලද්දෙමි.‍

ඔවුහු මා ඇඳක බැඳ [තැබූහ] තැබීය. හිසට විදුලිය [ඇල්ලූහ] ඇල්ලීය.

මම ඇඳේ බැඳී ඉන්නට ඉමහත් සේ ප්‍රිය කළෙමි. එවිට සිරුරට වඩා‍ දෙයක් මට දැනෙයි. සිරුරෙන් ඔබ්බට ඇදී ගිය සියළු අවයව දෙස මම ආශාවෙන් බලා සිටියෙමි. මුළු ලොවම මගේ සිරුරේ දිගුවක් නොවේදැයි මම සංතෝෂයෙන් කල්පනා කළෙමි. ගැහැණු රහස් අවයව ජනෙල් තිර ඇරී වැසී යන්නා සේ මගේ මනසේ නිරතුරුවම යට ඇඳුම් හැලී ගැලවී රෝම ජාලා පිරුණු රහස් මුළු වලින් පිරුණු කලවා යුගල් මුදුන් අස්සෙන් පෙනුණි. කැති ගාන කාන්තා සෙබලියන්ගේ ලේ ගලා යන සිරුරු කැබලි දසුන් මගේ අන්ධකාර පාළු ලෝකය පුරවා තැබීය.

උදේ හවස මාගේ මුවට බෙහෙත් පෙති දමන්නට එන ශර්මිලා මිස් තවමත් ජීවත් වන්නේ මන්දැයි මම ඇගෙන් විමසීමි.

ඇය මදෙස වික්ෂිපත්ව බලා සිටියාය.

"ඔයත් මැරිලා හිටිය නම් කොච්චර ලස්සන දැ"යි මම ඈට පැවසීමි.

මට ශර්මිලා ගේ සිරුර දම්පාටින් සීතල වී ඇති අයුරු මැවී පෙනුනි.

කිසිවෙකුත් විශ්වාස නොකළ රැයක ඇය මා අසල නිරුවතින් වැතිර සිටියාය. සඳ අහසේ බැබලුනි දැයි මම නොදනිමි. සඳ කිරණ හා සමාන දෙයක් ඇගේ සීතල සිරුරින් පෙරී දිස්න දුන්නේය. අප දෙදෙනාගේ ඒ මධුසමය ගත වුනේ මෝචරියේ ඇඳන් දෙකක් එකට හිප්පීමෙනි. ඇඳන් අපට නොදැනී ඈත් විය...

චන්ද්‍ර ම‍ණ්ඩලේ පුංචි සාවිය විසඥව අදත් අහසේ දිසෙයි.

වෘක්ෂ බන්ධනාලංකාර සූත්‍රය

2010-08-09T18:31:00.000-07:00

වෘක්ෂ බන්ධනාලංකාර සූත්‍රය

ලංකා නමැති දූපත් රාජ්‍යයේ සියළු රුක්හි පුෂ්පයෝ එකක් හෝ දෙකක් පිපී තිබුණි. ගස් කඳේ කවුරුන් හෝ කැමැත්තෙන් බැඳී තිබුණි. එහි නිදාන කතාව කියහු නම් මෙලෙසේ යැ.

ප්ලෝයම පටක තුළ රුධිරය ගලා යද්දී, ගස් කඳන් හෘදය සාක්ෂියේ හඩින් ලබ්ඩබ් ගාද්දී, මිනිස්සු ගස් කඳන් බදා ගෙන සිපාචාරයෙන් වැළඳ, උනුන් හා අනුරතියෙන් ඔද වැඩී, අනුරාගික ගස්පොතු ලෙව කමින් සංසාර්ගාභිමුව පිපිරෙන්නට ලං වූ යමහල් වැනිව රක්ත තප්තව, සමාධියකට වැදි ආල බසින් මන්මත්ව සිය සිල්පර කඳන් වන් වූ තොල් පටල ගස් මතුපිට උළමින් ස්පර්ශ සංතර්පණයෙන් උද්දාම ව සුරතාන්තය ලංව කෙඳිරි ගාමින් හුන්හ.

රටවැසියෝ මෙතුවක් කල් නොදැන සිටි මේ අනංගරංගය ඉගැනුමෙන් සිය සංතාප මඩිමින් ද බඩගෝස්තරය ගැන තවදුරටත් නොවැළපෙමින් ද සංසාරගත ප්ලැටොනික ප්‍රේමයෙන් උන්මාදව ද තම තම තරමට බදා වැළඳ ගත හැකි වටප්‍රමාණ උචිත ගස් කඳන් හා එතී අභිරමණ සුවයෙන් කාලය ගෙවන්නට වූහ. ජනී ජනයාගේ උල්ලාසය මෙතැනින් අවසන්යැ.

ගසකට අරක් ගත් වෘක්ෂ දේවතාවක් සිය පුද්ගලිකත්වයට හානි වන්නා වූ ද සිය දේව හිමිකම් උල්ලංඝනය වන්නා වූද මේ මනු ක්‍රියා ඉවසනු නොහී, ගස මුල වගුරන ශුක්‍රයන් හේතුවෙන් සිය අධ්‍යාත්මයට ඇතුළු වන්නා වූ ක්ලේෂයන් ද රුක් මූලයට සංසරණය වන්නාවූ එච්අයිවී වෛරස ස්‍රාවයන් ද හුදකලා බ්‍රහ්මචාරීත්වය හා බැඳුනු අනගාරික ජීවිතය ට වන්නා වූ හානියද යනාදී වූ මේ අකම්පාලයන් ඉවස ගත නොහී ඇමිනෙස්ට් ඉන්ටරනැෂනලයට අහසින් පාව ගොස් සිය දුක කියන්නට තැත් දරන්නට වන්නේය. දෙවියන් හෝ වුවද ලංකා තලයේ හෝ එසම නමින් වූ රසාතලයේ රස මංජු‍සාවේ කැලතී එන මදිරා අමපානයෙන් සිය දෙතොල ‍නොතෙමා මෙහි කුමට චෝදනා කරන්නට සපැමිණියේ දැයි වහා අසා ශක්‍ර දේවේන්ද්‍රයන් මඝ මානවක අවදියේ ලද සියුම් ප්‍රඥාවෙන් ද පූර්ව භවයෙහි නාටකීය ලෙස අත්විඳි බෝසතුන් මහෞෂධ සමයේ ලද අධිප්‍රඥාවේ පාඩම් මහිමයෙන්ද මිලින්දාදී වු ප්‍රශ්න ප්‍රකරණයේ දැක්වූ සුරුකම් ඒ කියැවීමෙන් ලත් ලාභයෙන් ද ලද ප්‍රඥා එක මොහොතින් රිවිෂන් වී රුක් දෙවිඳුන්ගේ අභිලාෂ සාධනයේ ලා දැක්විය හැකි අවම අවධානය ලෙස හෙතෙම උතුරුකරයේ භූමි භාගයක තැනවූ බොන්සායි ක්‍රමයේ ජාන ඉංජිනේරුගත ගසක පැළක් බැඳ එහි වැඩ වසන ලෙස ලද අණින් ඒ රුක් දේවතාවා A9 පාරෙන් ගොස් එ කිවු ගස සොයා මහත් අකරතැබ්බ ඉවසා සිය විමානය තනා ගෙන ජීවන වෘතිය වදාරන්නට විය. එම ඇතුලු නුවරට ගොඩවන බිහිදොර රැකවල්ලා සිටි රාජපුරුෂයන් විසින් දේව සංහතියේ පළමු වතාවට දෙවියකු ගේ කේෂාන්තයේ සිට දෙපරන්ද හරහා පාදාන්තයට පරීක්ෂා කොට වෘෂණ මංජුසාව හෑන්ඩ්ග්‍රෙනේඩයක් මෙන් සියුම්ව මිරිකන්නට යාමෙන් එබන්දක් එතැන නොවීමෙන් රාජපුරුෂයෝ දෙවි දේවතාවුන්ට මනුස්සයින්ට මෙන් ප්‍රජනන අවයව නැති බැව් දැන ගෙන උස් හඩින් සාධුකාර දී ඇතුළු නුවරට තුවක්කු කුඩුම්බියෙන් ඇන තල්ලු කළ හෙයින් දෙවියන්ගේ උල්ලාසය ඉන් නිමා වේ.

ලෝක ධාතුව තාප කරණය ට ලක් කරන්නාවූ කාබන් ඩයොක්සයිඩයන් ද මුලිනුපුටා දැමීමේ සද්කාර්යය සාධනය පිණිස පරිසර හිතකාමී යහජීවනය උදෙසා ද සියළු රුක් මිනිසුන් විසින් බදා වැළඳ සියළු කල්හි කෘතගුණ දැක්විය යුත්තේය යනාදී ‍වශයෙන් ද ගස් හා සංසර්ගයෙන් එම ගස් සංතර්පණයෙන් ආල වැඩිය යුතුය යන්නාවූ විශ්ව ධර්මය ලෝක ධර්මය පිණිස රටින් රට පුරෙන් පුර වීදියෙන් වීදිය කඩබක්කියෙන් කඩබක්කිය කනින් කන රැව් දෙවනු පිණිස ධර්ම යාත්‍රාව පිණිස එක් මුසොල්මානුවෙක් සිය කැමැත්තෙන් ගස් බැඳ ලන්නට කැමැත්ත දැක්වූ ශිලා ලිපියක් දැවැන්ත කුළක් මත කර එම කුළ ලෝකවාසී මනුප්‍රජාව වෙත ප්‍රදර්ශනය පිණිස රූපවාහිනී චැනල ද ශබ්දවාහිනී ගුවන් විදුලි චැනල ද අන්තර්මහාද්වීපික අන්තරජාල බහුරුකෝලමින් ද ප්‍රචාරණ කටයුතු සැණින් දියත් කළ මහාමාන්‍ය මැතින්දෙක් වහා ක්‍රියාත්මක වූයෙන් පරිවාර රාජමන්ත්‍රිකයෝද එමග ම ගත්හ. රාජ මන්ත්‍රී උල්ලාසය ද එලෙසම සමාප්තය.

කොසොල් රජ දුටු සීනයක් බඳු වූ මේ සාකල්‍ය පරිකල්පිත මනෝ වේදිකාව වචනයේ පරමාර්ථය ඉක්මවා සැබෑ වූයෙන් ලාංකීය ග්‍රාමයක එක්තරා අවැඩක් සිදුවුනැයි කටින් කට කටකතා පැතිරෙන්නට වූයෙන් සකල විධ මාධ්‍යකරුවෝ වහා රජගෙදර වටළා එහි බිහිදොර බිඳ රාජ සයනාගාරයට වන්නෙන් රාජේන්ද්‍රයාණෝ ඉමහත් තැති ගැන්මෙන් යුතුව මාධ්‍යකරුවන්ගෙන් මෙලෙස විචාරන්නට වූහ.

"තොප කුමන ආරවුලක් හේතුවෙන් මේ අනිච්චාවේ මාගේ යහන් ගබඩාව වටලන්නේද? "

"ලංකීය පොලෝතල භාරකරුවාණෙනි. ලංකා ඝන නාථයෙනි. අප මෙතැන තොප යහන් වටලා තොස නොවන්නේය. කිමදැයි අර මුසොල්මානුවා ගස් බැඳ ලූයේ දැනගනු රිසියෙනි මේ අස්ථාන චාරිකාව. "

"අහා! එම්බා මාධ්‍යකරුව. තොප නොදන්නෙහි ද පරිසරය වටපිටාව තොරම්බල් වීමෙන් රටවැසියන් විඳින ආරෝව? ඊට හේතු කිමදැයි කේවට්ටයන් නහුතයක් විමර්ශන- පර්යේෂණ- සමීක්ෂණ- විචාරක වාර්තා අනුසාරයෙන් සොයා ගෙන ඇති බව තොපි නොදත්තහු ද? සියළු ගස්හු ලැජ්ජාවෙන් තැවී ඇත්තාහුය. උහු විරැකියාවෙන් පෙළෙන උපාධිධාරීන් මෙන් කම්සැප විරහිතව ගර්හිතව ඇත්තෝය. ගස් අරක් ගත් සියළු දෙවිදේවතාවෝ එනයින් කණස්සළු වන්නට පටන් ගෙන ඇත්‍ තෝය. දෙවියන් කෝප කොට කුමන සංවර්ධනයක් ද පත්‍ර සගයිනි? එනයින් ම විසින් චක්‍රලේඛයක් විහිදා ඇත්තේ පහුගිය ජුලයි මාසයේ ජලවක චන්ද්‍ර මාසා දින ව්‍යතිපාත යෝගයෙන් විෂ්ටි කරණයෙන් ශුක්‍ර හෝරාවෙන් රවි පංචම හෝරාවෙන් සියළු මනුසතුන් විසින් ගස් වන්දනාමාන කරනු පිණිසත් පසඟ පිහිටුවා ගස් වැඳීමත් තත්ක්ෂණ කාලයක් ගසකට බැඳී සිටීමත් හැකි සෑම විටකම රූක්ෂසයන් හා රමණගත වන්නටත් රාජනියෝගාදියෙන් වෘතපූරණව ක්‍රියාත්මක කරවන ලෙසිනි. දැන් බලව. රටේ සමෘද්ධිය ඉස්තීරය! දෙවියන් සංතෝෂයෙන් අමා ඵලය ලකට පහල වනු ඇත. කේතුමතිය පොලෝතලයෙන් මතුවනු ඇත. සුරභිදෙන අරලිය මන්දිරයට නැට්ට වනාගෙන පිඹගෙන පිම්මේ එනු ඇත. එසේ වූ කල නුඹලා කුමන ආරූඨයකින් මා යහන් ගබඩා අසල නිදි වරවු ද?"

"ඔහෝ! රාජෝත්තමයිනි, ඔබගේ අසදෘශ නුවණ! දිඝායූ වේවා මහරජුනි, දීර්ඝායු වේවා!! අපි දු වහා ගොස් අසළ ඇති ගස්වල බැඳී රමණගතව එ ගස් අරක් ගත් දෙවිදේවතාවුන් ට ද ට්‍රිබලැක්ස් පෙන්වා උන් අක්ෂි සතපා -සංතර්පණයෙන් අපගේ සියළු දොස් වහා දුරු කර ගන්නෙමු. "

විද්‍යුත් අවිද්‍යුත් සර්වලෝක මාධ්‍යකාරකයන්ගේ උල්ලාසය ද එලෙසින් සමාප්ත විය.

ක්ලෝප්‍රොමයිසින් තීන්ත කුප්පිය

2010-07-28T21:34:00.000-07:00

"මම උඹව දික්කසාද කරන්නේ නැහැ. පුළුවන් දෙයක් කරපං."

ඔහු දුරකතනය විසන්ධි කළේය. ඩිස්පෙන්සරියේ දොරගුළු ලෑවේය. මෝටර් රථය තුළට වන්නේය.රිය පණ ගැන්විණි.
මොටෝරිය සීඩී ධාවකයේ තැටිය මතින් සීටී ප්‍රනාන්දු සිය මධුර ස්වරය අවදි කරයි. තාර පාරේ අඳුරු වාටි අස්සෙන් සීටී ගේ රුව මතුවෙයි. සුමධුර හඩ රිය ඇතුළ සනීප කුෂන් මතුපිට හැපෙමින් කන් පුරවයි.

"මා කුඹුරේ සිට මුළු දවසේ
දෑත දෙපා වෙහෙසී
පැලට යන්නෙමි මම මගේ
සැන්දෑ වුනා සුහදේ "

ගීතය මාරු වේ.

"සාගරිකා ඔයා අද ඩියුටි ද? ඔන් කෝල් ද ආ...නැද්ද? හරි....ආ එහෙනම් ඔයා එන්න ෆුඩ් සිටි එකට. මම එනවා එතනට. මට විනාඩි හතලිස් පහක් දෙන්න..."

සැන්දෑව අහසේ දළුලමින් වැඩෙයි.

"අමතන්නට හැකි බසක් සොයා
හැඟුම් කියන්නට වදන් සොයා
ඇවිදින විටදී දිවි කතරේ
ඊයේ දුටු ලොව වෙනස් වෙලා

බාල වියේ දුටු කුරුල්ලන් කෝ
බාල වියේ දුටු හඳ තරු කෝ
ඒවා කොතැනක සැඟවී දෝ
මා සිත රන් රූ කෝ"

"මචං ජීවිතේ මට එපා වෙලා... කිසිම දෙයක් කරගන්න හිතට නිදහසක් නැහැ. අරකි අදත් ෆෝන් එකෙන් වලි. ඩිවෝස් ඉල්ලනවා... බලහං මගේ එක්සෑම් එකත් ඇනිලා ...කවද මේ කරුම විභාග ඉවර කරගන්නද මචං... මම පීපී එකත් වහල දැම්මා. ලෙඩ්ඩු බලන්න තියා මට හිටගෙන ඉන්නවත් පණක් නැහැ...ඔළුව ඔද්දල් වෙලා... අද රෑට මම එනවා උඹේ ක්වාටස් එකට...සාගරිකා එක්ක ... අවුලක් නැහැනේ...? හා ... එහෙම ද ... හොඳයි මම ඇවිත් යන්නම්...හරි හරි..."

"සියොතුන් නැහැ තවමත් ඇහැරී
ගී හඩ යන්නේ නැහැ පැතිරී
ගංගා නැවතී කඳුරැලි වියලී
සැමරුම් සිතුවම් ඇත තනි වී"

සැන්දෑ අහසේ අවසන් හිරු රැස් දහර මුහුද මත පුපුරා යයි. තාර පාර ඔහුගේ ද්‍රෘෂ්ටි සීමාවේ පසුපසට අනවරතයෙන් ඇදී යයි.

ලයිට් කණු... ලයිට් කණු.... ලයිට් කණු....

ලයිට් කණු පෙළින් පෙළ පසු පසට පැයට සැතපුම් හැටක වේගයෙන් ඇදී යයි.

""
මට දොස්තර කෙනෙක් වෙන්න බැහැ අම්මේ...මම ආස ලියන්න......මට ආට් කරන්න දෙන්න...මට මේ ලෝකය වෙනස් කරන්නයි ඕන...කවද හරි මම දොස්තර කෙනෙකුට වඩා මිනිස්සුන්ට උදව් කරන උන්ගේ අසනීපවලට බෙහෙත් කරන මිනිහෙක් වෙන්නත් පුළුවන් තාත්තේ...ප්ලීස් මට බයෝ කරන්න බල කරන්න එපා අම්මේ....මට ලේඛකයෙක් වෙන්න දෙන්න..."
"බයෝ බයෝ බයෝ බයෝ .... හා......හාාාාාාාාාාාාාාාාාාාා"

"දහසක් මිනිසුන් ඇත ගොළු වී
මග පෙන්වන එළි ඇත මැලි වී
සංකා උපදී බියකරු දිවියේ
උණුසුම් සැනසුම් නෑ මතුවී"

මේසය මත වූ චිත්ත පීඩනයේ ප්‍රතිවිෂ හෙවත් ප්‍රති-චිත්ත සහනය රැගත් නිල් පැහැති ක්ලෝප්‍රොමයිසින් පෙති අහුරු මත අඩක් වැසුනු ජනේලයේ විවරයෙන් බිඳී ආ වැහි වතුර ජල කැට වැටීමෙන් අර්ධ ලෙස දියවී නිල්ල සොයා අක්වක් ගමනක යෙදුන ගංගාවක් ඇඳී තිබුනි. එම නිල් දියර ගංගාව කුඩා කැබිනෙට්ටුවට පහතින් වූ තෙපාවක් මත රැඳි හීරෝ තීන්ත කුප්පියකට බිංදුවෙන් බිංදුව වෑස්සේ. වැස්සට පසු අහසේ කාන්තිමත් දීප්තිය මල් වීදුරු ඵලකය මත සූක්ෂම හිරු තරු දහසක දිස්න දේ. හිරු රැස් කෙඳිති අරීයව විහිදෙයි. ආලෝක කේතුවක් අස්සෙන් ඇස නාභිගත නොවන ලක්ෂ්‍යයක් මැවී යයි.

ක්ලෝප්‍රොමයිසින් තීන්ත කුප්පිය පිරී යයි.

පැරණි ලේඛකයාගේ සියළු සිතුවිලි තීන්ත කූඩුවේ නීල වර්ණිත ද්‍රාවණයේ දියව පැවතුණි. ඒවා උල්පත් පෑනෙන් මතුවී කඩදාසි මත ඉහිරීමෙන් ඔහුගේ මනසේ ඇදුම් දුන් ආතති, තීන්ත රේඛා ඔස්සේ කඩදාසි මතුපිට හෑරී ගියේය.
වසර දහස් ගණනකට පසු, වසර මිලියන ගාණක් තිස්සේ ගංගාවක් පෘථිවිය මතුපිට ඇදී යාමෙන් ගංපතුල සේදී අඛණ්ඩව පාංශු ඛාදනයට ලක් වීමෙන් මහ පොලොව දෙබෑ වී, ටෙක්ටෝනික් පිඟන් තල පිපිරී- ඉරිතලා- කඩතොළු වී ගංගාව අතුරුදන් වෙද්දී හෙතෙම එම පොලෝ කුස්තුරයෙන් නැගිට්ටේය.

ඔහු මතුවන විටදිත් තාර රේඛීය ලකුණු වලින් සහ එම තාර ලකුණු ඔස්සේ කොන්ක්‍රිට් කණුවලට ගැට ගැසුණු විදුලි කම්බි ජාලා විසින් මහ පොලොව බෙදා ඉරි ගසා තිබුණි. අහසට නැගුනු විට එය එකම එක මකුළු දැලක් මෙන් ඔහුට දිස් විය. ඔහුට එම තාර රේඛා ඔස්සේ ඇවිද යන්නටත් තාර රේඛා ඔස්සේ දුව යන යකඩ ගොඩවල් දැක ගැනීමටත් හැකි විය. එම යකඩ ගොඩවල් නැගූ හඬ මෙන්ම නොයෙක් ආම්පන්න විසින් නිමැවූ විවිධ සංඛ්‍යාත පරාසයන් හි විහිදුනු ශබ්දවලින් වායුගෝලය පිරී ගොස් තිබුණි. ඒ හඬවල් හැර වෙන කිසිදු හඬක් ඔහුට අසන්නට නොහැකි විය. යකඩ ගොඩවල් අනවරත චලිතයක යෙදුනේ කිසිවකුගේ දැනුමකින් අතපෙවීමකින් තොරවය. එබඳු යකඩ ගොඩවල් පසුගිය අවුරුදු දහස් ගණනක් තිස්සේ දුම් පිට කරමින් එම තාර මං පෙත්වල ගමන් කිරීමේ හේතුවෙන් එම ද්‍රව්‍ය නුවණක් ලබා තිබුණි. ද්‍රව්‍ය ඥානය අත්කර ගෙනි තිබුණි. ඔහු මෙන්ම සිතීමේ හැකියාව නමැති රෝගයෙන් එම යකඩ ගොඩවල් ද පෙළුණේය.

පදාර්ථයේ සූක්ෂම තත්වය ඇතුලේ පැවතුනේ හිස්කම බැවින් ඒ හිස් අවකාශ අතර "තනිකමේ විෂ" පැතිරීමෙන් ඔහුගේ හිසෙහි තනිකම දළුලන්නට විය. තනිකම නම් වූ විෂ විශ්වයේ ඈත කෙළවරත්, මෑත පදාර්ථය ඇතුළතත් සිය ප්‍රමාණයේ හැකිළුම සහ ප්‍රසාරණය නම් වූ ජාති ගතිගුණය හේතුවෙන් සමතලව පැතිරී තිබුණි. කිසිදු හිතන දෙයකට ඉන් ගැලවීමක් නොවුනි. යකඩ ගොඩවල් තාර මතුපිට පෙරළි පෙරළි, තනිකම නිවා ගැනීමේ අපරිමිත තාපයෙන් සහකරුවකු සොයා යාමේ චලිතයේ අඛණ්ඩව යෙදුණි. ඉන් සමහරක් මුහුද ආශ්‍රිත තැනිතලාවල මළකඩ නමැති පෙම්වතියන් හමුව ඔවුනොවුන් ප්‍රේමයෙන් වෙලී එකිනෙකා ගිලගනිමින්- දිරා යමින්- ජරාවට පත්කරගනිමින්- සියදිවි හානි කරගැනීමේ ප්‍රීතියෙන් මත්ව වැතිර සිටියහ. ගස්වලින් උනා, පීඩන අච්චු අස්සේ තෙරපී, හැඩව, කම්බි වයර් කෂේරුකා ද වෘත්තාකාර අස්ථිපංජරද ලත් රබර් ටයර්, මළකඩ හා පෙමින් බැඳීමෙන් එකිනෙකා හා එතුවක් බැඳී හුන් සහකරුවන් සොයා යාමේ ඒකායන පරමාර්ථ අමතකව ගොස් ඇති යකඩ ගොඩවල් දෙස, සුසුම් හෙලමින්, උන්ගේ අයෝමය ශාරීරික මෛථුනයන් විසින් උපදවන ලද කම්පන දරමින් පොලොවේ පස් කාගෙන වැළපෙමින් උන්හ.
ඔහු ඇවිද යන්නට විය.

හිරු බැසීමක් හෝ නැගීමක් නොවීය. සඳ වතුර ගලා යන රාත්‍රිය හෝ නොවීය. ඒවා අහසේ දිරාපත් වෙමින් පැවතුනි. අනන්ත කාලයක් ති‍ස්සේ ආකාශයේ එකිනෙකා ලුහුබඳිමින් හුන් ඉරත් හඳත් එකතු වී නශ්ටකාමයෙන් පරිපීඩිතව, ඔවුනොවුන් අතරක් නැති සර්වකාලීන ආශ්වාදයක් සොයමින් අනංග රංගනයේ යෙදුනි. අහස මැද අනඟ සක්වලක් කරගත් සූර්ය දිව්‍ය රාජ තෙමේ ක්ෂීරපථය වැසී යන තරම් ශුක්‍රාණු වගුරමින් අහස් ගංගාවෝ ඉවුරු දෙ‍දරවමින් අභ්‍යාවකාශය පුරා නන්නත්තාර කරවමින් හැසිරෙනු සාමාන්‍ය දෙයක් බවට පත් වී ඇත. මේ සියල්ල සාක්ෂි වීම පිණිස පමණක් ඔහු නැවත පෘථිවි තලයට එවා ඇත. අසරණ ලේඛකයා ඇවිද යන්නට විය.

පාර අද්දර නාම පුවරුවකි. ඔහු එතැන මොහොතකට නතර විය.

ඔහුට පරිගනකයක් සහ නමක් ලැබුනි. පරිගනකය ඔහු වෙනුවෙන් සිතීමටත් , නම ඔහු වෙනුවෙන් පෙනී සිටීමත් ස්වේච්ඡාවෙන් ඉදිරිපත් විය. වචන වලට ජීවය තිබුණි. ඔහුගේ කා‍ලයේ දී මෙන් වචන වල සංයෝගයේ උපරිමය කාව්‍ය වූව ද මේ යුගයේ දී එහි නිම්වළලු පුළුල් කර සිය ශක්තිය අපරිමිත ලෙස වර්ධනය කරගෙන තිබූ බැව් ඔහුට ක්ෂණයකින් පසක් විය. වචන මැතිරීමෙන් ද්‍රව්‍යය ද ද්‍රව්‍ය පිරිමැදීමෙන් වචන ද උපදින බැව් ඔහු වටහා ගත්තේය. අධික ශක්තිය උපදවන යමහල් න්‍යශ්ටික බලාගාර බවට පත්කොට තිබුනේ වචනවල බලමහිමයෙනි. සාගර පතුලේ සැඟව ගිය මිනිස් අත් කිසිදා පහස නොලැබූ ලෝකයේ අවසාන මහා තෙල් සම්පත් ගොඩ ගැනීමට තාක්ෂණය නිපදවා ගත්තේ වචන භාවිතයෙනි. වචන භාවිතයෙන් හිරු අසලින් ගමන් කරන ආලෝකය නැමී ගමන් කරන බවත් ගුරුත්වය කියා දෙයක් නොමැති බවත් පවතින්නේ අවකාශයේ වක්‍රවීම් බවත් පෙන්වා දුන්නේය. අවුරුදු සිය ගණනකට නොසෙල්විය හැකියැයි පුරසාරම් දෙඩු රජ පරම්පරාවක් අවුරුදු හයකින් මිහිපිටින් වඳ කරන ලද්දේද වචන වල තිබූ අනුහසිනි. ලේඛකයාට මහා විශාල ආඩම්බරයක් දැනුනි. පයට පෑගෙන තෘණ පත් ගල් බොරළු පවා ඔහුට අමතන්නටත් සිය අතීත කතා- අත්දැකීම් දෙසන්නටත් විය.

කලකට පෙර ඔහුගේ සියළු සිතුවිලි විදුලි කම්බි දිගේ ඉහල පහල යමින් කම්‍පනයේ යෙදුනි. ඒවා පරිගනකයේ අකුරු පුවරුවේ ඇඟිලි තුඩු මතින් ගිලිහී ගිය සූක්ෂම පීඩනයන් ඔස්සේ විදුලියෙන් කිතිකැවී තිරය මත සටහන් වෙමින් ඔහුගේ මනසේ රසායනික ගැටුම් ඔස්සේ හටගත් විදුලි සංඥා- මල් වෙඩි -පික්සල් ලාංඡන- අවසානයේ බයිට් ශ්‍රේණි බවට පරිණාමය විය. එවා පදාර්ථයේ සියුම් අංශු අස්සේ සැඟවුනි. පදාර්ථ සිතීමේ ක්‍රියාවලිය මෙනයින් උගත්තේය.
ඔහුට කුසගිනි දැනුනි. යකඩ කැබැල්ලක් තුනට හතරට නැවී කුඩා අලගෙඩියක අසමමිතික හැඩයක් ලබාගෙන ඊළඟ මොහොතේ ගෝලයක් ලෙස දිස්න දී රතුපාට ගෙඩියක් බවට පත්වූයෙන් ඔහු එය වහා හපා කෑවේය.

"ඔව් ඒ ඇපල්ම තමයි!"

ඔහු රතට රතේ ඇපල් ඇටයක් චරස් ගා හපා බැලීය.

ජීවය සහ අජීවය අතර බෙදුම් රේඛා වියැකී ගොසිනි. ජීව දේ අජීව දේ බවටත් අජීව දේ ජීව දේ බවටත් එකිනෙකා පරිවර්තනය කර ගැනීමේ හැකියාවෙන් එම සියළු ද්‍රව්‍ය දියුණු තත්වයට පත්ව සිටියි.
අවසානයේ මේ ඛේදනීය රස පොලොව මත මනුෂ්‍ය පෙණහැල්ලකින් වාතය අපවිත්‍ර කරමින් හුන් එකම වස්තුව ඔහු නොවීය.

ඔහුට ගොළුවකු හමු විය. ඔහුට කිසිදු භාෂාවකින් ආමන්ත්‍රණය කළ නොහැකි විය. ගොළුවා පරිගනකයේ බොත්තම් ඔබමින් ඔහු හා කතා කරන්නට සූදානම් විය. ගොළුවා මීට පෙර අවස්ථාවේ එතැනින් ඇවිද ගෙන යද්දී ගල් කුළක් වී සිටි බව ඔහුට මතක් විය. ශෛලමය පාෂාණයක් බවට වෙස්වළා සිටි ගොළුවා ඔහුගේ ලංවීම හේතුවෙන් ප්‍රකම්පනය වූ ගුරුත්වය හේතුවෙන් මිනිස් වෙස් ගෙන සිටියේය.

ගොළුවා සෙමෙන් සෙමෙන් යම් යම් දේ යතුරුපුවරුවෙන් සටහන් කරයි. බොහෝ කල්පනාවේ නිමග්න වෙයි. "හා හරි" කියන්නා සේ අභිනයක් පා කිසිවක් මතක් වූවා සේ යළිත් යතුරු පුවරුවට නැඹුරු වෙයි. පරිගනකයේ සංකේත ලේඛකයාට නුහුරුය. ඒ කිසිදු සංකේතයක් මින් පෙර දැක නැත. ගොළුවා එක දිග‍ට බොහෝ දේ යතුරුලියමින් සිටියි. ඒ කිසිවක් ඔහුට නොතේරෙයි. ඔහු ගොළුවා දෙස බලා සිටින්නට විය. ගොළුවා ඔහු දෙස බලා පරිගනක තිරය දෙස බලා මුවින් ඉඟි කළේ එම සංඥා කියවන ලෙසය. ඔහු දෙපසට හිස වනා තම නොහැකියාව පැවසූ විට ගොළුවා අහස දෙස බැලීය.

ඔහු ද අහස දෙස බැලීය. දෙදෙනාම අහස දෙස බලාගත් වනම ටික වේලාවක් කල්පනාවේ නිමග්න වූහ. අහසේ හිරු තවත් රමණයකට සූදානම් වනු දකින්නට ලැබිණ.

ඔහු ගොළුවාගේ අත්ල සියතින් අල්ලා ලංකර ගත්තේය. එම අත්ලේ සියුම්ව ඇඟිලි තුඩ මෙහෙයවා රහසිගත භාෂාවකින් මෙන් "අ"යන්න ලියා ගොළුවාගේ මුහුණ දෙස බැලීය. ගොළුවා සිනහ පා නැවත ඔහුගේ අත්ල ගෙන එමත "අ"යන්නක් පිළිතුරු ලෙස ලිවීය.

දෙදෙනා ඉමහත් සංතෝෂයට පත් වූහ. ගොළුවා ද සිංහල දනී. ලේඛකයා ද සිංහල දනී. එනමුත් ලේඛකයාට වචන මතක නැත. ඔහුට ගොළුවාට කීමට කිසි දෙයක් ඉතිරිව නැත. ඔහු හැමදේම ලියා අවසන් කොට තිබුණු හෙයින් ඔහුට තව දුරටත් ලිවීමට හෝ කීමට කිසිවක් ඉතිරි වී නොතිබුණි. ඔහුට ප්‍රත්‍යක්ෂ වූ මුළු විශ්වයම එකම හිස් තැනක් සේ හැඟුණි.

ලේඛකයා එතුවක් ලියා ඇති දෑ කොතරම් විගඩම් දැයි නැවතත් මේ ලෝකයේ ප්‍රාදූර්භූත වීමෙන් හෝරාවක් යන්නට මත්තෙන් ඔහුට සාක්ෂාත් වන්නට විය. ගොළුවා කථනයෙන්- සිතීමෙන් බැහැරව වල්පල් පරිගන‍කයේ ලියමින් සිටින්නේ යැයි ලේඛකයාට සිතුණි.

මේ තාක්ෂණික හරඹ සිදුවී ඇති යුගයේ ගොළුවකු ගේ පැවැත්ම ඔහුට අදහන්නට ද බැරි විය. ලේඛකයා අමුතුවෙන් වචන සොයා ගෙන මේ දුරවබෝධ කාරණා ගොළුවා ගෙන් විමසන්නට විය. ඔහු ගොළු වීමේ හේතුව ඔහුගේ පැවැත්මට කිසිදු වචනයක භාවිතයක් නොතිබීම හේතුවෙන් ඔහු ඒ සියල්ල පන්සලකට පූජා කිරීමේ නිසාවෙනි. පසුව ඔහු දැනගත්තේ ගොළුවා බෞද්ධයකු බවත් ඔහු නිවන් මගට අවතීර්ණව ඇති හෙයින් සංඥා පද්ධති කිසිවක් ඔළුවට දාගැනීමෙන් සිය මොළයේ පදාර්ථයන් ඇතුලේ අනවශ්‍ය රසායනිකයන් හට ගැනීමෙන් තමන් උපදවා ගත් ධ්‍යාන නම් වූ අවම රසායනික ප්‍රතික්‍රියා පවතින මොළයේ ජීවමය කොටස් ඒවායෙන් පිරී යාමෙන් එම ධ්‍යාන හානි වන බවත්ය. ඔහු ඇස් ඇරීම පවා මුලින් ප්‍රතික්ෂේප කළ අතර ඔහුගේ බලවත් පෙරැත්තයෙන් ඔහු එක ඇසක් විවර කර ඔහු හා කිසියම් අවම සංඥා අනුක්‍රමයකින් මේ අදහස් හුවමාරු කරගත්තේය. ඒ වන විට පරිගනකය අකර්මන්‍ය වී පාද රාශියකින් යුතු හැකරැල්ලකු බවට පත්වී සිටියේය. ඒ අතරතුර ඔවුන් වඩාත් සන්නිවේදනයේ යෙදුනේ සිය සිරුරු මතුපිට ස්පර්ශයෙනි. ශරීර මත ලියා ගැනීමෙන් අදහස් හුවමාරු කර ගැනීම විප්ලවවාදී කුඩා කණ්ඩායම් විසින් "දෙනුවන් වැසූ රාත්‍රියේ සිර කුටියේ" ලද පුහුණුවකුත් "සුවඳක් ලෙසින් පැටලී එන්න මේ මඳ සුළඟේ" යනාදී වූ බලවත් වචන එක්තැන් කිරීමෙන් නිපදවා ගත් මන්ත්‍ර සිතින් උච්ඡාරණයෙන් ලද අසහාය ශාස්ත්‍රයකි.

ගොළුවා කවදාවත් කතා නොකර සිටි හෙයින් ඔහුට කීමට සියල්ල ඉතිරි වී තිබුණි. ඔහුට විශ්වය මහා දෙයකි. මහ පොලොව එහි මතුපිට දැකිය හැකි සියළු දේ විස්මයෙන් පිරී පැවතුනි. ඔහු සියළු දේ සඳහා නාම පද ලියා ඒවා අයත් වස්තු මත සටහන් කර තිබුනි. ඒ කිසිවක් සිය මතකයට නොගන්නට වෑයම් දරා තිබුණි. නමුත් ලේඛකයා හමු වීමත් සමග ඔහුට ඔහුගේ හදිසිය නිසා තමා සතු වූ සියළු වාග් කෝෂය පන්සලට පූජා කිරීමෙන් ඔහුගේ සිත හිරිවැටී ඇති බව දැනුණි. නිර්වාණය අද්දර මෙතරම් හිස් යැයි ඔහු කිසිදිනෙක සිතා සිටියේ නැත. ලේඛකයා ගොළුවාගේ සිරුර මත සිය ඇඟිලි තුඩු මෙහෙයවමින් තව තවත් සංවාදයේ යෙදෙමින් ඉන්නට විය. විශ්වයේ සියළු රහස් ඔහු වෙත එමින් පැවතුනි. වචන නැති තැන සියළු දේ පවතී යැයි ඔහුට සිතුනි.

කොග්ගල ආසන්නයේ මුහුද අද්දර කළු ගලක් අසල දෙදණින් වැටී එම පර්වතයට සිය වෙද නලාව තබමින් එහි පෙණහළු පරීක්ෂා කරමින් සිටි වෛද්‍යවරයා ගාලු පාරේ එම මොහොතේ ගමන් කරමින් සිටි බොහෝ අය දකිමින් සිටි අතර ඔවුන් අතරින් කීප දෙනෙක් මේ ඔවුන් නිතර යන පුද්ගලික ඩිස්පැන්සරියේ දොස්තර මහතා බව දැන වහා ඔහුගේ මිතුරු වෛද්‍යවරුන්ට පණිවිඩ යැවීමට උත්සුක වූයෙන් එතැනට පැමිණි ගාල්ල රෝහලේ වෛද්‍යවරු දෙදෙනෙකු විසින් ඔහුව වත්තං කරගෙන ඔවුන්ගේ වාහනයට දමා ගෙන පි‍ම්මේ රෝහල වෙත යන්න විය.

"මාව අතෑරපියව් යකෝ... උඹල හිතං ඉන්නේ ඒක කළු ගලක් කියලද?"

ලිඟු බිත්තිය

2010-04-28T21:00:00.000-07:00

ඇය ඉමහත් පීඩාවෙන් සිටියාය.

ඇගේ සර්වාංගයම තෝන්තු ගතියකින් පෙලෙන්නේ යැයි ඇයට සිතුණි. ඉරිදා උදෑසන පුවත් පත ඇගේ ආලින්දයේ කනප්පුව මත තබා ගොස් තිබුනි. ඇය පිටු කීපයක් දිග හැර පිටුවල තිබූ නොයෙකුත් පින්තූර බලමින් සිටින්නට වන්නී නොයෙකුත් ගැහැණු පිරිමි සිරුරු මතුපිට රේඛාවන් විවිධ කෝණවලින් ඩැහැගත් ඡායාරූප ඇගේ සිත කිතිකවනු දැනෙන්නට විය. ඒ සියළු රූප රේඛා කිසිදු වැදගැම්මකට නැති ‍රසකළ කොන්ඩම් සින්තටික් යට ඇදුම් තට්ටය නැති කරන ඖෂධ අප්‍රාණිකත්වය නැති කරන බෙහෙත් පැය ගණන් මෝචනය වළක්වන බාම් වැනි දේ සමග ගැට ගසා ඇත්තේ ඇයි දැයි ඇයට නිනව්වක් නොවීය. උඩින් පල්ලෙන් අකුරු අතර කිසිවක් නොකියවූ ඇයගේ ඇස් එකවර අඟලේ අඟලේ හමාරේ ප්‍රමාණයේ ඉතා කුඩා දැන්වීමක නතර විය.

ලිඟු බිත්තිය
විමසන්න 0777-718889

ඇය ජංගම දුරකතනය දෙස මොහොතක් බලා සිටියාය.

ජංගම දුරකතනයේ අංක පුවත්පතේ දුටු අංක මෙන්ම එබී ගියේ ඇගේ මුදු මොළොක් අතැඟිලි තුඩුවලිනි. ඇගේ අතැඟිලිවල සුමුදු මුදු ගතිය තෛලමය සොබාවය නිසා දුන් දිස්නය ඇගේ ජංගම දුරකතනයේ ප්ලැටිනම් මුහුණත හා නොදෙවෙනිව බැබළුණි.

ප්‍රින්සි සිය දෑත් කළු සුදු ඩොනල්ඩ්ස් ඡායාරූප තහඩුවේ මීට වසර දොළහකට පෙර මිය ගිය සිය පියාගේ වම් අතින්ද තවමත් ඈ සමග වාසය කරන මහළු මවගේ අතීත යථාවක් වූ තාරුණ්‍යයේ සිට වත්මනට ශේෂ වූ සුරතින්ද සීරුවෙන් මෑත් කරගෙන ඒ සියල්ලන්ටම පසුතලය සැපයූ ස්ටුඩියෝවේ පසු පස වූ අළු පැහැති තිර‍ය පිටු පසට සෙමින් පසු බා ගියාය. ඩොනල්ඩ් ඡායාරූප ශාලාවේ තරප්පු පෙළින් බැස මහ පාරට ආ ඈ සීරුවෙන් ලං වූයේ දුරකතනයේ කෙළවර තරුණිය කියූ පරිදි මැක්ලෝරීන් පාරේ වාහන තදබදය අස්සෙන් තැනින් තැනින් හොල්මන් සේ මතුව මැකී යන උස ගොඩනැගිලි මුදුන් පසු කරද්දී හමුවන නොඋස් නොමිටි සිංහාරා කැෆේ ගොඩනැගිල්ලේ අයිනක වූ කුඩා කාර්යාලය වෙතය. ප්‍රින්සි යද්දීම ඇගේ නමින්ම ඈ අමතා එම කාර්යාලයේ අඳුරු වීදුරු දොර ඉදිරියෙන්ම හුන් චීන පෙනුමැති තරුණිය ඇය කැඳවා අභ්‍යන්තරයට යන්නට වූයේ අතිශය ප්‍රියංකර සිනාවකින් මුව සරසාගෙනය. චීන යුවතියකගේ සිනහව දොරකඩ අලවා තිබූ විචිත්‍ර සිතුවමක් විය.

එය විශාල රූපලාවන්‍යාගාරයකි. කාන්තා රූසපුව ඇල්ෆබැටික ලෙස මුල සිට අගට කේෂාන්තයේ සිට පාදාන්තය දක්වා සිමියුලේක්‍රයක් බවට පත් කර දෙන්නට එම රූපලාවන්‍යාගාර ශිල්පියෝ සමත් වෙති. තම ආත්මයේ සැහැල්ලුව රූපයකට පරිවර්තනය කර එම රූපය සිරුරේ තැනක තීන්තෙන් ලියා ගැනීමෙන් සිරුරත් ආත්මයත් යාවන දොරටුව කරා ගමන් කිරීම අතිශය පහසු වන බව ප්‍රින්සි දැන ගත්තෙන් ඈ ඇගේ නිතඹ මතුපිට ඇ‍ගේ ආත්මීය සැහැල්ලුවේ සංකේතය පච්චයක් බවට පත් කරන්නට ඉඩ දී මුනින් අතට වැතිරී නිසොල්මනේ සිටියාය. එම තීන්තෙන් ලියා ගැනීම ඇයට අතිශය වේදනාබරය. ප්‍රින්සි කීප වරක් සිය සිරුර ගස්සා අපහසුව මග හැර ගන්නට උත්සාහ දරන්නී ඇගේ පච්ච කොටන්නිය සිය භාවනාමය චිත්ත ඒකාග්‍රතාවය බිඳ ඇයට කාරුණික වදනක් පවසන්නට එය අවස්ථාවක් කර ගත්තීය.

"ප්‍රින්සි, ආත්මයේ සැහැල්ලුව සිරුර මත ප්‍රක්ෂේප කරගැනීම වේදනාබර අත්දැකීමක් විය යුතු නැහැ."

"මම දන්නේ නැහැ. මට නම් ඉමහත් වේදනාවක් දැනෙනවා මේ සිරුරේ ලිවීම. කටුවෙන් අනින්නේ නැතිව මේ ලිවිල්ල කරන්න බැරිද ?"

"ආත්මයෙ සැහැල්ලුව මේ කටුව තුලින් ඔබ තුළට ඇතුල් වන්නේ කටුවත් තීන්තත් සිරුරත් යන ත්‍රිත්වයේම ඒකාබද්ධ වීම එම රූප සංඥාව මතු පිට ශක්තියක් ලෙසට ගබඩා‍ වන්නටයි. ඔබ වේදනාවට පත්වන්නේ නම් ඒ ශක්තිය හානි වෙලා යනවා මිසක් මේ සංඥාවේ ගැබ් වන්නේ නැහැ. කුමක් හෝ වරදක් සිදුවී ඇති බව මගේ වැටහීමයි."

"කුමක් විය හැකි ද ඒ වරද? හරිගස්ස ගන්නට ඕනැ වෙයි වගෙයි යන්නට පෙර වැඩි දුර..."

"වරද ඇත්තේ ඔබ අතේ බව මට විශ්වාසයි. එක්කෝ ඔබ වැරදි සංඥාව තෝරා ඇත. නැත්නම් වැරදි තීන්ත තෝරා ඇත. මේ දෙකම අනුව කටුව තේරීම පමණයි මා අතින් සිදු වී ඇත්තේ. "

"වැරදි සංඥාව? එය කිසිසේත් විය නොහැකියි. මා තේරු සංඥාව මගේ ආත්මයේ සැහැල්ලුම තත්වයකදී මා අත්විඳි රූපමය වේදනයක්. තීන්ත ගැන මා ‍දන්නේ නැහැ. මම දන්නේ ඒ සංඥාව අත්විඳිද්දී සියළු වර්ණ කළු සහ සුදු බවට පත්වූ බව පමණයි. ඒ නිසාමයි කළු වර්ණ තීන්ත මා තෝරා ඇත්තේ."

"එසේ නම් මේ වේදනාබර අත්දැකීම ඔබ දරා ගතයුතුම දෙයක්...නමුත් ඔබ කෙදිනක හෝ මේ සංඥාවේ සාවද්‍ය බව අවබෝධ කරගනු ඇතැයි මගේ විශ්වාසය වේ..."

ප්‍රින්සිගේ මුළු සිරුරම කිසි දිනෙක නොලද සාත්තුවකින් සම්භාහනයකින් ස්පර්ශාවලියකින් ප්‍රබෝධ වී තිබුනි. සිරුර මතුපිට අඛණ්ඩව මලින් මල ඇමිණෙන මුවෙන් මුව සිප වැළඳ විවිධ සරාගී ක්‍රීඩා ඉරියව් දැක්වෙන චිත්‍ර වෛවර්ණයෙන් නිමහන් කර තිබුනි. ඒවා සියල්ල මෘදු තීන්තකින් කැන්වසයක් මතුපිට ඇඳෙනා ශෛලියකින්ම මුළු සිරුර පුරා පැතිරී ඉතිරී යන අයුරින් අතිශය සියුම් පින්සල් තුඩු හැසිරවීම් තුලින් ඔප් ගන්වා තිබුනි. ඈ නැවත නිද්‍රාවට පත් වන්නට පෙර ඇගේ මුළු සිරුර දෙසම අවසන් වරට ද නැමී බලන්නට විය. ඇගේ සිරුරේ දෙකලවා සහ යටිකය අසල ඇඳ ඇති මකර රූප දෙස අපහසුවෙන් නැමී බලත්ම ඇය වටහා ගත්තේ සිරුරේ රෝමයක් හෝ රෝම කූපයක් හෝ කරදරයකින් නොපෙලා ඒ සියල්ල ද චිත්‍රයේම කොටස් බවට පත් කර ඇති සෙයකි. ඇගේ මුවට මද හාසයක් පැමිණ එය වලක්වා නොපෙන්වා නැවතත් ඒ සුවපහසු ඇඳේ ඉහළින් සීලිමේ තිබූ දැවැන්ත දර්පණ දෙසට නෙත් යොමමින් තම සිරුරේ කාන්තියේම කිමිදී නිද්‍රාවට පත් වූවාය.

ප්‍රින්සි අභියස වූයේ දැවැන්ත දොරටුවකි. ඇය සිය සිරුරේ වස්ත්‍ර ලෙස තැවරී ඇති රූපාවලි මධ්‍යයේ තවමත් තෝන්තුවකින් පෙලුණාය.

ඈ සිටි ස්ථානය මන්දාලෝකයෙන් බැබළුන ශාන්ත සංගීතයකින් ස්ඵන්දනය වූ ගෝලාකාර ජ්‍යාමිතීන් මුහු වූ ඔපෙරා ශාලාවක් වැනි ය. එය උමගක ස්වරූපයක් ගත් අවකාශයකි. ඈ පසු කර තවත් ඈ මෙන්ම ස්වරූපරාගයෙන් මත්ව උමතුවෙන් මෙන් ඇවිද යන්නියන් ද උමං දොරටුව පසුකර ඇතුල් වන්නට විය. ප්‍රින්සි සිය නිරුවත් සිරුරත් අධික ලෙස වේශ නිරූපනයට ලක් වූ ඇගේ වෛවර්ණ රේඛාමය ආලේඛ්‍යයක් වූ මුහුණත් කිසි විටෙකත් කිසි ‍අයෙකුත් කිසි අයුරකින් ඈ හඳුනා නොගන්නේ ය යන්නෙන් විස්මයට පත්ව දෝනාව තුළට පියවර එසවූවාය.

දෝනාව තුළ බිත්ති කුඩා සිදුරු රාශියකින් යුක්ත වූයේය. එම සිදුරු නොයෙකුත් මට්ටමින් තිබුනේ ඒ කිසිවක් කිසි කෙනෙකුගේ හිස් මත සාමාන්‍ය උස ඉක්මවා යන්නට තරම් නූස් වීය. පහළින්ම වූ සිදුරු පවා කිසි කෙනෙකුගේ ඉඟ මට්ටමක් ඉක්මවා මිටි බවක් නොගත්තේය. දෝනාවේ දැකිය හැකි වූයේ ඈතට ඈතට වත්ම එකට ළංව ක්ෂුද්‍ර වී යන මායාමය වෘත්තයන් බවට රූපාන්තරණය වෙමින් පැවති මං පෙත් විනා අන් කිසිදු විශේෂ දෙයක් වූයේ නම් ඒ මේ බිත්ති පුරා අහඹු ලෙස පැතිර තිබූ සිදුරු පමණි.

ප්‍රින්සි තැතිගැන්මකින් තොරව ඉදිරියට ඇදෙන්නට වූවාය. දෝනා තුළ අතුරු දෝනා ද එම දෝනා තුළින් තවත් දෝනා ද යනාදී වශයෙන් එය සිදුරු බිත්ති වංකගිරියක් විය.
එක්තරා සිදුරක් අසලින් ඇය පිය මනිද්දී කිසියම් යාතිකාමය ස්වරයක් මධුර වූ ශ්‍රැතියකින් ගීතිකාවක් ගායනය වන්නේ යැයි ඇයට ශ්‍රවණය වූයෙන් ඈ එම සිදුර වෙත ළංව සියුම්ව සිය නෙත තබා බලන්නට වූවාය. ඇයට දැකගත වූයේ දැඩි අඳුරකි. එම කන්කළු නාදය දෙසවන් මන්මත් කරන්නට වූයෙන් ඇය තවත් අවධානයෙන් එම ගීතිකාවේ උස් පහත් ලෙසින් උච්චාරණය වන වදන් මනසට හසු කර ගන්නට තැත් දැරුවාය. ඒ කිසියම් ආගමික ගීතිකාවක් වැනි වූ සරාගී යාතිකාවක් බව ඇයට පසක් වූයෙන් එම සිදුර අසල නැවතී එය ශ්‍රවනයේම රැඳී හුන්නාය.

කාලය ගත වූයේ ඉතා සෙමින් බැවින් ඇයට තම සිතුවිලි රළ නැගී එමත දර්පණ වන්නට වූ කිසිදු අත්තනෝමතික සංයමයක් කෙරෙහි විජිගීෂාවක් නොවීය. ඇගේ ශ්‍රවනේන්ද්‍රිය ගෙන එන මධුරත්වයත් ඇගේ සිතුවිලි කිතිකැවී මතුවන අනේක චිත්ත රූපත් ඇගේ කාලය ඇගෙන් උදුරා ගන්නට ඉඩ දී ඈ නිසොල්මන් විය. ඇගේ අතීතය තුළ මොහොතක් කිමිදෙන්නට මේ කදිම අවස්ථාවක් යැයි ඇගේ යටි සිත කොඳුරන්නට වූයෙන් පර්සි ගැන මතකය සැනෙන් ඒ මන්දාලෝක දෝනාවේ එකම රූප සන්නියක් මෙන් ඇගේ මනසේ දිලෙන්නට විය. ඇය දෙනෙත් වසා අනන්තය දෙසින් ගලා එන ඒ රූප දහරාවට ඉඩ දුන්නීය.

සිදුර ඉදිරියේ ඇගේ දෙනෙත් පියැවුනි. වසර ගණනකට පෙර ඈ ඇගේ පෙම්වත් පර්සි සමග සරාගී ලෙස ගත වූ නිමේෂයන් ලෙස ඈ නිමැවූ මනස් සිත්තම් ඇගේ මනස් විවරයෙන් කැටි ගැසී හුන් වළාපටල සිය ඝණීභූත ස්කන්ධයන් දිය කර මහ පොලව මත පතිත වන වර්ෂාවක් මෙන් ඇද හැලෙන්නට විය. ඇගේ සිරුර තෙමී යන වගක් ඇයට දැනුනි. පර්සි කිසි දිනෙක ඇ‍යගේ සිරුරේ ශෘංගාරකලාපයන් ස්පර්ශ කර නොතිබුණි. ඔහු ඇයව හමු වූ සෑම අවස්ථාවක්ම එළිමහනක කෝපි කඩයක හෝ උද්‍යානයක විය. ඒ සෑම විටකම පර්සිගේ දෙනෙත් තුළ වූ ඒ අඳුර මේ සිදුරු තුළ වු අඳුරේම අවස්ථාවක් යැයි ඇයට සිතුනි. පර්සි ගේ මනසේ ගායනය වූයේ ද මෙබඳුම ප්‍රේම ගීතිකාවක් විය නොහැකිදැයි ඇය මනසේ ඇද හැලෙන ඒ කුණා‍ටුව මධ්‍යයේ විදුලි එළියක් සේ දිස් වන්නට විය.

***

පර්සි යටිබිම් හරස් මග වෙත සිය ස්වර්ණ පැහැ රථය හරවන්නට විය. ඔහුගේ දෛනික රාජකා‍රියේ අවසන නිවස්නය කරා යන ගමනේ හෝරාවන් දෙකක් මේ යටිබිම් හරස් මගෙන් කෙළවර වන අවන්හලේ ගත වෙයි. අවන්හල විවෘත වන්නේ සාමාජිකයන් සඳහා පමණි. දොරටුවේ මුර බල්ලන් ද මහේශාක්‍ය පෙනුමෙන් යුත් දැවැන්ත දේහදාරී මස් පිඩු පිප්පී ගිය මිනිසුන් හතර දෙනෙකි. තට්ට ගා කණකර පැළැඳි ඔවුන් ආම්කට් ඇඳුමින් සැරසී පච්ච කෙටූ දෑත් මස් ගොබ ප්‍රදර්ශනකාමයෙන් උලුප්පා සිටින සාමාජිකත්වය ස්ඵුට කරන රහස් පදය මිමිණීමෙන් පසු සුවච කීකරු ගෝලයන් වන ජාතියකි.

"රහස් පදය?"

"ඊඩිපස්"

පර්සි රථයේ සිටම සිය වීදුරු කවුළුපත පහත් කර එකෙකුට සිය රහස් පදය මුමුණන්නට විය. සැනෙකින් ගෞරවපූර්වක ලෙස පසුපසට වී රථයේ යතුර පිළිගන්නට සූදානම්ව හැඩි දැඩි තරුණයා සිය සුරත පෑවේය. වාහනයෙන් බැසගත් පර්සි තවත් හැඩි දැඩි මිනිසෙකුගේ මඟ පෙන්වීමේ පාදයාත්‍රාවෙන් එම දැවැන්ත කුළුණුමය අවන්හලේ දිගු කොරිඩෝවක් දිගේ ඉදිරියට ඇදෙන්නට විය. සමූහ යාතිකාව සූදානම් වෙමින් පැවතුනි. පර්සි සිය වස්ත්‍ර ගලවා ලෝගුවක් හැඳ මුහුණ ආවරණය වන පරිදි නින්ජා රෙදි පටි වැසුමකින් සන්නද්ධ වූයේ සිය කුටියට ඇතුළු වන්නට පෙරය.

ඔහුගේ කුටිය වෙත පා නගද්දී ප්‍රංශ රට බීමක් ඇනවුම් කරන්නට ද ඔහු අමතක නොකලේය.

පර්සිගේ කුටිය ඔහුට පමණක් සීමා වූ ස්වර්ණමය බිත්ති හැඩතල වැසූ විවිධාකාර කැටයමින් හැඩ ගැන්වූ ලෝහමය කැබලි ඇතුරූ බිත්ති වලින් ද බුරුත දැවයෙන් කළ ගාම්භීර කුඩා මේසයක් සහ අති සුඛෝපභෝගි සයනයකින් සහ ගඳකිලි කුටියකින් සමන් විත විය. පර්සි විටෙන් විට එම කුටියට ගෙන ආ පොත් පත්ද අසල රාක්කයක් පුරා අතුරා තිබුනි. අසාමාන්‍ය ප්‍රමාණයේ කහ පැහැති සුවඳ කැවූ ඉටි පන්දමක් මේසයේ කෙළවර වූ රන් පැහැති ඉටිපහන් රඳවනයක නිශ්චලතාවයේ දැල්වෙමින් පවතී.

සිය ලෝගුව සහ මුහුණු ආවරණය නියමිත ආකාරයෙන් පිහිටුවා ඇද්දැයි සැක හැර සිය කුටියේ කණ්ණාඩියෙන් පරීක්ෂා කළ පර්සි සමූහ යාතිකා කෙරෙන බිම් මහලට ඇතුළු වන කොරිඩෝව කරා සෙමෙන් ඇදෙන්නට විය.

යාතිකාවන් ඇරඹීමත් සමගම සියල්ලෝ තමන් විසින් ලියා ගෙන ආ විවිධ කවි පද මාලා වරින්වර උස් හඩින් සාමුහික රිද්මය තුළට ඇතුලු කරන්නට වූහ. ඒ අතර සමහර තීවෘතාවෙන් උච්ච හඩවල් දෝංකාර දී පරිමන්දිතව මහ හඩෙහි ගිලී ගියේය.
පර්සි සිය මව ගැන ලියැවුන කවියක් ද සිය ‍ආත්මගත ප්‍රේමයේ රන්රුව අගයන පෙම් ගීයක්ද ඒ දැවැන්ත ශබ්ධාගාරයේ බිත්ති මතින් රැව්පිලිරැව් දුන් ඇකෝස්ටික් යුධ අංගනාවේ පා කර හැරියේය.

පර්සිගේ මව අංශභාග රෝගයෙන් පෙලෙමින් සිය නිවසේ අසරණව වැතිරී සිටින්නීය.

***

ඒ මොහොත උදා විය. ප්‍රින්සි දෑස් හැර බලද්දී සිදුරෙන් ලිඟුවක් නෙරා පැමිණ තිබුනි. ඇය නිසොල්මනේ එම ලිඟුව දිහා නෙත්සර පහර නොබිඳ බලා සිටින්නට වූවාය. ඇගේ අවධානය තුළ ගොඩනැගෙමින් තිබූ ශක්තිය නාභිගත වී ඇගේ නිතඹ මත වූ සංඥාව ඇගේ මුළු සිරුරම කිතිකවමින් සුනාමිමය තරංගයකින් ඈ සොළවන්නට විය. ඈ වහා ඉදිරියට පැන ඒ ලිඟුව වඩවා මුව තුළ රඳවා ගත්තාය. ඒ ක්ෂණයෙන් බිත්තිය දෙදරා සියළු දේ හැකිලී යන්නට පටන් ගත්තේය. ඇගේ සිරුරේ වූ සියළු ලිංගික සංකේත සිරුරෙන් මිදී දෙදරා ගිය බිත්තිය තිබූ අවකාශය වසා එම ලිඟුවේ අයිතිකරු සඟවා ගත්තේය. ලිඟුවත් ඇයගේ සිරුරත් ඇගේ මුව තුළම සංකෝචනය වන්නට වූයෙන් ඇගේ සිරුර ඇගේ මුව තුළම කැටි ගැසී ලිඟුවත් එහි අයිතිකරුත් අවකාශයත් ඒ අවකාශය තාවකාලිකව වසා හුන් තීන්තෙන් ඇඳි ලිංගික චර්යා රූ ප්‍රතිබිම්බත් ඒ තුළට ඇදී යන්නට විය. අවසානයේ ඉතිරි වූයේ අතිශය ක්ෂුද්‍ර වූ ශක්ති පුංජයකි. එම ශක්ති පුංජය ගැඩවිලෙක් මෙන් ඇඹරි ඇඹරී සිය ශක්තිය ස්ථාවර කරගන්නට වැර දරන්නට වී ඒ අසමත් වැ සැනින් තරංගාකාර චිත්තාවලියක් ලෙස අවකාශය තුලින් ආලෝක වේගයෙන් පුපුරා ගියේ කිසිවක් එතැන ඉතිරි නොවෙමිනි. බයිනරි සංඛ්‍යා සාගරයක සියල්ල ගිලී සැඟ වුනි.

එම ශක්ති තරංගාකාර යම් දෙය අතිශය වේගයෙන් දසදෙසට ගලා ගොස් එහි කම්පනයට සංවේදී වු යමක ගැටී එම බීජයන් යලි පණ ගන්නට විය. මේ ශක්ති කැටිත්ත අවකාශයේ හමා ගොස් ගැටී තිබුනේ මිනිස් නියුරෝනයක් මතටය. නියුරෝනය මේ ශක්ති පුංජයේ ගැබ්වූ රහසිගත කේතයන් සැනෙන් දෘශ්‍යමය රූප බවට හරවා එම නියුරෝන ජාලයම කැලතවූයෙන් එම නියුරෝන ජාලාධිපතියා කල්පනාවේ නිමග්න එක මොහොතක දී ඒ සියලු විචිත්‍ර චිත්ත පරපෝෂී කේතයන් මනසින් නැවත සකස් කර අත්පිටපතකට ගත්තේය.

ඒ 1978 වසරයි.

එම නියුරෝන ශක්ති පුංජ ගැටීම සිදු වූයේ ධර්මසිරි බණ්ඩාරනායකගේ මොළයේ ඇතුලේ නිද්‍රාගතව හුන් නියුරෝනයක් තුළ බවට සැබෑ සාක්ෂිය වන්නේ 1983 දී තිරගත වූ "තුන්වැනි යාමය" යි.

දහයේ සෘණ පන්සිය තුනේ මිනුමේ ජීවිතය...

2010-03-16T21:09:00.000-07:00

දහයේ සෘණ පන්සිය තුනේ මිනුමේ ජීවිතය...

"අර පේන මන්දාකිණිය මොකද්ද?"

"ඒක ඉලෙක‍‍ට්‍රෝන වළාවක්"

"එතකොට අපි මේ ඉන්න ලෝකය?"

"ඒක එක ඉලෙක්ට්‍රෝනයක්"

"මොනවා? අපේ ග්‍රහ ලෝකය ඉලෙක්ට්‍රෝනයක්?"

"ඔව් අපි ජීවත් වෙන්නේ මිනිස් විෂයේ මිනුමට සාපේක්ෂව දහයේ සෘණ පන්සිය තුනක් තරම් කුඩා මිනුම් සහිත ක්ෂුද්‍ර ලෝකයක"

"ඒ කියන්නේ අපට අපේ ග්‍රහ මඬුල්ල වගේ පේන දේ මිනිස් විෂයට අනුව පරමාණුවක් ද ?හරියටම සූර්යයා කේන්ද්‍ර කරගෙන කරකැවෙන ග්‍රහයෝ වගේ ප්‍රෝටෝන න්‍යෂ්ටිය කේන්ද්‍රකරගෙන කරකැවෙන ඉලෙක්ට්‍රෝන ද අපේ ග්‍රහලෝක?

" ඔව් හරියටම හරි. නමුත් මිනිස් විෂයට අනුව අපේ ලෝකය පරමාණුව විතරක් නොවෙයි ඒ අයගේ නිවුටන් නියමවත් පිළිනොපදින ක්වොන්ටම් ‍ ලෝකය. ඒ අයට එහෙම වෙද්දී අපට අනුව නිවුටන් නියම වලට අනුව චලනය වෙන්නේ මේ ඉලෙක්ට්‍රෝන. මොකද මිනිස් විෂයට දහසේ සෘණ තිස් හතරට එහා ගෝචර වෙන්නේ නැති නිසා. අපට දැනෙන්නේ මිනිස් විෂය ක්වොන්ටම් කියලයි. "

"ඒකට හේතුව මොකද්ද?"

"ඒකට හේතුව තමයි අපි ඉන්නේ වෙනස් කාල රාමු වල වීම"

"ඒ කියන්නේ?"

"ඒ කියන්නේ මිනිස් විෂය කාලය කියල කියන දේට වඩා අතිශය වේගවත් දේක තමයි අපි මේ ඉන්නේ. කොටින්ම මිනිස් විෂයට ඉලෙක්ට්‍රෝනයක් කවදාවත් දැක ගන්නවත් පිහිටුම සහ වේගය එකවිට මැන ගන්නවත් බැරි තරම් වේගයෙන් වෙනස් වෙවී තියෙන දෙයක් විදියට ඒ අය ක්වොන්ටම් සංසිද්ධිය වටහා ගනිද්දී අපි ඒ අවිනිශ්චිත දේවල් මතුපිට ජීවත් වෙනවා. අපට අනුව ඉලෙක්ට්‍රෝනය ඔවුන්ගේ ග්‍රහ ලෝකයක් තරම් විශාලයි. අපේ කාලය ඔවුනගේ කාලය ට වඩා අතිශය වේගවත්‍. ඔවුනට කවරදාකවත් අතික්‍රමණය කළ නොහැකි වේගයන් තුළ අපි නිශ්චලයි. "

"දැන් නම් තේරුණා ඇයි මිනිස් විෂය අවිනිශ්චිතතාවයේ මායිමේ කරක් ගහන්නේ කියලා..."

"ඔව් මිනිස් විෂය කවර දාක හරි අපි සමග තොරතුරු හුවමාරු කරගනීවි. නමුත් ඒ අයට අනුව ඒ අභ්‍යවකාශයේ කෙළවරින් එන පණිවිඩයක්. නමුත් අපි ඉන්නේ ඒ අයගේ වතුර බිංදුවක හෝ පිෂ්ට අංශුවක..."

"නමුත් මෙහෙම වෙන්න බැරිද? ඒ අය සහ අපි එකම අවකාශයක ඉන්නවා කියලා අපි දෙගොල්ලන්ටම දැන ගන්න විදියක් එකිනෙකාට සම්ප්‍රේෂණය කරන්න ක්‍රමයක් සොයා ගන්න බැරිද ඊට කලින්?"

"පුළුවන්. ඒකම තමයි මේ දැන් මේ වෙන්නේ. හකාවතී මේ කතාව ලිවීම තුළ කරන්නේ අපේ‍ ලෝකය සහ මිනිස් විෂය ලේඛනයක් තුළ එකට එකතු කිරීම. ඇත්තට ම විය හැක්කේත් ඒ දේම පමණයි. "

මහාමාරි‍යේ කුමාරයා

2010-03-01T19:41:00.000-08:00

මහාමාරි‍යේ කුමාරයා ”මිනිස්සු නොපෙනෙන්න පටන් ගත්තම මම මේ රට පාලනය කරන්නේ කොහොම ද? අඩුම තරමින් රටේ පාලකයා වශයෙන් මම වත් රටේ මිනිස්සුන්ට පේන්නේ නැත්නම් කොහොමද මිනිහෝ මම මේ රට පාලනය කරන්නේ? මමවත් නොපෙනී යාමෙන් වලක්වා ගන්නට ක්‍රමයක් නැද්ද?”

රාජ්‍යයේ මුහුදු බඩ ප්‍රදේශ වල වාසය කරන මිනිසුන්ගේ අත්වල සහ පාවල නියපොතු මැකී යාමක් හදිසියේ සිදුවූයෙන් ඉමහත් ත්‍රාසයට පත් ගැහැණුන් සහ පිරිමින් ගෙන් රෝහල් පිරී යාමත් සමග තත්වය උණුසුම් වී පැය විසිහතරක් ඇතුලත ඔවුන්ගේ නියපොතු පමණක් නොව ඇඟිලි වල මුදුන් වලින් පටන් ගෙන ක්‍රම ක්‍රමයෙන් ඇඟිලි ද නොපෙනී යන්නට පටන් ගත්තෙන් ඊයේ පෙරේදා සර්වජන ඡන්ද බලය පාවිච්චි කිරීමෙන් අනතුරුව සිය ඡන්දය ප්‍රකාශ කළ බවට තිබූ එකම සාක්ෂිය වූ වම් අතේ සුළැඟිල්ල මුළුමනින්ම අතුරුදහන් විය. ඉන් පසු සැමටම සිතීමට සිදු වූයේ තම තමන් දුන් ඡන්දය වෙනුවෙන් උසාවි ගානේ ගොස් ඡන්ද පෙත්සම් වෙනුවෙන් පෙන්වා සිටින්නේ කුමන ඇඟිල්ලද යන්න කෙසේ වුවත් ඔවුන්ගේ සිරුරෙන් ඉවත් වෙමින් පවතින අවසාන කොටස මෙය නොවිය හැකි යැයි ඇති වූ කුකුසෙන් මත්ව සියල්ලෝ අලුත් ආණ්ඩුව දෙස බලාගත් වනම ඉන්නට වූයෙන් රජය ඉමහත් අසීරුතාවයට පත් වීමෙන් වලකා ගැනීම උදෙසා රාජ්‍යයේ සිටි ඉහළම විද්වතුන් මහා සම්මේලනයක් කැඳවා මීට පිළියම් සොයන්නට කටයුතු කරන්නට පටන් ගත්තේ රජවාසලේ සිවු දෙසට හමුදා බල ඇණි විස්ස බැගින් ද ඇණියකට සෙබළුන් හාරසියක් එකතු කොට අට දහසක් භටයන් යොදවා වටකර සන්නද්ධ කරවා ආරක්ෂාව තර කර වාසලාභ්‍යන්තරයේ පැවැත්වූ දින දහ හතරක අඛණ්ඩ පිරිත් සජ්ජායනාවසානයේ ය. පිරිත් සජ්ජායනය අතරතුර ද එහි වැඩ සිටි භික්ෂූන්ගේ පවා අතැඟිලි ක්‍රමක්‍රමයෙන් මැකී ගියද ඔවුහු එය නොතකමින් පරිත්‍රාණ දේශනය අඛණ්ඩව පවත්වන්නට වූයෙන් හමුදා බලකුරු මැද්දෙන් මෙම සිරුරු මැකී යාමේ අභිරහස් වෛරසය හෝ බලවේගය රිංගා ගියේ කෙලෙසක දැයි කිසිවෙකුටත් දැන ගැනීමට නොහැකි වූයෙන් බොහෝ පිරිමි අය සුළු දිය කටයුත්තකට ඉතාලියානු වැසිකිළි පෝච්චි වෙත සිය ශිෂ්ණය මුදන්නට බලද්දී එය ද මධ්‍යය ඉක්මවා නොපෙනී යාමට පට‍න් ගෙන ඇති බව දැනුනෙන් වහා අතිශය විශාල උදරයන් සහිත මැති අමාත්‍යවරු තම ලේකම්වරු ලවා තමා‍ට නොපෙනෙන තම රහසඟ මැකී යාමේ රෝග‍යට තමන් ගොදුරු වූයේ දැයි යුහුසුළුව සොයන්නට ගත්තෙන් පිරිතේ මධ්‍යය පසු වූවාත් සමගම රජ වාසල බිහිසුනු‍ වසංගතයක පැතිරුමක සේයා මවමින් මහාමාත්‍යාදීන් තම මළානික සහ මරාන්තික බිය මුසු මුහුණු වසං කොට ගෙන සජීවි විදුලි කම්බි වැටවල්වල පැටලී හුන් හේන් පාළු වල් අලියන් මෙන් පැද්දෙමින් ද හුරුවන් බාමින් ද එකත්පස්ව රජු අභියස පෙළ ගැසී ඉන්නට විය.
පිරිත අවසානයේ මහ රජුන් ගඳකිලියට හැරෙද්දී සියළු මැති ඇමැතිවරු සීරුවෙන් ඔහු දෙස බලා සිටින්නට විය.

“මොන විද්‍යඥයොද කියන්නේ මේ කතා? ගෙන්වනවා අර පොන්න... පොන්න... කවුද බං අර අපේ ලෝක ප්‍රසිද්ධ විද්‍යාඥයා .... බැසිල් පොන්නම් පෙරුම නේද?”

“රජතුමනි බැසිල් පොන්නම්පෙරුම නොවෙයි සිරිල් පොන්නම්පෙරුම.”

“හරියට හරි! මිනිහව ගෙන්වනවා ඉන්න මොන ලෝකෙකින් හරි. මේවා කතා කරන්න ඕන උඹල වගේ මී හරක් එක්ක නොවෙයි ඒ විෂය දන්න මිනිහෙක් එක්ක. දන්නවනේ මගේ හිත අවුල් කරන්න එපා. මගේ හිතේ හැටියට හැම දෙයක්ම වෙන්න ඕන. තේරෙනව නේද? මගෙන් එක එක ප්‍රශ්න අහල හිත කරදර කරවන්න එපා. සේරම වැඩ මගේ හිතේ හැටියට වෙන්න ඕන. භාණ්ඩාගාරේ සල්ලි තියෙනවා. ඒවා වියදම් කරල මගේ හිතේ හැටියට වැඩ කරපල්ලා. මගේ හිතේ නිස්කලංකේ නැති කරන්න එපා. හැමදේම මගෙන් අහන්න එපා. දැං යනවා. ගිහිං අර යෝධයව අඩගහං එනවා. මේ නොපෙනී යන මළදානේ පටන් ගත්තේ කවද්ද? මගෙත් නියපොතු මැකිල යාවිද ? එහෙම වෙන්න දෙන්න බැහැ. දුක්ගන්නාරාළට කියපං ඔය යන ගමන් මගේ මන්දිරේ වටේට ආරක්ෂක වළලු තව හතරක් දමන්ට කියලා.”

රජුගේ විධානයෙන් වහා ක්‍රියාත්මක වූ අයි ටී යුනිට් එක වහාම ගූගල් කර චීන විශේෂඥයකු සොයා ඔහුට ඊමේලයක් යවා සිරිල් පොන්නම්පෙරුම මහතාගේ මොන අල ගෙඩියක් හෝ සොයා දෙන මෙන් රාජාඥාවක් එච්පී ප‍්ලොටරයෙන් මුද්‍රණය කර රජතුමාගේ කණ අත්සන හදිසි අවස්ථාවකදී ලබා ගැනුමට රබර් මුද්‍රාවකට පරිවර්තනය කොට ආරක්ෂා සහිතව වීදුරු පෙට්ටියක වූයෙන් එම පෙට්ටිය බිඳ දමා එම රබර් මුද්‍රාව ගෙන තීන්තේ පොඟවා මුද්‍රිත ආඥාවේ තබා ස්කෑන් කර නැවත චීන විශේෂඥයාට ඊමේල් කර තත්පර කීපයක් ගත විය.

“රජතුමනි සිරිල් පොන්නම්පෙරුම මහත්තයා සොයා ගත්තා. දැං මොකද කරන්නේ?”

“අරං වරෙව් කුදලං ඕකව. මේක හදිසි අවස්ථාවක් බව දන්නේ නැද්ද? විගහට අරං වරෙල්ලා.”

ජපානයෙන් ගෙන්වන ලද වෙඩි නොවදින කුණු බිත්තර වැදුනු විට ඔම්ලට් බවට පත් කර නැවත එම කුණු බිත්තරය හමා ආ පථය පරිගනකයෙන් ගණනය කර එම පථය ඔස්සේම නැවත ප්‍රක්ෂේප කරන්නට සමත් රථයක් වූයෙන් රජතුමා මෙම වාහනයේ යද්දී සාමාන්‍ය ජනතාව ඔම්ලට් ලබා ගැනීම පිණිස පුරුදු පුහුණු වූයෙන් එම රථය හන්තානට පැයට කිලෝමීටර එකසිය විස්සට විදගෙන යද්දී පවා මිනිසුන් ක්ෂණික ඔම්ලට් කුඩු ලබා ගත්තේ මැකී යන සිය ශරීර කොටස් පිළිබඳ කිසිදු මතකයකින් තොරවය.‍ සමහර මිනිසුන් ඔම්ලට් කෑමට ඇබ්බැහි වී සිටි හෙයිනි.
විනාඩි විස්සක් ඇතුලත සිරිල් පොන්නම්පෙරුම මහතා රජවාසල විශේෂ කුටියක දේව පූජාවක් පවත්වමින් හුන් රාජ්‍යයේ ඉහළම අත්දැකීම් ඇති බ්‍රිතාන්‍යයේ හාවඩ් වෛද්‍ය විද්‍යාලයෙන් හදවත් නැත්තන්ගේ හදවත් ක්‍රියාකාරිත්වය පිළිබඳ උපාධි හතරක් රජත සම්මාන සහිතව ඉහළින් හදාරා විශ්වප්‍රාප්ත වූ ද හෘද වෛද්‍යවරයා අභියස මළානිකව වැතිරී හුන් රජතුමා ඉදිරියේ සැලෙන ගතින් සහ ග්ලවුස් පැළැඳි දෑතින් යුතුව බලා සිටින්නට විය.

“මොකද මේ මළ මිනියක් ව‍ගේ අත්වැසුම් දාගෙන? ඕවා අවශ්‍ය නැහැ. මගේ මාළිගාවේ එක බැක්ටීරියාවක් එක වෛරසයක් නැහැ. වෛරස තියා අභ්‍යවකාශෙන් එන අන්තරීක්ෂ කිරණයක් වත් මේක ඇතුලේ නැහැ. මේක වට කරල ඉන්නේ රාජ්‍ය සේනාංක වල ඇසින් මිදිල ක්වාක් අංශුවකටවත් ඇතුල් වෙන්ට බැහැ. ඔබතුමා බය වෙන්න එපා....”

“ඒ බව මම දන්නවා රජතුමනි. ආපු කාරණයට බැස්සොත් ... මේ අදිසි රෝගය හෝ අදිසි විශ්ව ක්‍රියාකාරිත්වය ගැන නම් මගෙන් කිසිවක් ඇසීමෙන් ඵලක් වෙන්නේ නැහැ. මොකද මේ ගැන මා කිසිවක් දන්නේ නැහැ. මගේ විශේෂඥතාවය තියෙන්නේ රසායනික පරිණාමය ගැන නොව? මට මේ ගැන කියන්න කිසිම දෙයක් නැහැ. විද්‍යාඥයෙක් වශයෙන් කිව හැක්කේ මේ ගැන වැඩි දුර පර්යේෂණ කළ යුතු බව පමණයි. ඒ සඳහා විවිධ විෂයයන් ට අදාල විද්වතුන් කණ්ඩායමක සාමුහික අධ්‍යයනයක් ව‍ශයෙන් ....”

“මොනවා? මේ තරම් ලෝකයේම ජනාදරයට පත් වෙච්ච ඔබතුමාට බැරිද මේක විසඳන්න? දෙයියනේ මම කාට කියන්න ද ? මට කියන්න ඉන්නේ ඔබ තුමා විතරයි. ඔන්න නොකිව්වයි කියන්න එපා මේ මුළු රටම මගේ දිහා බලං මගෙන් ඉල්ලන්නේ එකම දෙයයි. අම්මපා මම මේ රටේ මිනිස්සු ඉල්ලුවොත් අප්පච්චි ගහේ බැඳලා හරි දීලා දානවා මොකද මම කියන්නේ මේ රට...මම ය කියන්නේ මේ මුලු රට! ‍ රට කියන්නේ මට!! කරුණාකරල රටට ද්‍රෝහිකම් විතරක් කරන්න එපා. මම මේ කතා කරන්නේ රට වෙනුවෙන්. තේරුණාද?”

“මට තේරෙනවා රජතුමනි. ඒත් මම මේ ප්‍රශ්නේ දන්නේ කිසියම් පැත්තක් පමණයි. මට එකහෙලා මේ ගැටළුව පිළිබඳ අවබෝධයක් නැහැ. ඒක තමයි මගේ අවංක අදහ...”

“මොනවා???? නයාට ගහල පොල්ල වරද්ද ගත්ත නේද? කවුරුවත් කීවේ නැද්ද මී හරකෝ මාව මුණ ගැහෙන්න එද්දි මා ඉස්සරහ හැසිරෙන්න ඕන විදිහ? මම කවදාවත් කාගෙන්වත් ඔහොම කතා අහන්න සූදානම් නැහැ. මේක කෙරෙන්න ඕන ...වහාම මට වාර්තාවක් දෙනවා පැය දෙකක් ඇතුලත. මේක මළ හත්තිලව්වක් නේ...‍රටේ සල්ලිවලින් ඉගෙන ගෙන අඩුම තරමින් අර ගාල්ලේ මූලික පාසැලට හරි ගියා නම් තමුන් රටේ නිදහස් අධ්‍යාපනෙන් නෙව ඒ ටික හරි කරගත්තේ? හරි ද? රටට සේවයක් කරන්න සූදානමක් නැති හැටි?? දන්නව ද එලියේ නීති තියෙනවා ඕන පදං...මට පුළුවන් ඔය ඕනම නීතියක් එක්ක හැප්පිලා තමුන්ව අත් අඩංගුවට අරං සේරම ටයිටල් ගලවල දමලා කුක්කෙක් වගේ තියල තියන්න...තේරුණා ද?”

“හොඳයි මම වාර්තාවක් දෙන්නම්.”

වි‍ශ්වයේ අපරිමිත ‍වූ විවිධාකාර වූ ප්‍රදේශ ඇත්තේය. අප ජීවත් වන මෙම ග්‍රහ මඩුල්ල ද ඇතුලත් අපගේ චක්‍රාවාටය ද මෙම මහත් වූ විශ්වයේ මිනිස් ගණනය කිරීම්වලින් අතෘප්ත නොහොත් අගණිත වේගයෙන් එක්තරා දිශාවන් වෙත අපරිමිත ලෙස චලනය වෙමින් පවතී. එම චලිතය හේතුවෙන් පෘථිවිය ඇතුලත් අප චක්‍රාවාටය ඇතුළු වී ඇත්තේ එවැනි වූ විෂම භෞතිකයන් ගෙන් සමන්විත වූ කලාපයකටය. මෙම කලාපය තුල ඇති භෞතිකය කෙසේ ද යත් එය පරමාණු සැකසුම්වල ලිහිල්ම මට්ටම්වලින් පටන් ගෙන වඩාත් තද ආකෘති කරා යද්දී එම පරමාණු සැකසුම් තුළ පවතින ආලෝකය අංශු පිට කිරීමේ හැකියාවන් සහ පරාවර්තනය කිරීමේ හැකියාවන් නතර කරනු ලබන- ෆෝටෝන අංශුවලට වඩා අතිශය කුඩා නමුත් ෆෝටෝන අංශුවලට ප්‍රතිවිරුද්ධ ආරෝපණයක් සහිත අංශු විසින් ෆෝටෝන අංශු චලනය නතර කරන බැවින් ඉතාම ලිහිල් පරමාණුක සැකසුම් ඇති ජීව සෛල වල පටන් ගෙන ක්‍රමක්‍රමයෙන් වඩාත් තද පරමාණු ආකෘති දක්වා ගොස් මෙම ෆෝටෝන අංශු පිට කිරීම අවහිර කරන බැවින් මෙලෙස ආරම්භයේ දී මිනිස් සිරුරු සහ අනෙකුත් ජීව ශරීරවල බාහිරින්ම පිහිටි කොටස් මෙලෙස ආලෝකය විහිදීම බාධා වීමෙන් නොපෙනී යන්නට පටන් ගන්නා අතර කාලයත් සමග වඩාත් තද කොටස් ද නොපෙනී යන්නට පටන් ගන්නා බැවින් අවසානයේ දී වඩාත් තද ලෝහ වැනි ද්‍රව්‍ය පවා නොපෙනී යාමට නියමිතය. මේ සංසිද්ධිය විශ්වයේ‍ මෙබඳු කලාපයකට අප ද ජිවත්වන චක්‍රාවාටය ඇතුලු වීමෙන් මුහුණ පාන්නට සිදු වී ඇති තවත් ස්වාභාවික උපද්‍රවයක් වන අතර මෙම නොපෙනී යාමේ තර්ජනයෙන් අප දැනට ජීවත් වන්නා වූ අපට විශය වූ විශ්ව ප්‍රදේශයේ සියලුම ආලෝක තත්වයන් තුල පෙනී යන වස්තු මැකී යන බවත් එය වලක්වා ගැනීමට මිනිස් සංහතියට කළ හැකි කිසිවක් නොමැති බවත් මෙම වාර්තාවෙන් දක්වා සිටින්නට කැමැත්තෙමු.

මෙම වාර්තාව දැකීමෙන් සිය යහන අභියස දේව පූජා පවත්වමින් හුන් හෘද ශෛල්‍ය වෛද්‍යවරයාගේ දෙපරන්දයට පහර දුන් රජතුමා වහාම සිය ඇඟිලි දෙස බලා ඒවා නැවත දැක ගැනීමට හැකි ලෙස නාට්‍ය වේශ නිරූපණ ශිල්පියෙකු ලවා තීන්තෙන් ඇඳ ගත්තෙන් මනමේ නාටකයේ වැදි රජ හා සමාන පෙනුමකින් පත්තිරිප්පුව වෙත ගොස් අර්ධ ව‍ශයෙන් නොපෙනී යමින් සිටි ජනතාව අමතා මෙම නොපෙනී යාමේ ව්‍යාධියෙන් රට වැසියා ගලවා ගැනීම තමාගේ පරම යුතුකම බවත් ඒ සඳහා සිරිල් පොන්නම්පෙරුම නොව මහා බ්‍රහ්මයා සමග වුව විවාදයකට තමන් සූදානම් බව ටෙලිප්‍රොම්ටරයෙන් බලා සියළු ජනතාව වෙත සපථ කර දිව්රා පොරොන්දු විය. සියල්ලෝ සතුටින් නැති ඇඟිලි එක්කොට මුවට දමා විසිල් ගසා විසිර ගියහ.

ඉන්පසු සිරිල් පොන්නම්පෙරුම මහතා ගැන ආරන්චියක් නැති වූයෙන් ඔහු අවසන් වරට දම්පැහැති කමිසයක් සහ කළු පැහැති කලිසමක් ඇඳ හන්තාන මූලික අධ්‍යයන ආයත‍නයේ සිට මොරටුව ආතර් සී ක්ලාක් මධ්‍යස්ථානය දක්වා එක් දිනක පැමිණි බවත් පසුව සිය දුරකතනයෙන් කීප දෙනෙකුට අමතා ඇති බවත් එම දුරකතනයේ සිම් කාඩ් පත පරීක්ෂා කර ඇති පොලිස් පරීක්ෂකයන් එම සන්නිවේදන ජාල වලින් ලබා ගත් වාර්තාවලින් එලිදරවු වී ඇත්තේ එතුමා කීර්ති තෙන්නකෝන් නමැති රසායන විද්‍යාඥයෙකු හමු වීම‍ට ඇපොයින්මන්ට් දමා ඇති බවත් එංගලන්තයට දුරකතන ඇමතුම් දෙකක් දී ඇති බවත් චන්ද්‍රා නම් වූ තරුණියකට කතා කර ඇති වගත් ඉන් ස්වල්ප මොහොතකට පසු ඇය විසින් එංගලන්තයේ සිට සාර්ස් වෛරසය පිළිබඳ ලියැවුනු වාර්තාවක් සිරිල් මහතා වෙත ෆැක්ස් මගින් එවා ඇති බවත් ඉන් පසු කිසිදු තොරතුරක් වාර්තා වී නැති බවත්ය.
එකදහස් නවසිය අනූ හතරේ දෙසැම්බර් මාසයේ හෘදයාබාධයකින් මියෙන තුරු එතුමා ට ඉන්පසු සිදුවූයේ කුමක් දැයි කිසිම වාර්තාවක් හෝ සටහනක් දැනට සොයා ගෙන නැත. මෙම සිදුවීම පිළිබඳ කිසිදු සටහනක් අඩුම තරමින් තම පෞද්ගලික දිනපොතේ වත් නැති වීම හේතුවෙන් එකළ රාජ්‍ය පාලකයා කුමන සූක්ෂම අන්දමින් සිය බලතල පාවිච්චි කරමින් සිටියේද යන්න ඉන් සියවස් මිලියන කීපයකට පසුව පවා ඉතිහාසඥයන්ගේ මවිතයට හේතු වී ඇත්තේය.

රජතුමා ගේ අවයව නොපෙනී යාම පිළිබඳව වගකිව යුතු වූ සියල්ලන්ට විවිධාකාර වූ දරුණු දඩුවම් ලබා දෙන්නට වූයෙන් ප්‍රථමයෙන්ම පෞද්ගලික වෛද්‍යවරු තුන්දෙනාගේම ප්‍රජා අයිතීන් තහනම් වූයෙන් ඔවුහු ත්‍රිකුණාමලයේ තනා ඇති එක්ටැම් ගෙවල් තුනක රඳවන්නට රජවාසල දුක්ගන්නාරාළ තීරණය කලෙන් ඔවුන් වෙනුවෙන් එක්ටැම් ගෙවල් කොන්ත්‍රාත් ක්‍රමයට සාදාලන්නට භාණ්ඩාගාරයෙන් රුපියල් බිලියන තිහක් වියදම් කළ අතර රජතුමාගේ අභිමතය පරිදි ‍එම වෛද්‍යවරුන්ට බාහිර ලෝකයේ ඇමීබාවකු සමග හෝ තමන් දුටු දේ හෝ අත්දැකි කිසිවක් කියා ගන්නට‍ නොහැකි වන ලෙස සීල් තබා සිර කරන ලදී. අතිශය විශාල ලෝහ සන්නායක කුඩයක් වැනි ඇන්ටනාවක් යෙදීමෙන් මුලු ත්‍රිකුණාමලයම විදේශීය චන්ද්‍රිකා තරංගවලින් ආරක්ෂා කරගැනීමට තවත් බිලියන පන්සීයක් වියදම් කළ අතර රජතුමා සුළු දිය පහ කිරීමේ දී සිදුරු කළ කොන්ඩමයක් භාවිතා කරන බව සුප්‍රසිද්ධ විපක්ෂ පුවත්පතක් වාර්තා කළ අයුරු ගැන පරීක්ෂණ පවත්වන්නට ජපානයෙන් බිලියන අසූහාරදාහක් වියදම් කොට රො‍බෝ යන්ත්‍ර තුනක් ආනයනය කළ අතර එම රොබෝ යන්ත්‍ර විසින් රජවාසල වෙත කේප්ප වස්සෙකු සහ වල් බල්ලෙකු ඩැහැගෙන අරං ආ අතර ඔවුන් මස් කර රජතුමාගේ රහස දැන ගත්තේ කෙසේ දැයි සොයා ගන්නට රාජ්‍ය රස පරීක්ෂකයන් සමත් වූයෙන් එම රොබෝ යන්ත්‍ර තුනට තවත් එක් යන්ත්‍රයක් ගෙන්වාගෙන එකතු කර එම යන්ත්‍ර හතර රජ වාසල හතර පැත්තෙන් තබා ඒ අවට කිලෝ මීටර දසදහසක් තුල එකිනෙකා රහසින් මුමුණන වදන් පවා අසා පටිගත කරන්නට වූයෙන් එම දෙබස් අසමින් සිටි රහස් පොලිස් අංශයේ ප්‍රධානියා තමන්ගේ අවයව මැකීගොස් ඇති බව ද අමතකව නො‍යෙක් ආවේගයන් මත්තෙන් සිය බිරිඳ සමග අසැබි ලෙස බහින්බස් වීමෙන් එක්තරා සිකුරාදා දිනෙක රාත්‍රි එකොළහ පසුවී විනාඩි විසි පහේ ගත වෙමින් පැවති ශනි හෝරාවේම මරු වැළඳ ගත්තේ රටම භීතියට පත් කරවමිනි.

ඉන්පසු උදා වූයේ අඳුරුතම යුගයයි. රටේ කිසිවෙකුට කිසිවෙකුත් නොපෙනුන අතර ස්වරාලවල ද නොසිතු නොපැතූ පරමාණුක වෙනසක් සිදුවීමෙන් කිසිවෙකුටත් කතා කර ශබ්ධ උපද විය නොහැකි වීමත් සමග සියල්ලෝ සන්නිවේදනය උදෙසා සිය ඇඳුම් පමණක් යොදා ගන්නට සිදු විය. ඇඳුම් ද එකිනෙකාට පෙණුනේ ස්වල්ප වේලාවකට පමණි. නැවත ඒවා ගලවා විසි කොට අලුත් ඇඳුම් සොයා ඇඳ ගත් විට එකිනෙකා පෙනෙන්නට ගත්තෙන් ඇඳුම් ලොව ඇති අතිශය වටිනාම දේ බවට පත් විය. මේ නිසා ඇඳුම් කර්මාන්තය එහි උපරිම වේගයෙන් ඇඳුම් නිර්මාණය කල අතර කැමති අය කැමති ඇඳුම් කැමති මිල ගෙවා ඇඳ ගන්නට පටන් ගත්තෙන් ලෝකයේම මිනිසුන් ඇඳුම් වලින් සිරුර වසා ගෙන තම නොපෙනී ගිය කොටස් මතු කර දක්වන්නට උනන්දු වීම නිසා ඇඳුම් පැළඳුම් පමණක් නොව තීන්ත වර්ග පවා අතිශය දුර්ලභ දේ බවට ඊළඟ මොහොතේ පත්විය. මිනිසුන්ගේ සියලු හැසිරීම් සහ සංස්කෘති වෙනස් වී අමුතුම ලෝකයක් බවට එම ලෝකය පත් විය. තීන්ත ගෑම අනවර‍තයෙන් කළ යුතු වූයේ ගෑ තීන්ත ස්වල්ප වේලාවකින් නොපෙනී ගිය බැවිනි. අවශ්‍ය වේලාවට පමණක් ගැනීමට තීන්ත ගබඩා කර තැබීමට ද නොහැකි වූයෙන් අවශ්‍ය වේලාවට පමණක් ඒවා ඇතිල්ලිය යුතු විය. ඇඳුම්වල තත්වය ද මීට නොදෙවෙනි විය. කොයි ක්‍රමයකින්වත් කිසිදු දෙයක් වැඩි වේලාවක් පෙනෙන තත්වයේ පවත්වා ගන්නට නොහැකි වූයෙන් මිනිසුන් ලැගි ලැගි තැන්වල හොල්මන් සේ කාලය ගත කළහ. රජවාසලට විශ්ව ඉතිහාසය තුළ මනුෂ්‍යයෙකුගේ අසරණකම ගැන හෝඩුවාවක් දැනෙන්නට ගත්තේ මේ යුගයේ දීය.

එකල රජතුමාගේ පුත්‍රයාගේ මංගල්‍ය අවස්ථාව ද උදා වූයෙන් නිසි කල් බලා ඉතිරි කරගත් ඇඳුම් ආයිත්තම් කීපයකින් ඔහුව හැඩ කර අතිශය සුන්දර ගස් කීපයක් පමණක් අරටුව සහ මුල් වශයෙන් ඉතිරිව තිබූ එක්තරා ශක්තිමත් ගස් ජාතියක් නිසා සුප්‍රසිද්ධව තිබූ ජනපදයකින් කුමරියක් ගෙන්වා ඇය සරණ පාවා දීමේ චාන් උත්සවය සඳහා රුපියල් බිලියන කෝටියක් වියදම් වූයෙන් සල්ලි ගණින මැසිම බලා ගැනීම සඳහා ස්ප්‍රේ ගන් එකකින් තීන්ත ගැසීමට පමණක් රුපියල් මිලියන හතලිහක් වියදම් කොට තිබුණි. මෙවැනි දේ කිරීමේ හැකියාව තිබ්බේ රජවාසලට පමණි. අනෙක් කිසිවෙකුත් කිසි දෙයක් නොදැක හිස් අවකාෂය දෙස නෙත් දල්වා සිටියහ. පොලවේ යපස් තිබූ ප්‍රදේශ විශාල වීදුරු ගෝලයක අභ්‍යන්තරයේ ලූ පාසි මෙන් පෙනෙන්නට වූයෙන් ඒවා ද දිනෙන් දින ක්ෂය වෙමින් දෘෂ්ඨි පථයෙන් ඉවත් වී ගියේය. මංගලෝත්සවය සංකේතීය විය. රජතුමා වුවද ඉතාම අපහසුවෙන් සිය ඇහි බැම පමණක් පෙන්වා ගන්නට සමත් වූයේ විශේෂයෙන් ඇහිබැම තීන්තක් නිර්මාණය කරවා ගන්නට ඩියුලක්ස් සමාගමේ විධායක අධ්‍යක්ෂකවරයා කාරුණික වූයෙනි.

මංගල රාත්‍රිය කොහේ පැවැත් වූයේ දැයි කිසිදු වාර්තාවක් නැති වුවද සාමාන්‍ය මිනිසුන් බියෙන් භ්‍රාන්තව සිටියේ එම දෙපළ කොයි මොහොතක හෝ දෙපා පැටලී තමන් වැතිරී සිටින ස්ථානයකට පතිත වී තමුන්ට මරණ දඩුවම් ලබන්නට සිදු වේ යැයි සිතමිනි.

මෙලෙස මංගල රාත්‍රියේද ඉන්පසු උදා වූ අනෙකුත් සියළු රාත්‍රීන් හිදී ද සිය රහසඟ සොයා ගැනීමටත් ප්‍රදර්ශනය කිරීමටත් රමණ ක්‍රියාකාරිත්වයේ පවත්වා ගැනීමටත් ක්ෂණිකව නිපැයූ අලුත්ම කොන්ඩම අවශ්‍ය වූයෙන් එම රජ පරම්පරාවට ඉන් පසුව වර්ගයා බෝ වූයේ නැත.
එනයින් චක්‍රාවාටය සිය දුර්දසා සම්පන්න භෞතිකයන් ගෙන් පීඩා විඳි ක්ෂේත්‍රයෙන් අවුරුදු මිලියන ගණනකට පසුව මිදී නැවත ලෝකයේ ආලෝකය මුදා හරින තත්වයන් උදා වූ කළ පෙර කිසි කලෙකත් නොවූ තරම් ලෝකය සුන්දර බව ඉතිරි වී සිටි මිනිසුන් කීප දෙනෙකුට දැක ගන්නට ලැබී ඇත.

ඉන් පසු සයිමන් නවගත්තේගම අපූරු නවකතාවක් ලියා තැබුවේය. ඒ සාපේක්ෂණී ය. එහි එන පහත සඳහන් උපුටනය පරීක්ෂා කරන විට මෙම කතාවේ එන රජකුමාරයාගේ මංගල රාත්‍රිය පිළිබඳ රහසිගත වාර්තා සයිමන් අතට පත් වූයේ කෙලෙස දැයි සොයා ගැනීම ඔබ සතු වගකීමකි. මක් නිසාද යත් සයිමන් විසින් මේ ප්‍රතිනිර්මාණය කොට ඇති ප්‍රබන්ධය ඔහුගේම මනසින් සිදු වූ දෙයකැයි සිතන්නට ඉඩක් නොතබන්නේ ඔහු‍ට බොහෝ කළකට පෙර මෙම සිදුවීම් මෙම භූමි තලය මත වසර මිලියන ගණනකට පෙර සිදු වී ඇති හෙයිනි.

ඇය යහන පාමුල දණ ගැසුවාය. ඔහුගේ කය වටා දෑත යැවුවාය. ඉතාම මෘදු ව ඔහුගේ වස්ත්‍රය ගැලෙව්වාය. දෑස පියාගෙන දෙතොල හයා ඔහුගේ රහසඟ දෙතොලින් බදා ගන්නට එළඹුනාය.

ඊ ළඟ මොහොතේ දී විවෘත වූයේ විස්මය ජනක දෑසකි. ඈ ඔහුගේ මූණ දිහා විස්මයෙන් බලා සිටියාය. ඔහුට ඇගේ මුහුණ බැලිය නොහැකිය. ඇ‍යගේ මුහුණ තල්ලුකොට ගෙන නැගී සිටි ඔහු කවුළුව වෙත ගියේය. කවුළුවෙන් ඈත බලා සිටි මොහොත කල්පයක් දිග මොහොතක් විය.

අන්තිමේ දී ඔහු කවුළුවෙන් පිටත බලාගෙනම මෙසේ කීවේ ය. එය පහත් හඩින් ඉතා ගැඹුරුව කරන ලද්දා වූ රහස් ප්‍රකාශනයකි.

“මම චෞර නායකයෙක්. කැරලි නායකයෙක්... ඒ ජනපදයේ රාජ පුරුෂයෝ මට දඩුවම් වශයෙන් මගේ රහසඟ ජේදනය කළා.”

ඉන්පසු ක්ෂණයකින් ආ පසු හැරුණු ඔහු දැඩි කෝපයෙන් කෑ ගැසුවේය.

“ඔව්, මගේ පෞරුෂත්වය ඡේදනය කළා... මේ රජ පෙළපතට ඕන වීර පුරුෂයෝ නොවෙයි... උන් කැමති නෑ යෞවන වීර පුරුෂයන්ට! නපුංසකයෝ ඉන්න තරමට උන්ට හොඳයි!”

සාපේක්ෂණී
සයිමන් නවගත්තේගම

ශ්‍රම ශක්ති විප්ලවය

2009-11-27T02:33:00.000-08:00

ශ්‍රමය නැමැති සංගීතය නිසා මම වොල්ගා නදිය වෙත ඇදී ගියෙමි. අද වුවද එම ශ්‍රමකාමී ගීතය මගේ හදවත ප්‍රීතිමත් ලෙස මත් කරවා ලයි. ශ්‍රමයේ වීරෝදාර කාව්‍යයේ රසය මට ප්‍රථම වතාවට වින්දනය කිරීමට හැකි වූයේ කවදා දැයි මට තවමත් ඉතා ‍‍හොඳින් මතක ඇත.

මගේ සරසවි - මැක්සිම් ගෝර්කි

එක්ස් මහත්තයා අත්සන ගසා දමා ඉක්මනින් කාර්යාල ගොඩනැගිල්ලෙන් මහමගට පැන සිය දෑතින්ම තාරපාර හාරා ‍මහ පොලව මතු කර වහා සැඟව ගොස් දෙමටගොඩින් මතුවුයේ තොරතෝංචියක් නැති සිතුවිලි විලක පිහිනමින් අන්දමන්ද සිහියකිනි. ඔහුගේ දෙසවන් මත රැව් දුන්නේ නිධානය සිනමා පටයේ පසුබිම් සංගීතය වැනි වූම ඉමහත් ගුප්තමය මියැසියකි. ඔහු‍ගේ දෑස් මත නලියමින් මැවුනේ වයි මහත්තයා දුරකතනයෙන් කතා කොට ටෙලි නාට්‍ය පිටපත ගැන දැක්වූ හදිසි බව තුලින් මතුවූ යක්ෂාවේශ මුහුණමය. වහවහා සිය සිරුරේ කෂේරුකාව අඹරවමින් පිඹුරු ගමන ඉක්මන් කළ එක්ස් මහත්තයා තීන්දුයි නිවාරණයි කැපයි- තීන්දුයි නිවාරණයි කැපයි- තීන්දුයි නිවාරණයි කැපයි යනාදි වශයෙන් සිතින් එකම වදන් පෙළක් මතුරමින් වීදිය දිගේ අතුරා තිබූ වැසිකිලි පල්දෝරුව දිගේ ඉදිරියට ඇදෙන්නට විය. අහසේ ගිනි බෝලයක් පොළවට පාත් වන්නා සේම හිරු අවරෙ හැරෙමින් තිබූ මොහොතේ එක්ස් මහත්තයා මහමග අයිනේ වූ මෑන්හෝල් එකකින් මතුවී ඒ අසලම වූ හමීඩියාස් ප්‍රදර්ශනාගාරයේ වීදුරු බිත්තිය මත වූ සාරුක් කාන් ගේ ඇඳුම් කට්ටලයට බැස ඒ අසල වූ බස්නැවතුමෙන් බසයක එල්ලී විනාඩි හතලිස් පහක ගමනක යෙදුනේ සෙඩ් මහත්තයාගේ ගෙදර බලා යන්නටය.

"දැන් පිටපතේ කොන්සෙප්ට් එක කොහොමෙයි ? "

"තව ටිකක් විතර ඉතිරියි. ඔක්කොම ලියල ඉවර වෙලත් මම කීප තැනක් වෙනස් කලා නේ‍... "

"හරි දැං මොනවද කපලා දැම්මේ? "

"මේං මේ විස්තර වගයක්...ඒවා එච්චර වැඩක් නැහැයි කියල හිතුනත් එක්කල. ලොකේෂන් බැලුව නිසා මේ ටික ගැලපෙන්නේ නැහැයි කියල එම් මහත්තයා කී‍වා ඊයේ හැන්දෑවේ...එයාට ඕන විදියටම සේරම ලියාගන්න පුළුවන් වුනා කියලා නම් හිතන්න අමාරුයි. "

"කෝ බලන්න... "

***

මුහුදේ සරැලි අතර දියව යන වෙරළ තීරයේ රැඳුවුනු දෑස් මත දැවටුනේ ජීවි‍තයේ රහස යැයි සිතන්නට මිනිසුන් පුරැදු වෙමින් සිටි සමය එය විය යැයි ඔවුන් ඉගෙන ගනිමින් සිටියහ. ඒ මන්ද යත් සිය ජීවිතයේ අපූර්වතම දර්ශනය මුහුදු බඩ සැන්දෑවක හිරැ බැස යාම යයි ඔවුන් අත් විඳි ඒ අති උත්කර්ෂවත් හෝරාව වූ බැවිනි‍. එය හෝරාවක් යැයි සඳහන් කළ ද එය අතිශය අතිශයෝක්තියට නැංවූ නිමේෂයකි. ජීවිතයේ සතුට පවතින්නේ තත්පර ගණන් වලින් බැව් ඔවුන් සියල්ලෝම වටහා ගනිමින් සිටි අතර ඔවුනගේ ප්‍රාග් ‍‍ෛඑතිහාසික ප්‍රොටෝ‍‍කොලය වන මොෂින් මක්මල්බාෆ් සිය රිදීතිර මත ලියමින් හුන් අලුත්ම සිනමා කෘතිය තුල පඨිතය ගොඩනංවමින් හුන්නේ එම තත්පර ගණන් වූ ජී‍වි‍තයේ ප්‍රමෝදය මැනීමේ කාල යන්ත්‍රය තත්පරයෙන් සීයෙන් පංගු මැනිය හැකි කාලමාපක උපකරණයක් වීමේ අවශ්‍යතාවය ගැනයි. කරුණාකර මොෂින් මක්මල්බාෆ් ගැන අ‍වබෝධයක් ලබා තිබීමෙ වටිනාකම දැං ඔබ වටහා ගනිමින් ඉන්නා බව දැනීමෙන් ඇති වූ සංතුෂ්ඨිය හේතුවෙන් මෙම ලියැවිල්ල තවත් දිග් ගැහීමේ අවශ්‍යතාවය මා මග හැරී බව සලකන්න. ‍එහ එසේ යැයි වීමෙන් ඔබට යම් අපහසුතාවයක් ඇති වන්නේ‍ නම් කරුණාකර පරණ රාවය පත්තර ගොන්නක් අවුස්සා මොෂින් මක්මල්බාෆ් ගැන කියවන්න. අවංකවම ඒ ලිපිය කවරදා පළ වුයේ දැයි කීමට තරම් මගේ මතකය තීව්‍රර නැති‍ බැවින් එය වසර දෙදාස් පහේදී විය හැකි බව මගේ අවිඥාණය ඇණවුම් කරනා බැවින් එම වර්ෂයේ පත්තර මිටියක් දිග හැර හෝ ජාතික ලේඛනාරක්ෂකයේ තාවකාලික සාමාජිකත්වයක් ලබා වහ වහා පෙරලා බලා හෝ එම ලිපිය සොයා කියවීම ඔබගේ වගකීමකි.

***

"හ්ම් මේ ටික නම් වැඩක් නැහැ තමයි. තමුසෙත් මොනව හරි ලියන්න කීවම රටේ නැති විගඩං එහෙං මෙහෙං එල්ලලා ලියනවා නේද? මේක කිසිම සම්බන්ධයක් නැහැනේ ඕයි මේ අනිත් කොටස් එක්කලා? "

"ඒක නම් එහෙම තමයි මේ කපාපු ටික මම ලියල තිබ්බේ වෙන වැඩකට ඒත් මේ මම බැලුවේ මොනව මොනව හරි එල්ලලා මේකේ පිටු ගණන වැඩි කරල ... "

"ෂී ෂී අයිෂේ ඔහොම පිටපත් ලියල හරි යන්නේ නැහැනේ? අනික මේක අනුමණ්ඩලේට යවන එකක් නොවෙයිනේ ...අන්න එහෙම නම් නොතේරෙන ඕන මගුලක් දාලා යවන්න තිබ්බා...මොකද ඒකේ ඉන්න එවුන් මේවා කියවන එකක් යැ... කියෙවුවමත් ඉතිං තේරෙන්නේ නැත්නම් කරන්නේ නියමයි කියල පාස් කරන එකනේ‍‍..."

"මේ ටික වෙනම අරං ආයෙම ලියන්න ඕන...මේක අනුග්‍රාහක සමාගමේ ඇප්රෑවල් එකට හෙට දානවා කියල එන් මහත්තයා කීවේ... "

"හරි ‍එහෙනම් ඕක කියවනවා බලන්න... "

***

ඒ ශ්‍රමය පිළිබද අවසන් තීරණයට එළැඹුනු රාත්‍රියයි. සල්ලි කොළ කඳු ගසා පුළුස්සා දමමින් මෙතුවක් කල් ශ්‍රමය සහ වහලා අතර පරතරය නිර්මාණය කළ හුවමාරුවේ අතිරික්තය විනාශ මුඛයට පත් කළ හෝරාවයි.

උදා හිරු මස්තකප්‍රාප්ත වන සුභ හෝරාව ලිත් පිටුවේ මුද්‍රිත අකුරෙන් මිනිස් ඇස වෙත විශ්වාසයේ කූටප්‍රාප්තිය සලකුණු කර තිබූ හෙයින් නිවුටන් ගේ හිතළුවක් වූ සර්වගුරුත්වාකර්ෂණ සමීකරණ තුළත් ඊටත් මෑත මිනිසා විසින් වෘද්ධිගත කරගත් වෘත්ත චලිතයේ සහ ඉලිප්සීය චලිතයේ කාල අවකාශ හැසිරීමත් සන්නිකර්ෂණය කළ ගණිත යන්‍ත්‍රයේ අනුසාරයෙන් උදෑසන හය පසුවී විනාඩි නවයකුත් තත්පර හතළිස් දෙකක දී සූර්ය මධ්‍යලක්ෂ්‍යය ක්ෂිතිජයෙන් මතු වද්දී සියල්ලෝ විශ්වයේ මහා ශ්‍රමාධිකාරය ලෙස ප්‍රස්තාවනාවට පත් කළ සූර්ය දිව්‍ය රාජයන්ගේ සම්ප්‍රාප්තිය අති උත්කර්ෂවත් ලෙස සැමරීමට කඳු පාමුල එක් රැස්ව සිටියහ.

මින් මතු ප්‍රඥප්තියට අනුව සියලු භාණ්ඩ හා සේවාවන් හුවමාරු විය යුතු වූ බැවින් සූර්යෝදාවත් සමගින්ම සියල්ලෝ ශ්‍රමය වගුරන්නට පටන් ගති.

වර්ෂ එක්දහස් නවසිය අසූනවයෙදී නිරීක්ෂණය කළ පරිද්දෙන්ම සූර්යයාගේ උපරිම තාප ඵලය පෘථිවිවාසීනගේ සියළුම කටයුතු කෙරෙහි සෘණාත්මකව බලපෑ ශක්ති විමෝචනයේ අතුරුඵලයක් ලෙස සූර්යා විසින් ජනනය කළ ශක්තියේ උපරිම අගය ගණනය කරගන්න‍ට ලැබීමේ වාසිය අත්විඳි මානව විද්‍යාඥ සංසදයේ අවසන් වාර්තාවට අනුව මහ පොලව වටා ඇති චුම්බක ක්ෂේත්‍රයේ අති සූක්ෂම වෙනස් වීම් මැන ගැනීමේ තාක්ෂණය එළිදරව් වූයෙන් ශ්‍රමය පිළිබඳ චිරාත් කාලීනව පැවති මිථ්‍යා මත බිඳ හෙලා ශක්ති හුවමාරුව පිළිබඳ න්‍යාය ලෝකවාසීන්ගේ ඒකමතික තීරණයෙන් ක්‍රියාත්මක වන්නට වූයෙන් එතුවක් කල් ධන සංචිත පවත්වා ගනිමින් ලෝක ආර්ථික රටාවන් ගලග්‍රහයෙන් පවත්වා ගත් මහ විසාල සංගත දෙදරා බිඳ වැටෙන්නට පටන් ගත් හෙයින් සියල්ලන් ශ්‍රම බලකායට අනුයුක්තව සාමුහික ජීවණය නම් වූ මානව සංහතියේ වඩාත්ම සංවර්ධිත අවධිය කරා පියවර තබන්නට පෙළ ගැසුණි.

ශ්‍රමය යනු ශක්ති‍යේම පරිවර්තනයක් ලෙස වඩාත් පළල් අරුතකින් ප්‍රතිනිර්වචනය වූයෙන් සියලුම මිනිසාගේ ශක්ති හුවමාරුවන් තම තමන්ගේ පෞද්ගලික ඉපැයීම් ලෙස ජූල් නමැති ඒකකයකින් මැන ශරීරයේ තැන්පත් කළ චිපයක ආධාරයෙන් ශරීරයේ ක්‍රියාකාරිත්වයට අදාල ශක්ති ප්‍රමාණය සහ පේශිවල සහ මොළයේ නියුරෝන වල ශක්ති පරිවර්තන සසඳා දිනපතා අතිරික්ත ලෙස වගුරන ලද ශ්‍රමය නිශ්චිත වශයෙන් ගණනය කරගැනීමේ තාක්ෂණවේදය පෘථිවිවාසීන්ට ප්‍රයෝජනයට ගත හැකි අයුරින් ක්‍රියාත්මක වූයෙන් එතැන් සිට ශරීරයට බාහිරින් වූ කිසිවක අයිතියක් යැයි දෙයක් හෝ පෞද්ගලික දේපළ ක්‍රමයක් හෝ නොපවතින්නට වූයෙන් කිසිවකුත් මූලික අවශ්‍යතාවයන් කෙරෙන් විවිධත්වයකට හෝ අසමානත්වයකට පත් නොවුනි.

සියල්ලෝ සෘජු හෝ වක්‍ර ශ්‍රමිකයන් වූයෙන් මොළය වෙහෙසන්නන්ට මෙන්ම කය වෙහෙසන්නන් ද සම ලෙස සියළු සම්පත් පරිභෝජනය කිරීමේ අවකාශ ලද්දෙන් මිනිස්සු අතිශය තෘප්තිමත් ජීවිත අත්කර ගත්හ.

ගෝලීය ලෙස එකඟතාවයට පත් වූ ශ්‍රම ශක්ති විප්ලවයේ ජයග්‍රහණය උදෙසා සිය ජීවිත කැප කළ සියල්ලන් වෙනුවෙන් කෘතගුණ දැක්වීමටත් අලුත් ලෝකයකට හිරු උදාවන මොහොතේ එම අකාලික සංතුෂ්ටිය බෙදා හදා ගැනීම උදෙසා විවිධ භාෂා සහ සංස්කෘතීන් හරහා මෙම ශ්‍රම ශක්ති විප්ලවයේ ජීව ගුණය පිළිබඳ අදහස් බෙදා ගැනීම පිණිසත් සිය බුද්ධිය මෙහෙය වූ විද්වත් කමිටුවේ සභාපතිගේ දේශණය ඉන් පසු ලෝකවාසීන්ට අසන්නට ලැබුනේය.

***

අද අප පා තබා යන්නේ අනාගතයටයි. මිනිස් සංහතිය සිය බුද්ධි බල මහිමයේ ප්‍රායෝගික සී‍මාවේ තවත් නිම්වළල්ලක් පසු කර ඉදිරියට ඇදෙන මොහොතක පෘථිවිවාසි ඔබ සැම මෙලෙස අමතන්නට ලැබීම මෙම ශ්‍රම ශක්ති විප්ලවයේ ජයග්‍රහණයේ ‍උණුසුමට අපගේ මැදිහත් වීමේ අවංක සංතෝෂය ද්විගුණ වන්නටත් ඔබ සැම වෙත මෙම ශ්‍රම ශක්ති විප්ලවයේ සැබෑ උරුමයන් පැහැදිලි කරදීමටත් අවස්ථාවක් ලෙස සලකමි.

ඔබ අප සැවොම දන්නා පරිදි මින් මතුවට අපට වැටුප් ගෙවන්නන් නැත. තම තමන් ශ්‍රමය වැයකර ජූල් උපයා ගත යුතුයි. මේ කාරණය පිටුපස ඇති තාක්ෂණය කාටත් සරලව වැටහෙන දෙයක් නොවුනත් අප විසින් ජය ගෙන ඇති තාක්ෂණ ප්‍රවණතා කීපයක සංකලනයක් ලෙස මෙය හඳුන්වා දෙන්නට මට අවස්ථාව දෙන්න. ප්‍රධාන වශයෙන්ම ඔබ සියල්ල අත පළඳා ඇති වළල්ලේ ඇති චිපයක් ආධාරයෙන් ඔබ දෛනිකව උපයන විශිෂ්ඨ ජූල් ප්‍රමාණය සටහන් වෙනවා. ඒ ජූල් ප්‍රමාණයට ඔබගේ මානසික ශ්‍රමය ද අයත් වෙනවා. ඔබ සැවොම දන්නා පරිදි සෑම වේලාවකම ඔබ උපයා ගත් ජූල් ප්‍රමාණය අපගේ පරිඝණක ජාලයට එකතු කර ඔබගේ ගිණුම යාවත්කාලීන කරන්නට හැකියාව තියෙනවා. ඒ අනුසාරයෙන් වැඩියෙන් කය සහ මනස වෙහෙසවන්නන්ට වැඩියෙන් ජූල් උපයා ගන්නට හැකියාව තියෙනවා. කවුරුත් දැන් දැනුවත් කර ඇති පරිදි මෙම පද්ධතියේ සංවේදිතාවයට හිරුගේ පෘෂ්ඨය මතුපිට සිදුවන න්‍යෂ්ටික ප්‍රතික්‍රියාවල විලනයන් බලපානවා. ඒ හැම අවස්ථාවකදීම පෘථි‍වියේ චුම්භක ක්ෂේත්‍රයේ සිදුවන වෙනස් වීම් ගණනය කර ඔබගේ ජූල් ඉපැයීම් වලට සිදුවන හානිය අප සංශෝධනය කරනවා. මේ ගැන කිසිවෙකුටත් කිසිම ආකාරයක අසාධාරණයක් නොවන ලෙස පද්ධතිය අපගේ සනාතනික විමර්ශනයට ලක්වෙනවා. මේ ගැන අප සියල්ලන් ඉතාම සතුටු විය යුතුයි. ඒ වගේම තම තමන් කැමති ආකාරයෙන් විශ්ව ශක්ති සංචිතයට දායක විය හැකියි. ඒ තම තමන් උපයන ජූල වලින් ඉතාම ක්ෂුද්‍ර කොටසක් ස්වේච්ඡාවෙන් ලබා දීමෙන් ශ්‍රමය වැගිරීමේ අපහසුතාවයෙන් පෙලෙන්නන්ට නැවත ලබා දීමට කටයුතු යොදන්න පුළුවන්. ශ්‍රමය වැගිරවීමේ අපහසුතාවයන් ඇත්තන් ලෙස වයස අවුරුදු දහ අටට අඩු දරුවනුත් වයස අවුරුදු හතළිස් පහට වැඩි අයත් සලකන්නට තීරණය කර ඇති නිසා මේ ශ්‍රම ශක්ති සංචිතය බොහෝ පිරිසකට ජූල සපයන්නට උපකාරී වන බව අපගේ විශ්වාසයයි. සූර්ය ශක්තියෙන් ක්‍රියාත්මක වන සියළුම යන්ත්‍ර හේතුවෙන් ගමනාගමන සියල්ලන්ට පොදු සේවාලෙස තමන් උපයා ගත් ජූල් වලින් ඉතාම ක්ෂුද්‍ර කොටසක් වැය කිරීමෙන් එම සේවා ලබා ගත හැකියි. ඒ නිසා කිසිවෙකුටත් පෞද්ගලික් වාහන වල අවශ්‍යතාවයක් නැහැ. සියලු ගමන් බිමන් සඳහා ප්‍රවාහන පද්ධති ඇති නිසා කිසිවෙකුටත් මිල මුදල් ගෙවා කිසිවක් කර ගැනීමේ අවශ්‍යතාවයක් නැහැ.

ඉතිං මේ ක්‍රමයේ පදනම කුමක් ද? කාට හරි එහෙම ප්‍රශ්නයක් හිතට නැගෙන්නට පුළුවන්. මේ පිළිබඳ අපි ඉතාම වැදගත් සිද්ධාන්ත කීපයක් අනාවරණය කරගෙන තියෙනවා.
මූලික වශයෙන්ම විශ්වයේ පවතින්නේ ශක්තිය පමණයි. ඒක දැන් අපි ප්‍රායෝගික භාවිතයක් ලෙස මුදල් විස්ථාපනය කිරීමට භාවිතා කිරීම පමණයි අලුතින් සිදුවී ඇත්තේ මෙම විප්ලවය හරහා. ශක්තිය පමණයි ප්‍රාථමික වන්නේ. අනෙකුත් සියල්ල‍ මේ පවතින ශක්තියේ නොයෙකුත් ආකාර පමණයි. ශක්තිය නිසා ද්‍රව්‍ය හට ගන්නවා.‍ ද්‍රව්‍ය නිසා අවකාශය නිර්මාණය වෙනවා. ද්‍රව්‍ය තුල ගබඩා වී ඇති ශක්තිය අපට ගණනය කරන්න සමීකරණයක් සොයල දීල තියෙනවා අපේ විශිෂ්ඨතම ප්‍රාඥයා අයින්ස්ටයින් විසින්. අපට පුළුවන් ඕනම පදාර්ථයක ගැබ්වෙලා කැටිවෙලා තියෙන ශක්ති ප්‍රමාණය ගණනය කරගන්නට- එම ශක්තිය සමානයි ස්කන්ධය සහ ආලෝකයේ ප්‍රවේගයේ වර්ගය නමැති සුප්‍රසිද්ධ සමීකරණයෙන්. දැන් අපි ඒක වඩාත් දියුණු කරල තියෙනවා චිත්ත ශක්තිය දක්වා මිනුමේ ක්‍රමයක් දක්වා. චිත්ත ශක්තිය මැනීමේ දී අපි මොළයේ නියුරෝනවල ශක්ති වෙනස සොයා ගන්න උපක්‍රම දියුණු කරල තියෙනවා. ඒවා අතිශය ක්ෂුද්‍ර විචලනයන් බැවින් මාංශ ‍පේශී චාලක ශක්තිය බවට පරිවර්තනය වන ජූල සෙවීම තරම් පහසු නොවුනත් ඒ සඳහා අපි දියුණු කරගත් න්‍යායන් ප්‍රායෝගිකව යොදා ගැනෙනවා‍.
ශරීරයේ දෛනික පැවැත්මට නිරන්ත‍රයෙන්ම වැය වන ශක්ති ප්‍රමාණය වෙනම පෙරා ගන්නට පුළුවන් විදියට අපි මේ අතේ බැඳ ගන්නා චිපයේ සංවේදකයන් නිර්මාණය කරල තියෙනවා. ඒ අනුව කෙනෙකුගේ සෞඛ්‍ය තත්වය පිලිබඳව ඉතාම වැදගත් පෙරයීම් කරගැන්මට පවා පුළුවන්. ඒවා මේ පද්ධතියේ අතුරු ඵල ලෙස හඳුන්වන්නට පුළුවනි.

භාණ්ඩයක ජූල මිල තීරණය වන්නේ එම භාණ්ඩය නිෂ්පාදනය සඳහා වැය වූ ශ්‍රමිකයන්ගේ ජූල් ප්‍රමාණය සහ එම එකලස් කළ ද්‍රව්‍යයන්ගේ අන්තර්ගත ශක්ති ප්‍රමාණය ජූල්වලට පරිවර්තනය කළවිට ලැබෙන අගයන්ගේ සමාකලනයෙන්. එවිට පරිගණකයක මිලට සමාන ජූල් ප්‍රමාණයක් උපයා ගන්නට මිනිසෙකුට දින හතලිස් හතරක් දවසට පැය අටක කාලයක් සිය ගෙවත්තේ වගා කටයුතුවල යෙදීමෙන් උපයා ගත හැකියි.

මිනිසුන් නිරෝගි බව පවත්වා ගැනීමට කරනු ලබන ශාරිරික ක්‍රියාවලදී ද ජූල් උපයා ගන්නට උපකාරීවීම නිසා මිනිසුන් නිරෝගි වීමේ ප්‍රවණතාවය පිළිබඳ මිනිස් සංහතියේ කිසි කලෙකත් නොවූ තරමින් උනන්දුවක් උද්‍යෝගයක් හට ගත්තෙන් සෞඛ්‍ය සේවාවන් සඳහා ආයෝජනය කළ යුතු ජූල ප්‍රමාණය දැවැන්ත ලෙස අඩු වීමෙන් ලෝක ජනගහණයේ අපේක්ෂිත ආයුෂ ද වර්ධනය වීය.

සංගීතය හෝ වෙනත් කලා නිර්මාණයන්ගේ වටිනාකම අතිශය ලෙස ජූල වශයෙන් ඉහල යාමත් ඒ හෙයින්ම නිර්මාණකරණයේ යෙදෙන්නවුන්ට තෘප්තිමත් යුගයක් උදා විය.

තම ප්‍රථම සිනමා නිර්මාණය වෙනුවෙන් ජූල වැය කළ අධ්‍යක්ෂකවරයෙකුට උපයා ගත හැකි වූ අතිරික්ත ජූල ප්‍රමාණයෙන් ශ්‍රම ශක්ති සංචිතයට පරිත්‍යාග කල ජූල ප්‍රමාණය කොතරම් වටිනාකමක් ගත්තේද යත් එම ප්‍රමාණය සාමුහික ගොවිපලවල් දහයක සේවා සඳහා ජල සහ විදුලි සැපයුම් ප්‍රමාණයට පරිවර්තනය කරන්නට හැකි විය.

ශ්‍රම ශක්ති විප්ලවය සදා කල් රැඳුනු මිනිස් උන්නතියේ සිහිවටනයක් ලෙස පැවතුනි.

මිනිස් සංහතිය දුටු චමත්කාරජනකම සිහිනය එලෙස මල්ඵල ගැන්විණි.

***

"තමුසේ හිතනවද මේක අනුග්‍රාහක කොම්පැණිය අනුමත කරයි කියල? "

On Line පාංශුකූල

2009-11-14T10:08:00.000-08:00

On Line පාංශුකූල

මහාචාර්යවරයා කුදලාගෙන විත් අඳුරු කුටි‍යකට දමා එහි වූ දැවැන්ත යකඩ දොර වසා දමන ලදී. දින තුනක් ඝණ අන්ධකාරයේ සිටි හෙතෙම හතරවන දිනයේ දී යකඩ දොර හැර බලද්දී මරණාසන්නව සිටියෙන් ඔහුගේ දෙකකුලින් ඇද කුටියෙන් එළියට ගත් වදකයෝ ඔහුව වත්තං කරගෙන ගොස් කොන්ක්‍රිට් බංකුවක් මත හොවා මුහුණට වතුර ඉස බලා සිටියහ.

"කෝ උඹගේ ලියවිල්ල හංගපු තැන? කියපං දැංවත්? "

මහාචාර්යවරයා දෙනෙත් හැර පියා නිසොල්මනේ හිරු දෙස බලා සි‍ටිනායුරින් දෑස් අර්ධයක් දල්වා වික්ෂිප්තව සිටියේය. ඉන් මොහොතකට පසු හෙතෙම අවසන් හුස්ම හෙලූයෙන් ඔහු ලියූ ලියැවිල්ල කිසි දිනෙක කිසිවකු අතට පත්වන්නට ඉඩක් නොමැති බවත් එය අනාවරණය කර ගැනුමට දැරූ අවසන් ප්‍රයත්නයත් ව්‍යර්ථ වූ වග වදකාගාරය භාරකරු වහා ඉහලට දන්වා සිටියේය.

මෙම ලියැවිල්ල ඉන් වසර හතලිස් පහකට පසු විශ්ව විද්‍යාලයේ පැරණි ලිපි ලේඛන සංරක්ෂණාගා‍රයේ බිත්තියක වූ ලෑලි වරිච්චියක් අලුත්වැඩියාවට ගලවමින් සිටිය දී රහසිගත ලෙස සඟවා තිබූ ‍කඩදාසි බම්බුවක් තුළ ‍සුරුණ්ඩු වී තිබුයෙන් වඩුවන් අතට පත් විය.

එම වඩුවන් විසින් පරිස්සම් කර ගෙන මා කරා පැමිණෙන තෙක් මේ ලියැවිල්ල කිසිවෙකුත් විසින් නොකියවා තිබූ බව මම හොඳින්ම දනිමි.

***

විශ්ව විද්‍යාලයේ උපාධි පාඨමාලා වර්තමාන ආර්ථික ව්‍යුහයට නොගැලපෙන්නේ යැයි වසර දෙසිය දහතුනකට පසුව සොයා ගැනීමෙන් පසුව වහාම ක්‍රියාත්මක වන පරිදි සියළු පාඨමාලා සංශෝධනය කොට ක්‍රියාත්මක කළ යුතු වගට- පැවතුන අධ්‍යාපන ක්‍රමයට අනුව සාමාන්‍ය පෙළ විෂයන් අටෙන් විෂයන් තුනක් සමත් වී සිටි අධ්‍යාපන අමාත්‍යවරයා වහා චක්‍රලේඛයක් නිකුත් කරන්න වූයෙන් ඩිජිටල් ක්‍රමෝපායන් අනුසාරයෙන් ප්‍රවෘත්ති නිර්මාණය පිළිබඳ උපාධි පාඨමාලාව - පොත් නොකියවා පොත් ගැන කතා කිරීමේ උපාධි පාඨමාලාව - තුවක්කු සහ වෙඩි උණ්ඩ ප්‍රතිචක්‍රීකරණය පිළිබඳ උපාධි පාඨමාලාව ද සියදිවි නසා ගැනීම පිළිබඳ උපාධි පාඨමාලාව ද ඇතුළුව පන්සිය පනස් පහක් වන නව උපාධි වහාම ක්‍රියාත්මක වන පරිදි සංශෝධන පාඨමාලා ලෙස හඳුන්වා දීමේ ක්ෂණික අවශ්‍යතාව පැන නැගී ඇති බව මේ පිළිබඳ පර්යේෂණයේ යෙදුනු ත්‍රිපුද්ගල කමිටුව සිය අවසන් නිරීක්ෂණ වාර්තාවට ඇතුළත් කර තිබූයෙන් එම පාඨමාලා අතරින් සමහරක් ඉගැන්වීම පිණිස දැනට අධ්‍යයන ක්ෂේත්‍රයේ පර්යේෂණ කටයුතු ලෙස යම් යම් දේවල් කරමින් සිටි කිසිදු මහාචාර්යවරයෙකු අසමත් බව ද සොයා ගැනීමෙන් අනතුරුව මෙම පාඨමාලාවන් ඉගැන්වීමට සමත් අයගෙන් ඉල්ලුම් පත් කැඳවීමට විශ්වවිද්‍යාල අමාත්‍යාංශය තීරණය කරන ලදි.

සන්නිවේදනය පිළිබඳ රටවල් දහතුනක දේශණ පවත්වන, ඒ නිසාම චිරප්‍රසිද්ධියට පත් දැනට විදේශගතව සිටි එක්තරා මහාචාර්යවරයෙකු නැවත දිවයිනට ගෙන්වා ගැනීම උදෙසා ඩොලර් මිලියන පහළොවක ඇස්තමේන්තුවක් අනුමත කරවා ගැනීමට අධ්‍යාපන ඇමති කරා පැමිණි විශ්වවිද්‍යාල අමාත්‍යාංශයේ ලේකම් මහතාගේ වැඩ තහනම් කොට බරපතල වැඩ සහිතව බන්ධනාගාර ගත වන්නට සිදුවූයේ එම පාඨමාලාව ඉගැන්වීම උදෙසා රට තුලම ජිවත් වූ ජන සන්නිවේදනය පිළිබඳ කෙළ පැමිණි නිවේදිකාවක් සිය ඉල්ලුම් පත්‍රය ඇමතිවරයා වෙත එක්තරා හිම වැටෙන රටක දී පැවැත්වූ සම්මේලනයක් ආවරණය කරන්නට ගොස් සිටිය දී ඇමතිවරයාගේ ඇ‍ඳේ කොට්ටය යට තබා එන්නට ඇයට හැකි වීමෙන්ය. අවසානයේ ජන සන්නිවේදන පාඨමාලාවට ඇඳක කොට්ටය යට ඉල්ලුම් පත්‍රයක් තබා ඒමේ කෞෂල්‍යය ප්‍රායෝගිකව අත්හදා බලා එම පාඨමාලා හදාරන්නියන් වහ වහා උසස් ජන සන්නිවේදිකාවන් බවට පත් වීමත් සමග විශ්ව විද්‍යාල පාඨමාලා කෙරෙහි පොදු ජන ප්‍රසාදය අතිශය ලෙස ඉහල යන්නට වූයෙන් නිදහස් අධ්‍යාපන ක්‍රමයෙන් දුප්පතුන්ට මෙවැනි උසස් පාඨමාලා උගැන්වීමෙන් ආර්ථිකයට වන හානිය පිළිබඳ රහසිගත වාර්තාවක් ඇමතිතුමා ලදුයෙන් එම පාඨමාලා සහතික සියල්ලම මුදල් ගෙවා ඇමරිකාවේ කොන්ඩලීසා රයිස් මහත්මියගේ අත්සනින් නිකුත් කිරීමට හැකි වන පරිදි ජාත්‍යන්තර විශ්ව විද්‍යාල බල මණ්ඩලය ක්‍රියාත්මක වූයෙන් ඉන් පසුව ටෙන්ඩර් කැඳවීමකින් අනතුරුව එම පාඨමාලාව සඳහා සිසුවියන් ඇතුලත් කරගැනීමේ සාර්ථක ක්‍රමයක් අත්හදා බැලුණූ අතර එය අතිශය සාර්ථක වීමත් සමග නිවේදන ක්ෂේත්‍රය කාන්තාවන්ගෙන් බැබළීමත් සමගම පුරුෂාධිකාරය බිඳලන්නට හැකි වීම පිළිබඳ ජාත්‍යන්තර කාන්තා සංවිධාන සියල්ල එකතුව දැවැන්ත මෙගා සංගීත රාත්‍රියක් ප්‍රේමදාස ක්‍රීඩාංගනයේ පැවැත් විණි.

ඩිජිටල් ක්‍රමෝපායන් අනුසාරයෙන් ප්‍රවෘත්ති නිර්මාණ කලාව පිළිබඳව නිපුණතා පෙන්වූ එකුදු මහාචාර්යවරයෙකු රට තුළින් සොයා ගැනීමට නොහැකි වූයෙන් ඒ සඳහා වහ වහා සී එන් එන් සහ බී බී සි ආයතනවල පළපුරුදු ප්‍රවෘත්ති නිශ්පාදකයන් කණ්ඩායමක් රට තුලට ගෙන්වා ගැනීමට යෝජනා වෙද්දී පිටකොටුවේ මල්වත්ත පාරෙන් ඉදිරිපත් වූ වැන්ඩස්ටාර්ටන් මහතා ඒ සඳහා නිපුණයෙකු වග අමාත්‍යවරයා පෞද්ගලිකව දැන සිටි හෙයින් එම පාඨමාලාවේ අධ්‍යක්ෂ තනතුර ද ගමන් බිමන් සඳහා ත්‍රීවීල් රථයක් ද ලබා දීමෙන් අනතුරුව ඩිජිටල් ක්‍රමෝපායන් අනුසාරයෙන් ප්‍රවෘත්ති නිෂ්පාදනය පිළිබඳ උපාධි පාඨමාලාව ආරම්භ වූයේ අධ්‍යාපන අමාත්‍යවරයාට එංගලන්තයේදී ආචාර්ය උපාධියක් පිරිනමන ආකාරය ඩිජිටල් තාක්ෂණ අනුසාරයෙන් සජීවි ලෙස ප්‍රති නිර්මාණය කර රාත්‍රී අටේ රූපවාහිනි පුවත් මගින් විකාශය කිරීමත් සමගය. එම ප්‍රවෘත්තිය කොතරම් තාත්වික ලෙස ඩිජිටල් ගත කර තිබුනේ ද යත් බ්‍රිතාන්‍ය අග්‍රාමාත්‍යවරයා අත්පොලසන් දෙමින් එහාට මෙහාට යන අයුරුද ඔහුගේ ආරක්ෂකයන් ද ඔහුට අනුව අත්පොලසන් දෙමින් විසිල් ගසමින් සිය කළවා වල හම් පටිවලින් සැදි රහසිගත කොපු තුල සඟවා තබා ඇති දැලි පිහි පවා මතුවී පෙනෙන ආකාරයට නිර්මාණය කර තිබූ හෙයින් ද මෙම ඩිජිටල් ප්‍රවෘත්ති කලාව ගැන තරුණ කොටස් උමතුවෙන් ඉල්ලුම් පත් එවන්නටත් දෙමව්පියන්ට ඇවිටිලි කරන්නටත් වූයෙන් පසුව පැවැත්වූ තරග විභාගයකින් සමත් වන්නන්ට පමණක් ඩොලර් ලක්ෂ තුනක් වාරික ක්‍රමයට ගෙවීමෙන් පාඨමාලාව සඳහා ඇතුලත් කර ගැනුණි.

එම ඩිජිටල් ප්‍රවෘත්තියේ ඇමතිවරයා සිගරට් කොටයක් බ්‍රිතාන්‍ය අග්‍රාමාත්‍යවරයා සමග හුවමාරු කරගන්නා දර්ශනය විකාශ වන්නට නොදී නවත්වා ගත්තේ අනූ නවයෙනි. එය ප්‍රවෘත්තිය විකාශ කිරීමට පෙර පරීක්ෂා නොකළ ප්‍රවෘත්ති වැඩසටහන් අධ්‍යක්ෂක වහාම සිනමා ශාලාවක චිත්‍රපට දුවවන යන්ත්‍රයක වසර හතරක පුහුණුවකට යවන්නට ජාතික ආධුනිකත්ව මණ්ඩලය හරහා රෙකමදාරු වූ බව ආණ්ඩුවේ ඕපා දූප ජාත්‍යන්තරයට ප්‍රචාරය කරමින් ඩොලර් කෝටි ගණන් උපයන අන්තර්ජාල වෙබ් අඩවියක සඳහන්ව තිබුණි. වැඩි දුරටත් එම දඩුවම ගැන අදහස් දක්වා තිබූ එම අඩවිය පැවසූයේ එම ප්‍රවෘත්ති අධ්‍යක්ෂවරයාට චිත්‍රපටි රීල් එකක් වම් ප්‍රොජෙක්ටරයෙන් දකුණට හෝ දකුණෙන් වමට මාරු වන අවස්ථාවේ දී තිරයේ දකුණු කෙළවරේ ඉහළින් පෙනී නොපෙනී යන කුඩා රවුම් ගැන අවධානයෙන් සිට කාලය ගැනීමට පුහුණු වීමෙන් මෙබඳු ප්‍රවෘත්ති විකාශය කරන අතරතුර සිදු විය හැකි දෝෂ වලක්වා ගැනීමට මනා පුහුණුවක් ලැබෙන බවය. ප්‍රවෘත්ති අධ්‍යක්ෂවරයා තම සමීපතම හිතවතුන්ට පවසා තිබ්බේ පණ බේරී ඔයින් ගියා ඇතැයි කියාය.

ඩිජිටල් ක්‍රමෝපායන් අනුසාරයෙන් ප්‍රවෘත්ති නිර්මාණය පාඨමාලාව හැදෑරු පසු ඒ අය එංගලන්‍තයේ සහ ඇමරිකාවේ විවිධ ප්‍රවෘත්ති නිෂ්පාදන කටයුතු වල යෙදෙන බවත් සිය මවුරට කරා නැවතත් එම ප්‍රවෘත්ති එවීමට තරම් ඔවුන් කාරුණික බවත් එම කෘතිම ප්‍රවෘත්ති සඳහා රාජාණ්ඩුවෙන් ඔවුනට වැඩිදුර අධ්‍යාපනය සඳහා වියහියදම් දරන බවත් ප්‍රචලිත වීමෙන් පසු වැන්ඩස්ටාර්ටන් සිය පෞද්ගලික විශ්ව විද්‍යාලයද විවෘත කරන්නේ අගනුවර අතිශය මිල අධික ඉඩම් සහිත ප්‍රදේශයක අක්කර විසිහතරක භූමියක දැවැන්ත පරිඝනක විද්‍යාගාර සංකීර්ණයක් ඉදිකිරීමෙන් ය. පුපුරා යන බෝම්බයක් සජීවිකරණය සහ එම අවස්ථාවේ දී මිනිස් සිරුරු කැබලි වන ආකාරය පිළිබඳ දිනෙන් දින ඉතාම නිවැරදි පරිඝණක වැඩසටහන් අනුසාරයෙන් වීඩියෝ පට නිපදවන්නටත් මිනිසුන් කා අතින් වුවද ඝාතනයට ලක් වන සෑම ක්‍රමයක්ම ඉතාම සජීවි ලෙස නැවත නිර්මාණය කිරීමටත් මොවුන් රුසියන් වූහ.මෙම විශේෂඥයන් බො‍හෝ දෙනෙක් ප්ලේ ස්ටේශන් වීඩියෝ ක්‍රීඩාවල පරිණත අයවලුන් වීම ද සුවිශේෂි කාරණයකි. අවශ්‍යතාව අනුව ඕනෑම ආකාරයක වීඩියෝ පට නිර්මාණය කරන්නටත් ඒවා සුරක්ෂිතව අවශ්‍ය වාර්තාකරුවන් වෙත ලබා දීමටත් නැවත එම වීඩියෝ පට වෙනත් අනන්‍යතාවයකින් විකාශන සමාගම් වෙත ලබා දීමේ උපක්‍රමත් මෙම පාඨමාලාවට අයත් විය. මෙමගින් එකම සිදුවීමක් අරභයා විවිධ පසුබිම් විවිධ පුද්ගලයන් අන්තර්ගත පරස්පර ප්‍රවෘත්ති ද එක ලෙසම විකාශනය වීම සාමාන්‍ය දෙයක් බවට ද පත් විය. කිසිවෙකුත් ඒ ගැන මැසිවිලි නොකියන්නට වූයේ මෙම ප්‍රවෘත්ති විකාශ වින්දනාත්මක වැඩසටහන් ලෙස අනෙකුත් ප්‍රසාංගික වැඩසටහන් අතරතුර නරඹන්නට සියල්ලන් සැදී පැහැදී සිටි බැවිනි.

තවද වැඩි ලාභාපේක්ෂාවෙන් මෙම විද්‍යාගාරයෙන් නිපද වූයේ ඇමතිවරුන් මැතිවරණ රැලි අමතා කතා කරන ආකාරයත් ජනතාව අත්පොලසන් දෙමින් ඒවාට හුරේ දමන ආකාරයත් ය. මෙම වීඩියෝ පට එම ඇමතිවරු ඉතා ඉහළ මිල ගණන් ගෙවා වැන්ඩස්ටාර්ටන් ගෙන මිල දී ගෙන තම නායකයාට පෙන්වීමෙන් පෙර කිසි කලෙකටත් වඩා සිය වෘත්තීය කටයුතු ඉමහත් විවේකයෙන් සිදු කරන්නට වීමෙන් අනාගත සියළු මැතිවරණ වලින් පාලක පක්ෂය පරාජයට පත්වන වග දැන සිටි විපක්ෂය ද සිය සංචිත ධනය ආයෝජනය කොට වැන්ඩස්ටාර්ටන් විශ්ව විද්‍යාලයට නොදෙවෙනි විශ්ව විද්‍යාලයක් අගනුවරට බැහැරින් ආරම්භ ‍කලෙන් එම පාඨමාලා සඳහා දුර බැහැර පෙදෙස්වල තරුණ පිරිස් ආකර්ශණය කරගත් හෙයින් ඔවුන ද තම දුෂ්කර ප්‍රදේශවල ජීවන තත්වය ඉතා උසස් ලෙස පෙනෙන වීඩියෝ නිර්මාණ සකසා ඉහළ මිල ගණන් වලට විකුණා වහ වහා අගනුවර ඉඩකඩම් මිල දී ගෙන සිය ගම් පෙදෙස්වලින් සංක්‍රමණය වූයෙන් රටේ නායකයන් අතිශය සංතෘප්තියෙන් මෙම කෘත්‍රිම වීඩියෝ නරඹමින් කාලය ගත කළහ. එමෙන්ම තමන්ට විරුද්ධව වීඩියෝ පට නිර්මාණය වන සියළු අවස්ථාවලදී ඒවා කෘතිමව නිර්මාණය කොට ඇති වගට පර්යේෂණ වාර්තා සකස් කිරීමට ද මෙම තාක්ෂණික විශේෂඥ උපාධිධාරීන්ට හැකි වූයෙන් කොයි අතිනුත් වාසි සහගත ජීවන ක්‍රමයක් ඔවුහු උදා කරගත්හ. මැති ඇමතිවරු සතුටින් කාලය ගත කළහ. ඔවුන් විනෝදයට කළේ බේරේ වැවට ඉහළින් පියාසර කරන කාක්කන් රංචු පිටින් වෙඩි තැබීමය.

පොත් නොකියවා පොත් ගැන කතා කිරීමේ පාඨමාලාවට කිසිදු බාහිර කැඳවීමකින් තොරව විවිධ ශ්‍රේණිවල මහාචාර්යවරුන් සොයා ගැනීමට හැකි වූයෙන් එම පාඨමාලාව අතිශය සාර්ථක වූයෙන් නවීන විචාරකයන් සහ නිර්මාණකරුවන් බුරුතු පිටින් විශ්ව විද්‍යාලවලින් පිට වන්නට පටන් ගත්තෙන් සාහිත්‍ය කලා ආදියේ නැවුම් ප්‍රබෝධයක් හට ගත්තේ, ගමේ කෝපි කඩවල පවා ගැමියන් දාං අදිමින් කතා කරමින් සිටියේ මිචෙල් ෆූකෝ ගැනය නැත්නම් රෝලන්ඩ් බාත් ගැනය එසේත් නැත්නම් සාත්‍රෙ ගැනය. ඩෙරීඩා ගැනද ඔව්හු කතා කළහ. ලැකාන් ගැන නොදත් කිසිවෙකු සොයා ගැනීම උගහට විය. සමහරු ලැකාන් කෝට්ටේ ගියා වැනි යැයි පිරුළු ද එදිනෙදා ව්‍යවහාරයට ගත්හ. හැමෝම රාත්‍රි කාලය ගත කළේ ස්වයංක්‍රීය ගිණි අවි සුද්ද කරමිනි. පොලිෂ් කරමිනි.

විචාරකයන් පොත් කියවීමට කාලය ගත කිරීමට වඩා එම පොත් ගැන අනෙක් විචාරකයන් ලියා ඇති දේවල් සහ අන්තර්ජාලයෙන් උපුටා ගත් කොටස් නැවත නැවත මිශ්‍ර කර අළුත් ලිපි ලිවීමත් තව දුරටත් සිනමා කෘති බවට පත් නවකතා කියවනු වෙනුවට සිනමා පටය නරඹා එම නවකතාව ගැන විචාර ලිවීමේ ක්‍රම ද කිසි ‍දිනෙක නොකියවූ පොත් ගැන සාරාංශ ලියා ඇති පොත් වෙනම ඇති හෙයින් ඒවා පරිශීලනයෙන් තමන් ද එම පොත් කියවා ඇති ලෙස රඟ දැක්වීමේ ක්‍රම ද මෙම උපාධි පාඨමාලාවට අයත් විය. මෙහි විශේෂිතම යෙදවූම වූයේ රටේ පැවති හාරසිය අසූ හතක් වූ ග්‍රන්ථ සම්මාන උළෙලවල් සඳහා පොත් තෝරා සම්මාන පිරිනැමීමේ දුෂ්කරතාවය ජය ගැනී‍මට වෙන් වූ ක්‍රම වේදයන් ශාස්ත්‍රීය ලෙස හදාරා ඉදිරිපත් කර තිබුනු විෂය කොටසයි. එම විෂය කොටස අතිශය ජනප්‍රිය වූයේ මේ නොයෙක් උළෙලවල දී පොත්වලට සම්මාන දීමේ දී ද මුල් පිටු හැටක් පමණ කියවා කාලය ඉතිරි කරගෙන සහ වැඩිම පොත් ප්‍රමාණයක් කියවූ බවට පත්‍රිකා පුරවා ඒ වෙනුවෙන් ගෙවන දීමනා වැඩිපුර ලබා ගැනීම පිණිස කතෘවරුන්ට දුරකතනයෙන් කතා කොට පුස්තකවල අන්තර්ගතය සහ අනෙකුත් සියළු තතු අසා දැනගෙන ඒ ගැන හේතුපාඨ ලිවීමේ කලාව යි. මෙය සියල්ලන්ගේ පැසසුමට ලක්වූ පාඨමාලාවක් බවට පත්වූයේ මේ සියළු හේතු වෙනි. මේ සියල්ල මේ ආකාරයෙන් සිදු වන බව සියල්ලන් දැන සිටීම නිසා කිසිවෙකුත් කිසිදු සම්මානයක් ගැන පශ්චාත්තාපයක් නොවන්නට වග බලා ගති. කුමක් හෝ සම්මාන උළෙලකින් තමන්ගේ කෘතියට ද අනිවාර්යයෙන් සම්මානයක් ලැබෙන බව සියල්ලන් දැන සිටීම මීට හේතුවයි. සමහරු අනෙකා වෙනුවෙන් සම්මාන උළෙලවල් පැවැත්වූ අතර ඊට කෘතගුණ දැක්වීමක් ලෙස අනෙකා ද මේ සංවිධායක වෙනුවෙන් සම්මාන උළෙලක් පවත්වා දෙදෙනා අන්‍යෝන්‍ය වශයෙන් සම්මාන එකිනෙකාට දී සාහිත්‍ය වංශ කතාව ඔපවත් කළහ.

මෙබඳු සාර්ථක ක්‍රමවලින් කියවීම සහ හැදෑරීම නමැති ක්‍රමවේදයන් සරල වී මිනිසුන් දැනුම ලබා අතිශය ජනප්‍රියත්වයට පත්වූවන් ආණ්ඩුවේ උපදේශකයන් බවට පත්වී මෙම ක්‍රම තව දුරටත් වර්ධනය කරන්නටත් ප්‍රචලිත කරන්නටත් පටන් ගත්හ. මේ අති නවීන හැදෑරීමේ කෙටි ක්‍රම ප්‍රගුණ කළ සමහර උගතුන්ට පොතක කවරය දැකීමෙන් පවා එහි අන්තර්ගතය ගැන පැය දෙකහමාරක දේශන පවත්වන්නට හැකියාව ලැබුණි.

පසුව දැන ගන්නට ලැබුනේ ‍නෝබෙල් සාහිත්‍ය ත්‍යාගය තෝරන කමිටුවේ බහුතරයක් ද විශාල මුදල් ගෙවා මෙරට පැමිණ මෙම උපාධිය අසමත්ව දුර්මුඛව නැවත සිය රටවල් කරා ගිය බවයි. මෙනයින් උපාධියේ ගෞරවය ඉහළට නැගුනි.

මහා වංශය පරිඝනක ගත වූයෙන් එහි රජතුමා යන වචනය දහතුන්දාස් හාරසිය විසි හතර වරක් යෙදී ඇති බව එක්තරා මහාචාර් යවරයෙකු ප්‍රකාශයට පත් කළෙන් ඉතිහාසය සහ පරිඝනක අතර මෙම අපූරු සම්බන්ධය ලොවට හෙලිකිරීම හේතු කොට ගෙන ලෝක ඉතිහාසය ගැන නොයෙක් ගැටළු සහගත තැන් නිරාකරණය කර ගැනීමට බටහිරයන් ඩොලර් මිලියන් ගණනක් අතින් වියදම් කරන් මෙරටට එන්නට වූයෙන් රට තුළ විදේශ සංචිත අතිශය ඉහළ යෑමකට ලක් වී මැදපෙරදිග ධනවතුන් පවා කුඩා රැකියාවල් සඳහා මෙ‍රටට ඇදී එන්නට පටන් ගත්තෙන් සංස්කෘතික අර්බූද කීපයක් පැන නැගෙන්නට වී වහාම ඔටුවන් මෙරටට ගෙන්වීම පිළිබඳ ජාත්‍යන්තර ප්‍රඥප්තියක අවශ්‍යතාවය පැන නැගුනෙන් ජාත්‍යන්තර සහයෝගය නොමදව තිබූ බැවින් විදේශ අමාත්‍යවරයා රුපියල් කෝටි හතලිස් පහක් වියදම් කර සිය බාල දියණියගේ උපන් දින සාදයද හවායි දූපතේ පවත්වා එරට සංවර්ධනය කිරීමට ධන සම්පත් පොලී රහිත දීමනාවක් ලෙස ඒ අයුරින් ප්‍රදානය කොට වැඩි දුරටත් උපදෙස් දෙමින් සංක්‍රමණිකයන් පිළිබඳ මීට වඩා උනන්දුවක් දැක්විය යුතු බවට පාලානාධිකාරයට ආඥාවක් නිකුත් කර නැවත දිවයිනට පැමිණියේය.

පසුව ඇමතිවරයා පැවසූයේ එබඳු සශ්‍රීක ආර්ථික ඉතිහාසයක් ඇති රටකට මූල්‍යමය ව‍ශයෙන් උදවු කිරීම සෘජුව කළ නොහැකි නිසා උපන් දින සාදයකට මුවා වී සිය රට‍ වෙනුවෙන් යුතුකම් ඉෂ්ඨ කළ බවයි. මේ අසා ඉමහත් සංතෝෂයට පත්ව හඬ නගමින් සිනාසුන රටේ ධනවත් ජනතාව පසුව වෛද්‍යවරු සොයා ගොස් සිය උදරවල සහ අ‍‍ධෝමුඛවල පැලී ගිය මාංශ පේශි මැහුම් දමා යළි සකස් කර ගත්තෙන් ඉන් පසු ප්‍රතිපත්තියක් ලෙස මෙවැනි අතිශය සන්තුෂ්ටිදායක ප්‍රවෘත්ති මධ්‍යම රාත්‍රියේ පමණක් විකාශ කළ යුතු බවට පාර්ලිමේන්තු පණතක් සම්මත විය.

පොත් නොකියවා පොත් ගැන කතා කිරීමේ පාඨමාලාව අතිශය සාර්ථක වුයෙන් හෝඩිය, නම් පොත, මඟුල් ලකුණ, ගණදෙවි හෑල්ල, වදන් කවි පොත, බුද්ධ ගද්යහය, සකස්කඩ, නාමාශ්ට ශතකය, පඤ්ච රත්නය, නවරත්නය, ව්යා‍සකාරය හා ප්‍රත්‍යශතකය වැනි පිරිවෙන් පොත් පත් පිටකොටුවේ උණු කැවුම් මෙන් විකිණී‍ ගියෙන් පොත් විකුණන්නන් තවදුරටත් පදික වෙළෙන්‍දෝ නොවූහ. එම පොත්වල පරිවර්තන භාෂා එකසිය පණහකට වැඩියෙන් නොයෙක් රටවල මුද්‍රණය වීමත් සමග පෙන්ගුවින් සමාගම සහ බාර්න්ස් ඇන්ඩ් නෝබල් සමාගම් මෙරට ආයෝජනය කරන්නට තරඟ වැදුනෙන් විදේශ මුදල් මෙරටට ගලා ඒම ගැන සම්මුතියකට එළඹීමට ජාත්‍යන්තර බලපෑම් ද එල්ල වූ අතර රාජාණ්ඩුව කියා සිටියේ එම ග්‍රන්ථ සඳහා කතෘභාග රජයට අයිති බැවින් එබඳු කිසිදු බලපෑමකට තමන් නතු නොවන බවයි. ජාත්‍යන්තර බලවේග නිහඬ වූ අතර සැප්තැම්බරයේ පැවැත්වුනු පොත් සල්පිල සඳහා කොළඹ සිට කතරගම දක්වා වූ රේල් පාර ආවරණය කොට මඩු ගසා පවත්වන්නට සිදු වීමත් විශේෂ බස් සේවා මගින් විදේශිකයන් තමන් කැමති පොත් නැරඹීමට ගමන් පහසුව ලබා දෙන්නට සිදු වීමත් සහ ඔවුන් අධික ලෙස පොත් මිළදී ගැනීමටත් වූයෙන් එම ගමන් මළුවලට ද ප්‍රවාහන පහසුකම් සළසන්නට සිදු වූයෙන් රජයට ඉමහත් අසීරුතාවයකට මුහුණ දෙන්නට සිදු විය. හම්බන්තොට ගුවන් තොටුපලේ සිට විශේෂ බෝට්ටුවලින් ගාල්ලට විදේශිකයන් ප්‍රවාහනය කිරීමෙන් ධීවරයන් අමතර ආදායම් උපයා ධනවත් වූයේ අතුරු ප්‍රතිඵලයක් ලෙසය.

රටේ අවශ්‍යතාවලට වඩා වැඩියෙන් ගිනි අවි සහ පතුරම් විශාල ප්‍රමාණයක් වූයෙන් ඒවා ප්‍රතිචක්‍රීකරණය උදෙසා අවශ්‍ය ඉංජිනේරු පාඨමාලා ද හඳුන්වා ‍දීමෙන් තුවක්කුවලින් සෑදු වැල්පාලම් සහ මහා මාර්ගවල අත් ඇඳි වැටවල් නිර්මාණය වූයෙන් අතිරික්ත තුවක්කු වලින් ඉමහත් ප්‍රයෝජනයක් ගන්නට මහා මාර්ග අමාත්‍යාංශයට හැකි විය. ලෝකයේ ප්‍රථම වතාවට වෙඩි උණ්ඩ මගින් විදුලි බල උත්පාදනයට සුවිශේෂ ටර්බයිනයක් නිපදවන්නට හැකියාව ලද්දෙන් කෝටි ගණනක් වූ වෙඩි උණ්ඩ දැවීමෙන් ජලය වෙනුවට ආ‍‍‍දේශකයක් ලෙස ටර්බයිනයේ යකඩ තහඩු ඉලක්ක කර වෙඩි තැබීමෙන් කරකැවෙන මෙම බලශක්ති උත්පාදක යන්ත්‍රය හේතුවෙන් වෙඩි තබන්නට අවකාශයක් නොලත් අතිරික්ත හමුදාවලට සුවිශාල කාර්යභාරයක් පැවරුනෙන් ඔවුනගෙන් ආර්ථිකයට එකතු වූ අමතර මෙගාවොට් ධාරිතාව දිවයිනේ සමස්ත විදුලිබල අවශ්‍යතාවයෙන් සැලකිය යුතු ප්‍රතිශතයකින් සපුරන්නට හැකි වීමත් සමග එම හමුදා විසුරුවා හැරීමේ අවශ්‍යතාව ද වැලකී විදේශිකයන් විශාල ප්‍රමාණයක් මෙම නවතම බලශක්ති උත්පාදන ටර්බයිනය දැක බලා ගැනීමටත් එය අධ්‍යයනය කිරීමටත් පැමිණීමෙන් ආගමන සහ විගමන දෙපාර්තුමේන්තුවේ ලේඛන දත්ත ගබඩා පිරී යන්නට ද විදේශ මුදල් දැවැන්ත ලෙස මෙරටට ගලා එන්නට ද විය. ආරක්ෂක කමිටුව සහ බලශක්ති අමාත්‍යාංශය ගණනය කර තිබූ පරිදි මෙම බලශක්ති වැඩසටහන අවුරුදු හාරසියයක කාලයක් දක්වා පවත්වා ගන්නට ප්‍රමාණවත් වෙඩි උණ්ඩ රජය සතු බව එලිදරවු වූයෙන් ජනතාව ප්‍රීති ඝෝෂා තබමින් ඔපෙක් තෙල් හවුලේ පඹයන් පෙට්‍රල් සහ ඩීසල් දමා පුළුස්සා දමමින් විනෝද වූහ. දැවී ගිය උණ්ඩවල ලෝහ කොටස් උණු කර ප්‍රතිචක්‍රීකරණය කිරීමෙන් වානේ සහ වෙනත් ලෝහ වර්ග නිපදවා ගන්නට සමත් වූයෙන් ලෝපස් සහ යපස් ආනයනය කිරීම නතර කර දැමූ හෙයින් ඒ සඳහා විදේශවලට ඇදී ගිය ඉමහත් ධන සම්භාරයක් රටතුල ඉතිරි වූ අතර ගොඩනැගිලි කර්මාන්තයට අවශ්‍ය ලෝහ සහ වානේ කම්බි වල මිල අතිශය පහළට වැටීමෙන් එම කර්මාන්ත දැවැන්ත ලෙස දියුණු විය. සැමට තට්ටු ගෙවල් සංකල්පය බිහි විය.

උපදින සියල්ලන්ට තම කාලීන අවශ්‍යතා මත සිය දිවි හානි කරගැනීමට අවස්ථාව සලසා දෙන මෙන් අතිශය සුඛෝපභෝගී ජීවිත ගත කළ අයට වුවමනා වූයෙන් රට තුළ සිය දිවි හානි කරගැනීමේ සාර්ථක ක්‍රම පිළිබඳව උද්‍යෝගය වර්ධනය වී ඒ සඳහා වෘත්තීය නිපුණතා ඇති සුදුසුකම් ඇති විද්වතුන් රටට අවශ්‍ය වූයෙන් එබඳු සායන පැවැත්වීමට අධ්‍යාපන මට්ටම් නිර්මාණය කිරීම ‍උදෙසා නව නීති සංශෝධන සහ විශ්ව විද්‍යාල පාඨමාලා බිහි වූයෙන් මිනිසුන්ට සිය සමාජ වගකීම් සහ යුතුකම් ඉටු කර කැමති දිනෙක මිය යාමේ වරප්‍රසාදය භුක්ති විඳින්නට හැකි විය. මෙම නව ක්‍රම යටතේ සමහරු කැමැත්තෙන්ම ද තවත් සමහරු දේශපාලකයන් ගේ සහ බලවතුන් ගේ රෙකමදාරු මත ද සිය දිවි හානි කර ගැනීමේ ප්‍රවණතාවය වැඩි වූයෙන් විවිධ මල් ශාලාවල විවිධ පුද්ගලයන්ගේ අවශ්‍යතා අනුව සිය දිවි නැසීමේ සායන සමග ඒකාබද්ධ ගිවිසුම් සකස් වූයෙන් විවිධාකාර පැකේජ වෙළඳපොළට එකතු විය. එබඳු එක්තරා සිය දිවි නසා ගැනීමේ පැකේජයක් නොහොත් වැඩ පිළිවෙලක් මගින් යෝජනා වූයේ වඩාත්ම වියදම් අඩුම ක්‍රමය ලෙස ගොවිතැනට පිවිසෙන ලෙසයි. ඉන්පසු බැංකුවකින් ණයක් ගෙන යන්ත්‍රෝපකරණ කුලියට ගෙන බිත්තර වී ගොවිජන සේවාවෙන් මිළ දී ගෙන කුඹුරු අස්වද්දා පලිබෝධනාශක වල්නාශක සහ පොහොර වැනි වගාව සඳහා යන ඒ සියලු විය හියදම් බේරා පසුව අස්වනු නෙලීමෙන් තමුන්ට සිය දිවි නසා ගැනීමට ඉතා පහසුවෙන් තීරණය කරගැනීමට උපකාරී වන බව සියදිවි නසා ගැනීම පිළිබඳ උපාධි පාඨමාලා සම්පූර්ණ කළ උපාධිධාරීන් විසින් ජනතාවාදී ක්‍රමයක් ඉදිරිපත් කරන ලද්දෙන් නගරාශ්‍රිතව සුඛෝපභෝගීව සිටි බහුතර ජනතාව වගා සංග්‍රාමයක් ‍ක්‍රියාත්මක කරනා ආකාරයෙන් නගරයෙන් දූරස් ඈත ගම්බිම් වලට ගොස් මෙම ක්‍රමය අත්හදා බලන්නට වූයෙන් රටේ ආර්ථිකයට ධනාත්මක ප්‍රවේශයක් ලබා දුන් බවට ලෝක බැංකු සංඛ්‍යාන වාර්තා ඉදිරිපත් වී ඔවුනගේ මෝක්ෂගත ජීවිතයට පිං පිණිස අතිශය දැවැන්ත සොහොන් පිට්ටනි රටපුරා ඉදි විය. පාංශුකූල දීම සඳහා රටේ ශාසනය ප්‍රමාණවත් නොවූයෙන් බුරුමයෙන් ආනයනය කළ රහතුන් පිරිසක් විසින් රටපුරා පාංශුකූල දීමේ දැවැන්ත වැඩ පිළිවෙලක් ක්‍රියාත්මක කරන්නට රජයට අතුරු අයවැයක් සම්මත කරවා ගන්නට වූයේ බුරුම රහතුන් දෙසන බණ පාලියට සහ සිංහලට පරිවර්තනය කරන්නට අවශ්‍ය පරිවර්තකයන් ද බොහෝ පිරිසක් ගෙන්වන්නට සිදු වූයෙනි. සමහර දුෂ්කර ප්‍රදේශවල පාංශුකූල දීම අන්තර්ජාලය ඔස්සේ ද දුරකථන ඔස්සේ ද සිදු වූයෙන් ඈත ගොවි බිම්වල අතිශය දැවැන්ත ඇන්ටනා කුළුනු -ප්‍රකාශ තන්තු ජාල සහ ජංගම දුරකතන ජාලද ව්‍යාප්ත විය. ඔන් ලයින් පාංශුකූල දීමේ ක්‍රමයේ ආරම්භය මෙසේ විය.

මේ අයුරින් ර‍ටේ විශ්වවිද්‍යාල අධ්‍යාපනය ප්‍රතිසංස්කරණය කිරීමෙන් ආර්ථිකය පෙර නොවූ විරූලෙස සංවර්ධනය විය.

***

පසු සටහන්

මෙ‍ම කඩදාසි රෝලේ තිබූ අපහැදිලි සටහන් කීපයක් ද ඔබගේ කියැවීමට මෙසේ ගොනු කරමි.

සටහන් අංක 1

මේ නෝට්පෑඩ් එකේ සිංහලෙන් ලියද්දි සමහර වෙලාවට ටයිප් කරන අකුරු පිස්සු කෙලිනවද බලන්නයි මේක ලියන්න ගත්තේ. ඇත්තටම ගත්තම සමහර වෙලාවට මේකෙන් ලියන්න බැහැ. ඉස්පිලි කොම්බු පාපිලි පැනල දුවනවා අකුරු අතැරලා. හරියට ඉර හඳ දිවුරල ආදරෙන් ඉඳපු අය පස්සේ වෙනස් වෙලා වෙන් වෙලා යනවා වාගේ. අදහන්න බැරි විදියට. ජලනි ට මම දවසකුත් මේ කතාව මෙහෙමම කීවා වගේ මතකයි.

යුනිකෝඩ් වල හැටි ‍එහෙම තමයි. ඒක හදල තියෙන්නෙ පුළුවන් තරම් හොඳින් වැඩ කරන්න වුනත් බිල් ගේට්ස් සිස්ටම් එක හදවල තියෙන්නේ ඊට වෙනස් විදියකට දුවන්නයි.

කරන්න දෙයක් නැහැ.

කොහොම හරි තටමලා ලියන්න ඕන පරිඝනකයේම තමයි. නැත්නම් කවුරුවත් ගණන් ගන්නේ නැහැ. මට දැන් අකුරු මතකත් නැහැ. කයන්න ලියන්න ගියාම ලියවෙන්නේ තයන්න. පයන්න ලියන්න ගියාම ලියැවෙන්නේ වයන්න. අනේ මන්දා ...කයනු තයනු කත....පයනු වයනු පව... තමයි...

සටහන් අංක 2

...හරියට රාවණා වගේ. යුනිකෝඩ් සහ රාවණා එකම කාසියේ දෙපැත්ත වගේ. සිස්ටම් එකට ගැලපෙන්නේ නැත්තේ මොකද්ද කියල අපට තේරුම් ගන්න බැහැ. ඉස්පිලි පාපිලි වගේ ඉඳපු අයත් එලවල දානවා. කුම්භකර්ණයා සහෝදරයා වුණත් වැඩකට නැති කොම්බු ගෙනත් පාපිලි අස්සේ දමා ගන්නවා. එතකොට කියන්න යන කතන්දරේ සේරම වෙනස් වෙනවා. වෙන කතන්දරයක් කියවෙනවා. මම ලියල දෙන දේ නොවෙයි එයා අන්තිමට කියවන්නේ. වෙන දෙයක්. පස්සේ මා සොයාගෙන නිල් වෑන් එකක් එයි. ඒ මොකට ද ? මම ඉන්නේ කාටත් පේන තැනක. එතකොට ආරක්ෂාවයි. මේවා ප්‍රබන්ධ කියල මමම කී වතාවක් ජලනි ල එක්ක කියල ඇද්ද? නැහැ ඒවා ප්‍රබන්ධ නොවෙයි... මම ගයනු කිත්තක් වගේ ඉන්න ඕන. ජලනි ඔයා යංසයක් වගෙයි. මට මේ උපදේශක කම් එපා වෙලා ජලනි...

සටහන් අංක 3

අද ජලනි ආවෙත් නැහැ තීසිස් එක ලියන්න. මොකද දන්නේ නැහැ. මට හරිම පාළුවක් දැනෙන්නේ මොකද මන්දා. කන්නාඩියෙන් බැලුවම ඇයි මට මාවම පේන්නේ අවුරුදු දහයකින් තරුණ වෙලා වගේ? මැරෙන්න කිට්ටු වුනාම සමහරු ලස්සන වෙනවලු...

මේ සටහන් කවුරු හරි කවද හරි කියවයිද දන්නෑ...ඒත් මට මොකෝ මම එතකොට නැහැනේ...‍කො‍‍හොමත් මිනිස්සු දන්නවා අපි කරන්නේ රඟපෑමක් කියලා...අපිත් මිනිස්සු...

අනික සටහන් ලියන්න ඕනත් නැහැනේ කාටවත් ඒවා කියවන්න ඕන නැත්නම්...

ලිවීමේ මහාද්වීපය සොයා ගත්ත එක ගැන පම්පෝරි ගහ ගහ හිටිය හැටි මතක් වෙනවා දේශනාගාර වල...

කිසි තේරුමක් තිබ්බද මේ කරපු ලියපු එක ඉළවුවකින් වත් මේ ලෝකෙට?

සටහන් අංක 4

දයාබර ජලනි

මේක ලියන්න ම ඕන කතාවක් ඒකයි මේ තකහනියේ ලියන්න කියල වාඩි වුනේ. ඉතිං කියවන්න පටං ගන්න අර සිසිරයේ රැයක මගියෙකු නම් කියවන්න සූදානම් වෙනවා වාගේම හරිබරි ගැහිලා. ඒක මම ආයෙම විස්තර කරන්න යන්නේ නැහැ මොකද ඉටැලෝ කැල්විනෝ ඒක විස්තර කළ යුතු නියම රසවත් ආකාරයටම විස්තර කරල ඉවර නිසා. ලියපු දේවල් ආයෙම ලියන එක කාටවත් තරම් වෙනව ද? හරිබරි කීවම මතක් වෙන්නේ හරිජනයා ගෙන ගිය අරගලය ඉන්දියාවේ නමුත් ඒකයි මේ ලියවිල්ලයි අතර කිසිම සම්බන්ධයක් නැහැ නමුත් හරිබරි ගැහෙන්නේ කො‍‍හොමද කියලා හිතාගන්න උත්සාහ කරද්දි මේ හරිජන ප්‍රශ්නෙ ඔලුවට ආවා. .........

........ඩොක්ට ෂිවාගෝ කියවද්දි ඇස ගැටුන පැස්ටනාර්ක්ගේ කවියක් ඇතුලේ ඉටිවැටිය දැල්වී යන්නා සේම මගේ පෑනේ තීන්ත ටික වෑහිලා ඉවර වෙන්නත් පුළුවන් රටේම තියෙන දේවල් මේ කතාව ලියද්දි ලියන්න ගියොත්...මගේ ජීවිතය වගේම...මතක ඇතුව රෝසා ලක්සම්බර්ග් කියවන්න ජලනි...අපට මග ඇරුන දේවල් බොහොමයි...

..... ඒ හින්දා අන්ධ ගායකයෙක් දෑස් අඳුරු කන්නාඩියකින් වසාගෙන ගීත ගායනා කරන්නා සේ මා දන්නා ගායනාව තාලයකට ලිවීම බැවින් වැඩිමනත් ලෝකය පෙනීමෙන් මගේ සිතුවිලි කැළඹීම නතර කරගන්නට සියුම් අඳුරු කන්නාඩියක් ලෙස ගලා එන වචන වලට පෙරහණයක් දමා ගන්නවා මේ මොහොතේ සිටම නැත්නම් මට වෙන්නේ ස්ටිවී වොන්ඩර් වගේ නොපෙනෙන ලෝකය දිහා දෑස් දල්වන් වටපිට හිස කරකවමින් ගායනා කරන්නා සේම මේ ලියැවිල්ල හුස්මක් කටක් ගන්නේ නැතිවම ලියං ගිහින් මහ විසාල අතරමං වීමකට ඔබව තල්ලු කරදමා මට ඕන ඔවුන් අතට පත් වන්නටයි. හැම ලියැවිල්ලකම මට මෙතුවක් සිදු වුනෙත් ඒකමයි. .....

ජලනි...

.......හැම ලියවිල්ලක්ම අසම්පූර්ණ සටහන් ගොඩක් වෙලා වචන කඳුගොඩ ගැහෙන්නේ මේ අනවරත වරද නිසා යැයි මම වටහා ගන්නෙම රාත්‍රියේ ලියැවුනු දේ පහන් එලියෙන් වුවද හිරු එලියේ දි කියවද්දීම එහි රැස් දහරේ කිදී කිමිදී යද්දී කොතරම් වෙනස් හැඟුම් ජනිත කරන්නේ දැයි මම ම සොයා දැනගත් බැවිනි. මෙහෙම ලීවට මම ඉතාම සැලකිලිමත් වෙනවා මේ කතාව මට ඕන දේවල් ටික ගොනු කරගෙන සංවිධානාත්මක රචනයක් විදියට ඔබට පිළිගන්වන්නට. නමුත් මේ කන්නාඩි හැම කන්නාඩියක් වගේම මට පෙන්වන්නේ කන්නාඩියෙන් සඟව ගත් සූක්ෂම ‍ස්ථරයක් වසා දමලා නිසා මේ දැනටමත් මම ලියාගෙන යන දේවල් අතර මහ හිදැසක් ඔබට දැනු‍නොත් ඒ වරද මගේ නොවන වග තේරුම් ගන්නට දැං ඔබ සමත් වනු නොඅනුමානයි.

දැනටමත් මම කියන්න ඕන සියල්ල කියා අවසන් යැයි මට හැඟේ.

මමත් ඒ කාලකන්ණි කමිටුවේ හිටියා ජලනි!

දැං ජලනි ඔයා දුවන්න ඕන...ගොඩාක් හයියෙන්...

සංස්කාරක සටහන

මේ මීට වසර හතලිස් පහකට පෙර අප රටේ සැබෑ චින්තනය ලෝකයා හමුවේ තබන්නට මෙම මහාචාර්යවරයා විසින් සැකසූ‍ ලියැවිල්ලයි.

මෙම ලියැවිල්ල එදා පාලකයන් අතට පත් වූයේ නම් කිසිවක් වෙනස් නොවන්නට ඉඩ තිබුනි.

දැනට හැටහත් හැවිරිදි විශ්‍රාම ලත් ජනාධිපතිනිය මීට වසර තිහකට පෙර පැවති මිලිටරි ජුන්ටාව පෙරලා දමා නැවත ප්‍රජාතන්ත්‍රවාදය ස්ථාපිත කළ රජයේ ප්‍රථම ජනාධිපතිවරියයි. ඇය විසින් පිළිගත් මේ ලියැවිල්ල ඇය සතු හඩ පටයේ ම ලියැවිල්ල බව සනාථ කළාය.

බිත්ති හරහා පෙරටම...

2009-10-27T22:12:00.000-07:00

බිත්ති හරහා පෙරටම...

මැජික් ශිල්පියාගේ ගෙලට තොණ්ඩුව දමා මුහුණ කළු ‍ආවරණයකින් වසා දමද්දීද ඔහුගේ දෑස් දීප්තියෙන් බබළමින් තිබූ බවත් පෝර‍කයේ යටි තට්ටුවේ හරි මැද්දෑවේ ඔහු සිටුවා අත පය බැඳ සෘජු කාය විලාසෙන් සිටිනු තමන් හොඳින්ම දුටු බවත් ලීවරය ඇද ඔහුගෙ සිරුර මළ පුඩුව තද වී එල්ලුම් ගහේ කඹය රැඳි කුඹගසේ මුදුනතේ එල්ලී කඹයේ දැඩි බව කුඹයට දැනෙද්දී ඔහු පොළවට සිරස්ව අවලම්බාකාරයෙන් දෙපසට වැනෙමින් හුන් බවත් නැවත නැවතත් කියා පෑමෙන් අධිකරණ වෛද්‍යවරයා ඔප්පු කරමින් සිටියේ අට්ටාලය මත හොවා ඇති මැජික් ශිල්පියාගේ සිරුර සුදු පරෙවියන් රංචුවකට රූපාන්තරණය වී අවකාශයට පියඹා ගොස් ඔහුගේ අවසන් මොහොතේ සිරුරේ එතී තිබුන වස්ත්‍ර පමණක් ඉතිරි වී තිබීම තමන්ට කිසි සේත්ම පිළිගත නොහැකි කාරණයක් බවත්ය. වෛද්‍යවරයා නිර්ජලීය කොපර් සල්ෆේට් කැට වලින් තැනු ප්‍රතිමාවක් මෙන් වික්ෂිප්තව කතා කරන්නට විය.

මැජික් ශිල්පියාගේ මරණ දඩුවමට සාක්ෂිය ට පැමිණ සිටි සියල්ලන් භීතියෙන් ද විශ්මයෙන් ද මුසපත් ව එකෙනෙහිම විවිධාකාර වූ ප්‍රබන්ධයන් ද හොල්මන් කතා ද ගුප්ත කතා ද කට කතා ද ගොතන්නට වූයෙන් අයෙක් කීවේ මැජික් ශිල්පියා හිර ගෙදර බිත්ති හරහා ඇවිද යනු ජේලර්වරයෙකු දුටු බවත් ඔහුගේ මරණයට හෝරා කීපයකට පෙර එම ජේලර්වරයා ලේ වමනය කරමින් මිය ගිය බවත් තවෙකෙක් ‍කී‍වේ මැජික් ශිල්පියා දූමාරයක් බවට පත්වී සිර ගෙදර ඉතා කුඩා කවුළුවකින් පාවී එළියට ගිය බවත් එය දුටුවෙකු ගොලු වී ඇති බැවින් වැඩි විස්තරයක් දැන ගැනීමට බැරි වූ බවත්ය. කෙසේ වුව ද හිර ගෙදර බිත්ති සහ කුඩා කවුළු වලින් පිටතට පියඹාගත නොහැකි වූ සුදු පරෙවියන් සිවු දෙනෙකු දැල් දමා අල්ලා ගන්නට සමත් වීමෙන් අනතුරුව සියලු පර්යේෂණයන් මේ කුරුල්ලන් කෙරෙහි යොමු වීමෙන් සිර ගෙදර මුරකාවල් ලිහිල් වූයෙන් මැජික් ශිල්පියා සැඟව සිට පැන යන්නට ඇතැයි අධිකරණ සහ බන්ධනාගාර අමාත්‍යාංශය හදිසි චක්‍රලේඛයක් එවීමෙන් පසු බන්ධනාගාර නිලධාරීන් එකසිය විසි හතර දෙනෙකුගේ සේවා තහනමකට ලක් වූයෙන් ඔවුහු වික්ෂිප්තව සිය ‍නිවෙස් කරා ආසන්නතම දුම්රිය ස්ථානවලින් එවෙලේ සූදානම්ව තිබූ දුම්රිය වෙත නැගී අන්ත්‍රස්දාන වූහ. ඔවුන් නිදි වර්ජිතව රාත්‍රීන් තිහක් ගත කිරීමෙන් පසු රාජකාරි සඳහා වාර්තා කළ දිනයේ සේවකයන් එකසිය විසි දෙනෙකුට නැවත ලෙඩ නිවාඩු දමා රෝහල් ගත වන්නට වූයේ ඔවුනගේ ඇස් වසා ගැනීමට පවා නොහැකි ලෙස ඇහිපිල්ලම් නලලට තද වී තිබීම‍ හේතුවෙන් ඔවුනගේ ඇස්වලින් දිගින් දිගටම කඳුළු ගලා ඒමටත් කහපාටින් කොළ පාටින් කබ ජාතියක් ගලා ඒමත් නිසා දරුණු වසංගතයක් බන්ධනාගාරය තුළ ව්‍යාප්ත වීමට ඇති ඉඩකඩ වළක්වා ලනු පිණිසය.

කෙ‍සේ වුවද පිළිගත හැකි වාර්තාවක් ඉදිරිපත් කරන ලද්දේ මහාචාර්ය ඩෙස්මන්ඩ් මොරිස් ආරච්චි විසින් බැවින් එම වාර්තාවට අනුව මැජික් ශිල්පියා සිරගෙදර බිත්තියක් තුලින් යාමට සිය සෙවණැල්ල පාවිච්චි කර ඇති බවත් එම සෙවණැල්ල බිත්තිය මත පතිත වූ එම උදෑසන තදින් හිරු පායා ඇති බවත් එම හිරු එළිය සිර කුටියේ කවුළුවෙන් පර්යාලෝකය වී ඇති බවත් අක්ෂාංශ සහ දේශාංශ මැන ගෙන සූර්ය ස්ඵුටය නිවැරදිව ගණනය කර බැලූ විට එම රශ්මිය මැජික් ශිල්පියාගේ සිරුරේ වූ කාබන් අංශු සෙවණැල්ල දිගේ බිත්තියේ ප්‍රක්ෂේපිත වර්ගඵලයේ සංචිතව පැවති එම බිත්ති තැනූ ශ්‍රමිකයන්ගේ ශ්‍රමය හා මුසුවී ඔහුගේ සිරුර නිරුපද්‍රිතව සිරගෙයි බිත්තිය හරහා එළියට ගොස් ඇති බවයි. මෙම වාර්තාවෙන් කුපිත වූ අධිකරණ ඇමති වරයා වහාම කැබිනට් පත්‍රිකාවක් අනුමත කරගත්තේ මින් ඉදිරියට හිරගෙවල් තැනීම සඳහා කම්කරු ශ්‍රමය භාවිතා කිරීම අහෝසි කළ යුතු බවටත් එම බිත්ති තැනීම සම්පූර්ණයෙන්ම රො‍බෝ යන්ත්‍රවලට පැවරිය යුතු බවත් කිසිදු හේතුවක් නිසාවෙන් කම්කරුවෙකු හෝ එම ක්‍රියාදාමයට සම්බන්ධ කර නොගත යුතු බවත් කෙටුම්පත් ගත කෙරුණි.
රොබෝවරුන් යොදා විවිධ බන්ධනාගාර නිර්මාණය කිරීමේ දී විශාල වශයෙන් අරමුදල් ජාත්‍යන්තර රොබෝ ආයතන සමග ගනුදෙනු කරන්නට යෙදුනෙන් ඒ හා සම්බන්ධ ඇමතිවරු කීපදෙනෙකු ගේ පෞද්ගලික වත්කම් ඉහළ යාම ඉවසාගත නොවූ වෙනත් පසු පෙළ මන්ත්‍රී කණ්ඩායමක් මේ කැබිනට් පත්‍රිකාවට සිය විරෝධය පා රාජ උදහසට ලක්ව, සිරගතව, එහි සිට උද්ඝොෂණයක් ක්‍රියාත්මක කරන්නට වූයෙන් සිරකරුවන් විශාල ප්‍රමාණයකට ඉමහත් අකරතැබ්බයන්ට මුහුණ දෙන්නට සිදුවූයෙන් ඔවුන ද ඇතුලුව රාජකීය මන්ත්‍රී කණ්ඩායමම වීරයන් ලෙස, සිරගත නොවී සිටියවුන් සලකන්නට වූයෙන් වහා ජනතා හඬට කන් දුන් රාජාණ්ඩුව ඔවුන් සියල්ලන් නිදහස් කළ අතර මෙලෝ හසරක් නොදත් අපරාධ කරු‍වෝ වහා ලද අවසරයෙන් සිය දෛනික කටයුතු ආරම්භ කරන්නට වූහ.

මේ හදිසි තීරණය හේතුවෙන් ඉන් ඉදිරියට කම්කරුවන් යනු කුමන ආකාර ගන්නා වූ අයවළුන් දැයි විවාදයක් පාර්ලිමේන්තුවේ ගොඩනැගුනු අතර බො‍හෝ අය කීවේ තමන්ට කම්කරුවන් ගැන කිසිදු අවබෝධයක් නැති හෙයින් පිරිසිදු කම්කරුවෙකු පාර්ලිමේන්තුවට ගෙනැවිත් ව්‍යවච්ඡේදනය කර ඔවුන් අන් අයගෙන් වෙන් කර හඳුනා ගත හැකි ලක්ෂණ කවරේදැයි පර්යේෂණ කළ යුතු බවයි. සමහර මන්ත්‍රීවරු කීවේ කම්කරුවන්ට උණ්ඩුක පුච්ඡයක් නැති හෙයින් ඉතා පහසුවෙන් හඳුනා ගත හැකි බවයි. නමුත් උණ්ඩුක පුච්ඡය දැක ගැනීමේ ක්‍රමය එම මන්ත්‍රීවරු සභාවට ඉදිරිපත් නොකළ හේතුවෙන් පළමු යෝජනාව ස්ථිර විය. මින් උද්‍යෝගයට පත් ආණ්ඩුවේ උපදේශකයන් පුවත්පත් වල මහ විශාල දැන්වීම් පළ කොට කම්කරුවෙකු සොයා වෙ‍හෙසෙන්නට වූයෙන් කිසිවකුත් තමා කම්කරුවෙකු යැයි කීමට නොහැකි වූහෙයින් ද ඉදිරිපත් නොවූ හෙයින් ද සියල්ලෝ නිෂ්පාදන බලවේගවල අයිතිකරුවන් වශයෙන් සමාජයේ සියළුම ජන කොටස් හඳුනා ගන්නට හැකි වීමෙන් පසු කම්කරුවෙකු සොයා එවන ලෙස ඇමරිකානු තානාපති කාර්යාලය හරහා පණවිඩ යැවූව ද ඔවුනට එකදු කම්කරුවෙකු සොයා ගත නොහැකි වීමෙන් රජාණ්ඩුව කණස්සල්ලට පත් විය. නිෂ්පාදන බලවේග ලෙස බහුතරයක් හඳුන්වා තිබුනේ අනාගත දිනෙක දී තමන් කුමන හෝ ආකාරයක නැවුම් නිර්මාණයකට දායක වීමට පූර්වාභ්‍යාසයේ යෙදෙන බවත් ඉන් සමහරක් කවි නිෂ්පාදනය කරන බවත් තවත් සමහරු අදහස් නිෂ්පාදනය කරන බවත් තවත් සමහරු විහිළු නිෂ්පාදනය කරන බවත් යනාදි වශයෙන් ඔවුනගේ නිෂ්පාදන හැකියාවන් ද එම හැකියාවන් විසින් අනාගතයේදී තමන්ට අත්වන ප්‍රාග්ධනය හේතුවෙන් තමන් නියත වශයෙන් ම ධනපතියන් බවට පරිවර්තනය වන බවත් ඉතාම උද්‍යෝගයෙන් පවසන්නට වූයෙන් සමාජයෙන් කම්කරුවෙකු සොයා ගැනීම සරල කාරණයක් නොවන වග මෙම විශේෂ කටයුත්ත ක්‍රියාත්මක කිරීමට පත් වූ පාර්ලිමේන්තු කමිටු‍වට වහාම වැටහුණි.

වෛද්‍යවරු, තමන් අති විශාල වැටුප් වලට හිමිකම් කියන හෙයින් ද සුඛෝපභෝගි වාහන වාරික ගෙවා පාවිච්චි කරනා බැවින් ද ක්‍රෙඩිට් කාර්ඩ් වැනි උසස් සමාජය පරිහරණය කරන දෑ භාවිතා කරන හෙයින් ද රුපියල් දෙදහස් පන්සීයක වැටුපට වැඩකාරියක් ගෙදර වැඩට ඉන්නා හෙයින් ද නිෂ්පාදන බලවේගවල හිමිකම් වශයෙන් දරුවන් සෑදීමේ හැකියාවෙන්ද පෝෂිත බැවින් තමන් කිසිදා ශ්‍රමය වගුරා වැටුප් ලබන කම්කරුවකු වශයෙන් වර්ගීකරණයට අයත් නොවන වගත් එබඳු සමාජ තලයන් හි වැජඹෙන කිසිවකුත් කම්කරුවකු ලෙසට හඳුනා ගැනීම නීති විරෝධි බවත් එය කිසිසේත්ම වෘත්තිකයන්ගේ ආත්මාභිමානයට හොඳක් නොවන පරිහාසයක් බව ද කීයෙන් ඔවුන් මෙන්ම ඉංජිනේරුවරුන් ගණකාධිකාරිවරුන් නීතිඥයන් මිනින්දෝරුවන් ව්‍යවසායකයන් ද ගුරුවරු ද යනාදී මෙකී නොකී සියළු වෘත්තිකයන් පෙළ ගැසී එකට සිටියෙන් ඔවුනගේ ශ්‍රමය බන්ධනාගාර බිත්ති සමග සම්බන්ධ කරන්නට තැත් කරන්නන් ට සිය කිසිසේත්ම අවකාෂය්ක නොදී සිය තර්ක හකු‍ලා ගෙන යන්නට තරම් බලගතු වෘත්තී සමිති ක්‍රියාමාර්ග දියත් වූයෙන් මෙම පාර්ලිමේන්තු පර්යේෂණය උදෙසා කම්කරුවෙකු සොයා ගැනීමේ අර්බූදය ජාත්‍යන්තරය කරා යොමු විය. තවද එතුවක් කල් බොහෝ අය දැන නොසිටි නිෂ්පාදන බලවේගයක් ලෙස වර්ගයා බෝ කිරීමේ හැකියාව පිළිබඳ සත්‍ය අනාවරණය වීමත් සමගම පිරිමි සංහතියම ධනපතියන් බව අවධාරණය කර ගත්තෙන් සියළුම පිරිමින් ඉන් අමන්දානන්දයට පත්ව සිය නිෂ්පාදන බලවේගය ප්‍රදර්ශනය කරමින් මිදුල්වල පාරවල් වල සහ සඳළුතල වල ගැවසෙන්නට වූයෙන් කාන්තාවන් ද සිය නිෂ්පාදන බලවේගය ගැන සංවාදයකට පැමිණෙන්නට වූයෙන් මහා කාලගෝට්ටියක් රටපුරාම ඇති වන්නටත් කාන්තාවන් හර්තාල් කරන්නට ද පටන් ගත්තෙන් මේ පිළිබඳව අනවරතයෙන් මැදිහත් වන්නට රාජාණ්ඩුවට සිදු විය.

කාන්තාවන්ගේ සටන් පාඨය වූයේ පිරිමින්ට මෙන් ප්‍රසිද්ධියේ තම නිෂ්පාදන බලවේගය එළි දැක්වීමට සුදුසු පරිදි සිය ගර්භාෂය සිරුර තුළින් පිටත මල්ලක ස්වරූපයෙන් සකස් කර දිය යුතු බවත් එය කැන්ගරු ආකෘතියකින් තමන්ට පහසු ආකාරයට පසු පසින් තිබීමෙන් එදිනෙදා කටයුතු කරගෙන යාමට ද බාධාවක් නොවන බවත් මෙය කඩිනමින් විසඳා තමන් ද පිරිමින් මෙන්ම ධනපතියන් ලෙස පිළිගත යුතු බවත්ය. මේ ගැටළුව කෙරෙහි අවධානය ලක් කළ රාජකීය සභාව මේ සඳහා යෝජනා ඉදිරිපත් කරන ලෙස ප්‍රසිද්ධ විද්‍යාඥයන්ට දන්වා යැවීමෙන් අනතුරුව නොබෙල් ත්‍යාගලාභි භෞතික විද්යායඥ ගුරුවරයෙකු වාෂ්ප එන්ජිමේ ආකෘතියකට පුරුෂ සහ ස්ත්‍රී ප්‍රජනන අවයව පුරුද්දා නිර්මාණය කල චිත්ත පර්යේෂණ වාර්තාවකට අනුව මෙයාකාරයෙන් ගර්භාෂය විස්ථාපනය කිරීමෙන් ප්‍රජනන ක්‍රියාවලිය සාර්ථක කරගනු පිණිස පියයුරු වල පිහිටීම ගණනය කර පෙන්වා තිබුනේ ඒවා හිස මත ස්ථානගත කළ යුතු බවයි. මෙම අදහස ප්‍රසිද්ධ වීමත් සමගම සියළු සටන් කාමිනියන් සිය සටන අතහැර දැමූ අතර එම වාර්තාව සකස් කළ මහාචාර්යවරයාට කොණ්ඩා මෝස්තරකාරිනියන්‍ ගේ සංගමය විසින් සිය කෘතඥතාවය පළ කළේ තම වෘත්තීයට එරෙහිව ආ කුමණ්ත්‍රණය පරාජය කිරීමට ඔහුට හැකි වූ බව ප්‍රීතියෙන් දන්වමිනි.

සිය නිෂ්පාදන බලවේගය ප්‍රසිද්ධියේ ප්‍රදර්ශනය කිරීමේ හැකියාවක් කාන්තාවන්ට නොවූයෙන් සිය කැමැත්තෙන් ඔවුන් නිර්ධනයින් ලෙස සංස්ථාපිත වීමට එකඟ වූයෙන් රූපලාවන්‍ය කෙරෙහි පැවති ඔවුනගේ අතිමහත් උනන්දුව හේතුවෙන් ඔවුන්ගේ පන්තිමය අවශ්‍යතාවක් ලෙස එය වටහා ගත් පාලක පක්ෂ විසින් ප්ලාස්ටික් සර්ජරි සහ විලවුන් ආලේප වර්ග සහ රූපලාවන්‍යයට අදාළ සියළු දේ ගැසට් නිවේදනයකින් අත්‍යවශ්‍ය ‍ද්‍රව්‍ය ලෙසද ඒවා මත පනවා තිබූ සියළු බදු ඉවත් කිරීමෙන් ද ඔවුනගේ පන්තිමය වශයෙන් ගොඩනැගී තිබූ හීනමානය සනසා ලන්නට කටයුතු කළ හෙයින් පිරිමි සිය සිතැඟි ලෙස කාන්තා රූ සපුව දෘශ්‍යමය ක්‍රීඩා භාණ්ඩයක් ලෙස තහවුරු කරගත්තෙන් ලෝකයේ ප්‍ර‍ථම වතාවට කාන්තා සිරුරේ නග්න රූප රැගත් ප්ලේබෝයි සඟරා උණු කැවුම් මෙන් වෙළඳපොල ආක්‍රමණය කළ අතර එම ඡායාරූපවලට පෙනී සිටීමෙන් කාන්තාවන් සිය නැති වූ ධනපතිභාවය උපයා ගත්තෙන් ඔවුන් පිරිමින්ට නොදෙවෙනිව සිය නිෂ්පාදන බලවේගය ලෙස සිය සිරුර ප්‍රදර්ශනය කිරිමට පටන් ගත්තෙන් සියළු මනුෂ්‍ය ප්‍රජාවම ධනපතියන් බවට එක රැයින් පරිවර්තනය විය.

එලෙස සඟරාවලට සිය සිරුර ඡායාරූප ගත කිරීමට ඉඩක් නොලද කාන්තාවන් විවිධ ආකාරයට පිරිමින් වසඟයට ගැනීමෙන් නිළියන් ගායිකාවන් නාටිකාංගනාවන් නිරූපිකාවන් සහ ගණිකාවන් වැනි විවිධ ධනපති රැකියා නිර්මාණය කරගත්තේ සිය ප්‍රාග්ධනය වූ රූ සපුවේ ආනුභාවයෙනි. එම රැකියා නිර්මාණයෙන් පසුවද ඉතිරි වූ සමහර කාන්තාවන් බිරිඳ නමැති ස්වයංරැකියාවට යොමු වීමෙන් අනෙකුත් සියල්ලන් සම්පූර්ණ වශයෙන්ම කැපවී සිදු කරන රැකියා සියල්ලම මද මද වශයෙන් කරන්නට පටන් ගත්තෙන් අනෙකුත් රැකියාවල නියුතු වූවන්ගේ පැවැත්ම වඩාත් තහවුරු විය. සියළුම අවස්ථා වලදී පිරිමින්ට සිදු වූයේ සංසන්දනාත්මකව ගැහැණුන්ගේ ක්‍රියාකලාපයන් ඉවසා සිටීමටය. සෝම පානයෙන් මත්වන පිරිමින් එකිනෙකා හා වාද කරගත්තේ ගැහැණුන්ට ගර්භාෂය සම්බන්ධව ඇති අවුල හේතුවෙන් තමන් හා ධනපතියන් ලෙස සම තැන ගැනීමට නොහැකි වීම නිසා ඔවුන් අධික ලෙස මෝඩකම් කරමින් පිරිමින්ගේ අවධානය ගැනීමට වලිකන බවය. මළ ගෙවල්වල රාත්‍රීන් ගෙවා යන තවත් අයගේ ප්‍රසිද්ධ සංවාදයක් වූයේ කාන්තා සිරුර ප්‍රති නිර්මාණය කිරීමේ න්‍යාය සම්පූර්ණයෙන්ම කාලය නාස්ති කිරීමක් බවත් ඔවුනට තවත් වැඩි පුර පියයුරක් ලබා දීමට හැකි නම් එම වැඩපිලිවෙලට පක්ෂව සිය ඡන්දය දෙන බවත්ය. මේ පිළිබඳව පර්යේෂණ පවත්වන්නියන් කියා සිටියේ දැනට තියෙන පියයුරු වලින් පවා සිය සිරුරේ ගුරුත්ව කේන්ද්‍රයට අනවශ්‍ය බලපෑමක් වන බවත් මේ යෝජිත ප්‍රතිසංස්කරණ මගින් සිය සමාජ ස්ථාවරය වර්ධනය වුවත් සිය කැට් වෝක් සඳහා භාවිතා වන රිද්මයන් කෙරෙහි අවදානමක් ඇති විය හැකි බැවින් පවතින ආකෘතිය වඩාත් සමතුලිතතාවයක් ඇති කරන බවත්ය.

මේ අයුරින් ජනතාව සංයමයකින් දෛනික කටයුතු කරගෙන යන්නට වූයෙන් රාජ්‍යය ඉතා බලවත් විය. හාමතේ මියැදුන මිනිසුන් ද මන්ද පෝෂණයට ලක් වූ දරුවන් ද දූෂණයට ලක් වූ කාන්තාවන් ද සිය අවසන් හුස්ම හෙලන්නට මත්තෙන් ඔවුන් මෙතුවක් කල් ධනපතියන් ලෙස හෝ ධනපතියන් බවට පත්වෙමින් සිටි අය බවට සිහි කැඳවන්නටත් එම විශේෂ පණිවිඩය ඇසීමෙන් සිය චිත්තාභ්‍යන්තරයන් ආලෝකමත් වී මරණින් පසු ද මේ ක්‍රමයටම අනුගතව යළි උපදින්නට ඔවුන් පොරොන්දු කරවා ගැනීමෙ විශේෂ රාජ්‍ය වැඩපිලිවෙලක් ක්‍රියාත්මක වූයෙන් ඔවුනගේ භූමදාන කටයුතු රාජ්‍ය අනුග්‍රහයෙන් උත්සවශ්‍රීයෙන් පැවැත් වුණි.

මේ සියළු සිදුවීම් මේ ආකාරයෙන් ගලා යද්දී මැජික් ශිල්පියා සිරගෙයින් පැන ගිය බව සියල්ලන්ටම අමතකව ගිය හෙයින් හෙතෙම ඈත වනගත පෙදෙසක නොදියුණු ග්‍රාමයක සිය මැජික් සංදර්ශණ පවත්වන්නටත් ආධුනික මැජික් ශිල්පීන් බිහි කරන්නටත් පටන් ගෙන තිබුනි. අහම්බෙන් ඔහු හමු වූ ධර්මසේන නම් වූ පුද්ග‍ලයෙක් ඔහුගේ සිනමා නිර්මාණයේ ප්‍රධාන චරිතය රඟපාන්නට මෙම මැජික් ශිල්පියාට ආරාධනා කළෙන් එම සිනමා පටය තිරගත වීමත් සමග නැවත මැජික් ශිල්පියා ගැන මතකය රාජාණ්ඩුවට ඇති වේයැයි මැජික් ශිල්පියාගේ අත් උදවුකරු මතක් කළ හෙයින් ඔහු එම ඉල්ලීම ප්‍රතික්ෂේප කර ඉතා කුඩා දර්ශනයකට පමණක් වෙස්වලා ගෙන සහභාගි විය.

අදටත් අහස් ගවුව චිත්‍රපටයේ ඉතා කුඩා ජවනිකාවක පෙනී සිටින්නේ එම මැජික් ශිල්පියා බව මේ වනතුරු කිසිවෙකුත් නොදැන සිටීම පුදුමයක් නොවේ.

බීට් රූට් ලේ

2009-10-25T03:14:00.000-07:00

බීට් රූට් ලේ

ඇය සියල්ලන් මවිතයට පත් කරමින් බීට් අල තැම්බූ වතුර රුධිර පාරවිලයනය සඳහා සාර්ථකව යොදා ගත්තෙන් ස්වර්ගය පෘථිවිය මතට පාත් වූයේ හදිසියේම ස්වර්ගයේ සිදු වූ බර වැඩි විමේ ප්‍රතිඵලයක් ලෙසටය යන්න සාක්ෂාත් වූ‍යේ පෘථිවියෙන් අර්ධයක් ජනගහණය මාස තුනක් වැනි කෙටි කාලයක් තුල ස්වර්ගස්ථ වූයෙන් ස්වර්ග‍ ලෝකයේ ගුරුත්ව කේන්ද්‍රය විතැන් වීමෙන් මේ අලකලංචිය සිදු වූ බව තහවුරැ කළේ පුරා විද්‍යා දෙපාර්තුමේන්තුවේ සහ කාලගුණ විද්‍යා දෙපාර්තුමේන්තුවේ ඒකාබද්ධ පර්යේෂණයක ප්‍රති‍‍‍ඵලයක් ලෙසය.

දිගින් දිගටම සිහින තුල සහ අන්තර් සිහිනමය ප්‍රවෘත්ති විකාශය ඔස්සේ පියැවුනු දෙනෙත් පුළුල් තිර මත ප්‍රක්ෂේපනය වෙමින් පැවති මේ ස්වර්ග ලෝකයේ පෘථිවි පාතන ජවනිකාව බොඳව ගොස් දෙනෙත් තුළ අන්ධකාර ගුහාමය කළුවක් වැටුනේ ස්වර්ග ‍ලෝකයෙන් ආ අපූරු තණකොල පෙත්තෙක් වැනි සුරංගනාවක් හදිසියේ චන්ද්‍රාණිගේ නහය මත වැසීමත් සමගමය‍. එසැන සියල්ල නිවී ගියේ එය සිහිනයක් බව ඒත්තු ගන්වමිනි. ඇය පියවි සිහිය ලබද්දී දැනගත්තේ ඈ අවසිහියෙන් බවය.

චන්ද්‍රාණි නින්දෙන් පිබිදී ඇතත් ඇය තවත් සිහිනයකට ඇතුළු වෙමින් සිටින බව නොදැන සිටියෙන් ඇයට කාමරයේ සීලිම පෙනුනේ බීට් රූට් ඉස්ම ගලා හැලෙන ඉරි තලා ගිය වැහි බර අහසක් මෙනි. බිත්ති දිගේ ගලා හැලෙන බීට් රූට් තැම්බූ වතුර ක්‍රමයෙන් පොලව දිගේ ඇය ගේ දෙපතුල් අසලට ගලා එන්නේ යැයි සිතුනි. එම බීට් රූට් තැම්බූ වතුර ඇගේ සිරුර යට කරමින් ගංවතුරක් මෙන් නැගී ඈ එමත පාවෙන්නට පටන් ගති. ඉපිලුම් නියමය සත්‍ය වශයෙන් යෙදෙන්නා වූ සිහිනයක් බැවින් ඇගේ පරිමාව විස්ථාපනය කළ බීට් රූට් ඉස්ම ඇගේ රුධි‍රයේ ඝණත්වය ට සම වීමෙන් ඇය බීට් රූට් තැම්බූ වතුරේම කොටසක් බවට පත් විය.

"මට දියවැඩියාව! මට දියවැඩියාව!! දෙයියනේ මට දියවැඩියාව!!! "

ඇය මහ හයියෙන් කෑගැසුවාය. බිත්තියේ පහලට බඩගාමින් හුන් හූනෙක් වහාම සිවිලිම දෙසට වේගයෙන් බඩගා එහි වූ පැල්මකින් අතුරුදහන් විය. ඈ පමණක් තනිවම නවාතැන් ගෙන හුන් බෝඩිං කාම‍රයේ කැරපොත්තන් මීයන් හූනන් සහ ඇමීබාවන් හැර වෙන කිසිවෙකුවත් ඇයගේ ලතෝනිය අසන්නට නොවුයෙන් ඇය වහාම ඇඳෙන් බැස රාත්‍රී ගවුම පිටින්ම බෝඩිමෙන් පිටතට පැමිණියාය. ඇය බෝඩිමේ ගේට්ටුව අසලට පැමිණ බෝඩිමට වැටී ඇති මහ පාරෙන් වූ අතුරුපාර දෙස එක දිගට ඇස් යොමු කළ ද කිසිවෙකු පෙනෙන්නට නොවූයෙන් ඇය මිදුලෙන් ගේට්ටුව විවෘත කර පාරට ආවාය. පාර දිගේ තාර වෙනුවට බිට් රූට් ඉස්ම හැලි ඇති අයුරක් පෙනී නැවත තාර පාටින් පාර පෙනෙන්නට පටන් ගත්තෙන් ඇය පා ඉක්මන් කළාය. ඇය එක එල්ලේ ඉදිරියට ඇදෙන්නට විය.

"දෙයිය‍නේ මගේ ඇඟ සේරම බීට් රූට් ඉස්ම ගලනවා නහර ඇතුලේ... මෙහෙම ගියොත් මගේ මුලු සරීරෙම තියෙන වතුර ටික මේ බීට් රූට් වල තියෙන සීනි වලින් උරා‍‍ගෙන විජලනය වෙන්න ගන්නවා... දන්නවද අඩුවෙන් වතුර තියෙන තැං වලට වැඩියෙන් වතුර තියෙන තැං වලින් ‍උරා ගන්නවා කියලා? දෙයියනේ දැනටමත් මගේ ඇස් ගෙඩිවල තිබ්බ වතුර සේරම මේ බීට් රූට් ඉස්ම උරාගෙන උරාගෙන යනවා ‍‍‍... මට තව ටික වේලාවකින් මේ ලෝකේ බීට් රූට් ඉස්ම නිසා අන්ධ වෙන පළවෙනිම ගැහැණිය වෙන්න වෙනවා... මට දියවැඩියාව හැදිලා...මට දැනෙන්නේ මම සීනි ගෝනියක් වගේ ඇත්තම කියනවා නම් බීට් අල තම්බපු වතුර බාල්දියක් වගේ... "

"ඔයා කොහොම ද ඒක දැනගත්තේ? "

"මම හීනයක් දැක්කා... "

"මොකද්ද ලමයො දැක්ක හීනේ? "

"මම දැක්කා අපේ දොස්තර නෝනා බීට් රූට් තම්බපු වතුරෙන් ලේ දෙනවා මිනිස්සුන්ට. ඒ මිනිස්සු සේරම ටික වෙලාවකින් හරිම සන්තෝසෙන් මැරිල ගිහින් ස්වර්ගේ ඉපදෙන්න පටන් ගත්තා. ස්වර්ගෙට දරා ගන්න බැරි තරම් මිනිස්සු කන්දරාවක් ගිහින් එකපාරටම එහේ ඉපදෙන්න ගත්තා. ටික ටික ස්වර්ගලෝකය බර වැඩි වුනා...ඒක කොළඹට පාත් වුනා...කොළඹ දිව්‍යලෝකයක් වෙලා තිබ්බා...‍මෙහෙම හීනයක් පේන්න නම් එකම හේතුව මට දියවැඩියාව නිසාම තමයි... "

"අයියෝ මේ විකාර හීනයක් නිසාද මේ කල‍බලේ? කොළඹට දිව්‍යලෝකේ පාත් වුන එක ගැන සතු‍ටු වෙන්නයි ඕන...ඔය බීට් කතාව වැඩක් නැහැ... "

"ඒක ‍එහෙම වෙන්නේ කො‍හොමෙයි? මට වැදගත් මෙතන මේ බීට් කතාව තමයි...ඉස්සෙල්ලම තේරුම් ගන්න මේ සංඥා ගැන. රතු රුධිරාණුවලයි සුදු රුධිරාණුවලයි සංකලනයෙන් තමයි අපේ මේ ලේ හැදිල තියෙන්නේ ...තව පට්ටිකා කියල ජාතියකුත් එක්කල...මතක නැද්ද ඉස්කෝලේ සෞඛ්‍යය පාඩම? බීට් අල තැම්බුවම ඒ වතුර අපේ ලේ වලට ආදේශ කරන්න පුළුවන් කියල මට හීනෙන් කීවේ අපේ දොස්තර නෝනා...ඒක ඇත්තක් නොවුනට ඒ දොස්තර නෝනා මට මීට සති දෙකකට විතර ඉස්සර හීනෙන් පෙනිලා කීව දෙයක් මට දැන් වගේ මතකයි...එයා කීවේ ලේ ජාති වෙනස් වෙන්නේ රීසස් සාධකයෙන් විතරක් නොවේය කියලා. හැබැයි මම ඒ කතාව කාටවත් කියන්න ගියේ නැහැ. දැං තමයි මම මේ ඔයාට උනත් කියන්නේ... "

"මොකද්ද රීසස් සාධකය කියන්නේ? "

"මම දන්නේ නැහැ බං...ඒත් ලේ වර්ග කරද්දී ඒ බී ඒබී සහ ඕ කියල කියන්නේ අන්න ඒ වගේ ලේ වල තියෙලු මොකක් හරි ගුණයක් ඒවා වෙනස් වෙනවලු කතා කරන බාසාව අනුවත්...මොකද කතා කරන බාසාව හැදෙන්නේ මොළය ඇතුලේ නිසා මොළය හරහා ලේ හැමතිස්සෙම ගමන් කරන නිසා අපි කතා කරන හිතන පතන බාසාවෙ දේවල් ලේවලට ඇතු‍ළු වෙනවලු..මේක හරිම රහසක් ලු... "

"ඇත්ත ද බං? එහෙම වෙනව ද? "

"ඔව් බං දැං බලපං හොඳ කෙනෙක් ගේ ලේ නරක කෙනෙකුට දුන්නම නරක කෙනා හොඳ වෙනවලු...බුද්ධිමත් කෙනෙක්ගේ ලේ මන්ද බුද්ධික කෙනෙකුට දුන්නම එයත් බුද්ධිමත් වෙනවලු...ඔන්න ඔය වගේ කතා බං ... ඕවා ඇත්ත ද කියන්න මම දන්නේ නැහැ...ඒත් ඒවා වෙන්න බැරි ද? "

"වෙන්න බැරි නැහැ... වෙන්න බැරි නැහැ... "

"ඒක තමයි මම කියන්නේ මේ ලේ වලට සිතුවිලි මුහු වෙනව නම් ඒ සිතුවිලි නිසා ලේවල රසායනය වෙනස් වෙනව නම් ඒ කියන්නේ කතා කරන බාසාව හිතන පතන බාසාව නිසා ලේ වල රසායනික සංයුතිය පොඩිත්තක් හරි වෙනස් වෙනව නම් මම කියන්නේ ලේවල සිද්ධ වෙන වෙනස් කමක් වුනත් ආයෙම මොලේ ඇතුලෙන් යද්දි අපි හිතන මතන තැන් වලින් ඒ වෙනස හඳුන ගෙන අපිට හීන නිර්මාණය කරනවා වෙන්නත් ඕන...සිතුවිලි නිර්මා‍ණය කරනවා වෙන්න ඕන...ඒ කියන්නේ ලේවල සීනි වැඩි වුනාම ‍ඒකත් මොළයට දැනිලා අපිට හීනයක් විදියට අනතුරු අඟවනවා වෙන්න පුළුවන් කියන එකයි... "

"අම්මෝ උඹ හිතන දුර...මම නම් ඕවා විශ්වාස කරන්නේ නැහැ...ඕනම නං උඹ බ්ලඩ් චෙක් කරගනින් අර නවලෝකෙට ගිහින්... "

"මට එහෙම ඕන නැහැ. මට හිතෙන දේ තමයි මගේ ලේ වල සීනි ගතිය වැඩිය කියන එක...දැං බලන්න මේක මට වෙන්න ගත්තේ මම දෙමළ ඉගෙන ගන්න පටන් ගත්ත දවසෙ ඉඳලම නේ...මේ විදියේ හීන පේන්න ගත්තෙම මේ අලුත් භාෂාව ඉගෙන ගන්න පටං ගත්තු දා ඉඳලමයි. ඉතිං ඒකයි මේකයි අතර කෙලින්ම සම්බන්ධයක් තියෙන්නේ ...ඒ හින්දා ලේ චෙක් කරන්න ඕන නෑ..."

"මට පේන්නේ උඹේ ලේ විතරක් නොවෙයි මොලෙත් පෙන්ව ගන්න‍ වෙයි වගේ මනෝ විශේෂඥයෙකුට...මට තේරෙන්නේ නම් ඒකයි...උඹ මොකද හදිසියේ දෙමළ ඉගෙන ගන්න පටං ගත්තේ? "

"ඔන්න ඔන්න උඹලට ඉතිං හැමදාම ඔහොම තමයි...කවුරු හරි විශේෂඥයෙක් කියන්නම ඕන ඕනම දෙයක් පිළිගන්න...අපි කොක්කුනේ...දෙමළ ඉගෙන ගන්නේ ඇයි කියලද ඇහුවේ ?? "

චන්ද්‍රාණි සිය දෑතින් මුහුණ පිස දමා ගත්තාය. ඇයගේ දෑසේ පතුලේ සුමියුරු රහසක් සැඟව ඇතැයි ඇගේ යෙහෙලියට සිතුනි.

හැන්දෑවේ ඥාණලිංගම් වැඩ ඇරී බෝඩිමට පැමිණ කාමරයේ ජනේලය ඇර දැමුවේය.
වෙනදා මෙන් අල්ලපු ගෙදර බෝඩිමේ චන්ද්‍රාණි පේන්නට හිටියේ නැත.

සුජාත පුත්‍රයන්ගේ වික්‍රමය

2009-10-17T20:19:00.000-07:00

"මට කවි පැටියෙක් හදා ගන්න ඕන! "

කවියාගේ මව ගැස්සී බලා සිටිද්දීම ඇයව කරට උස්සා ගත් කවියාගේ පියා දංගොල්ලට එපිටින් වූ කුඩා වණ රොදට ඇයව ඉමහත් වේගයෙන් රැගෙන ගියේය. ක්ෂණයකින් කවියාගේ මවගේ රෙද්ද කඩා දැමූ හෙතෙම ඇයව උස්සා ගස් දෙබලක හිර කරගෙන සිය යටි කයෙන් පහර දෙන්නට වූයෙන් අසමතුලිත වූ ගස් දෙබල පොලව දෙසට බර වීමත් සමගම ඇයගේ යටි කය ඉහලට එසවී තිබිය දී හිස මහ පොලව මත ගැටී මත් සමගම ඇගේ අතට අසු වූ මැටි ගලක් දෑතින් ම ඔසොවා ඇති හැකි උපරිම වීරියෙන් ඔහුගේ හිස මතට දමා ගැසීමත් සමගින්ම ඇ‍යගේ ගැබ් ගෙල අසල උණු සීරාවට ඔහුට මෝචනය වීමත් සිදුවනු දැනෙද්දී ඔහුගේ නිසල කය සහ සුනු විසුනු වී ගිය මැටි ගල් පස් ද ඇගේ සිරුර මතටම බැර විය‍. කවි‍යාගේ පියා කවියා සංසේචනය වීමට පැය හතරකට පෙරම මළවුන් අතරට ගිය අතර ඇය රෙද්ද ගසා දමා නැවත ඉණවට තද කර හැඳ ගෙන වණ රොදින් එලියට ආවාය. මිය ගිය මිනිසාගේ ධාතු ද සමග ඇය විහාර ගෙට ගොස් පංචසීලය සමාදන්ව ‍බෝධියට පැන් වඩා අලුත් මල් පූජා කළ ගැටිස්සියකගේ අතෙහි වූ තෙල් බෝතලයෙන් ස්වල්පයක් දොලොස්මහේ පහනට දමා පහනෙන් ඇඟිල්ලට පොඟවා ගත් තෙල් බිංදුවක් සිය හිස කෙස් අතර උලා ගත්තාය.

කවි පැටියා පන්සලේ ඝංඨාරය සිවු වරක් නාද දෙද්දී අව පක්ෂයේ සඳ හතරවැනි කලාවේ නැංගුරම් ලද්දී සිය ආත්මය සංසේචනය වෙමින් පැවති යුක්තාණුවේ මයිටකොන්ඩ්‍රියා අසලින් වූ ක්රෝමසෝමයක දැවටී මවගේ හදේ රිද්මයෙන් ඔංචිලි පදින්නට විය. පී එච් අගය මෙන්ම ඩීසීඑච් හෝමෝන වල සාන්ද්‍රණ ද අඩු වැඩියෙන් සමාකලනය වූයෙන් යුක්තාණුව යහමින් ගර්භාෂයේ බිත්තිය මත නැංගුරම් ලෑයෙන් ඔංචිලිවාරම් නවතා කවියා අත පය හකුල ගෙන හෘදය හැදෙන තුරු දිවා රාත්‍රි විසි අටක් බලා සිටියේය. පුෂ්ප මංජරියකින් එක පුන් මලක් පූදින්නා සේ පිපී ආ හෘද මාංසය සමගින් ඉතා සිහිනිව මවගේ ලබ් ඩබ් ආකාර වූ හෘද ස්පන්දනයේ ම අනුකාරක හඩක් යම්තමින් නැගෙද්දී කවියා සිය ජීවිතයේ පළමු විරිත හඳුනා ගනිමින් සිටියේය.

කවියාගේ මවට එක් උදෑසනක සිය මුඛයෙන් මුළු ලොවම ප්‍රාදූර්භූත වන්නා සේ ද සිය ඛේට ග්‍රන්ථි වලින් අනවරතව ගලා ආ උණු ලෝ දිය දහර ගිනි රස්න ජල සීරාව රාවණා ඇල්ල කඩා හැලෙන්නා සේ හකුපාඩා අතරින් දැනෙන්ට ද වූයෙන් ඇය ගෙයි පිළිකන්නට දුවගොස් ඔක්කාරය කරන්නට වූයෙන් ඇයට තව දුරටත් ග්‍රාම වාසය නොහොබින්නේ යැයි ඒත්තු ගිය හෙයින් වහාම එදා උදැහැනැක්කේම සෙයිලම බලා ඇදෙමින් තිබූ මිරිස් ලොරියේ රියැදුරා හා එකතුව ලොරියේ ඉදිරිපෙල අසුනේ වීදුරු කන්නාඩිය අසලින් වාඩි වී හතරවරම් දෙවිවරුන්ගේ ඡායාරූප දෙස ඇසිපිය නොහෙලමින් බලා සිටිමින් හැන්දෑකරයේදී නවගමුව හන්දියෙන් හැරී රියැදුරාගේ බාල නංගිලැයි දිහා ගියාය. කවියා ගැස්සිලි බැස්සිලි මැද්දෑවෙන් මේ යන ගමන විශ්වයේ ගන්ධබ්බයෙකු ලෙස ගමන් කළ ඒකාකාරී වේග රිද්ම ආකාරයට වඩා කොතරම් මනරම් පරිමන්දිත චලිත රිද්මයක් මහ පොලොව මත චලනය වීමේ දී හට ගන්නේ දැයි විපරමින් සිය ජලාබූජ ජීවන කාලය උන්මාදයෙන් ගත කලේය.
අවසිහියෙන් රැප් සංගීතයකට නටන්න‍කු මෙන් ඔහු අර්ධ ක්ලාන්තව හුන්නෙන් රියැදුරා රාත්‍රියේදී කවි‍යාගේ මවගේ සයනයට පැමිණීම පිළිබඳ කිසිදු නිනව්වක් නොවීමේ හේතුව මැකී යන්නේ කවි‍යාගේ මව සිය දත් කූටු කාගෙන ඔහු වෙත හෙමින් සහ සැරෙන් "කොරගන්න දෙයක් හෙමින් කොරගනින් මිනිහෝ!.. මගේ බඩේ දරුවෙක් ඉන්නෝ..." යැයි කීම ඇසුනෙන් පමණි.

එදින සිට මාස දෙකක් යනතුරු විඩෙන් විඩේ කවියා ඉමහත් තෙරපුමක ආස්වාදයක් ලබමින් සිටිද්දී දිනක් ඇය කීවේ මේ උපදින්ට ඉන්න එකා කොහේ හෝ කාගේ හෝ ඇඟේ ගසා නැවත මුකලානට යා යුතු බවය.

කී පරිද්දෙන්ම කවියා ඇගේ කුස සැප සේ ගත කරමින් හුන් කාලයේ අවසානය ලං ව ඇති බව දැනුනේ අපස්මාර රෝගියකු මෙන් ඇය විලි රුදා විඳිමින් ප්‍රසව තරංගයෙන් සිය යහන් ගබඩාව භූමි කම්පාවකට ලක් වෙමින් සිටි මොහොත උදා වූ දිනයේ ය.

වැල මදුලකින් ඇටය පනින්නාසේ ඉමහත් ආශ්වාදයෙන් සිය සිරුර ඇගේ රැහැණින් මුදා මෙතුවක් ජල තරංග ඔස්සේ පමණක් ඇසි අවට ‍ලෝකයේ සියලු ශබ්ද පියවි කනින් ඇසීමටත් පළමු වතාවට තම හදවත ගැහෙන රිද්මය තම කනින් අසා ගැනීමටත් මෙතුවක් දස මසක් තිස්සේ අනවරතව අසා සිටි සිය මවගේ ලබ් ඩබ් ශබ්ධාවලියට සමු දීමටත් කවියාට සිදු වූයෙන් පුර පසලොස්වක කුජ නවයේ සැරිසරන ගුරු කන්‍යා රාශියට පත් වන හෝරාවේ කැති නැකතේ තුන්වන පාදයේ සඳු ගමන් කරද්දී කටක ලග්නයෙන් මෙලොව එලිය දුටු කුමරු යැයි කිසිවකු විසින් සිය ජන්ම පත්‍රය නමෝ විත්තියෙන් සාදනු ඇතැයි කවියා සිතුවද ඒ කිසිවක් පොත පතක සටහන් වන්නට පෙර ඉස්පිරිතාල ඇඳෙන් අමාරුවෙන් බැස ගත් කවියා‍ගේ මව ඔහුව ඔතා සිටි සුදු පැනල් රෙද්ද පිටින්ම ගෙන තාප්පයෙන් පැන මහ මගට වන්නීය. කැනල් පාරේ නිශාචරයින් අතරින් ඇය කඩිමුඩියේ පා තබා මීට පැය හතරකට පෙර දරුවකු වැදූ ගැහැණියක ලෙස නොව සිපිරිගෙයින් පැන ‍යන්නා වූ සොර මුලක නාය‍කයෙකු බඳු වේගයෙන් දරු ගොට්ට ද කිහිලි රුවා ගෙන දුව ගොස් ප්‍රථමයෙන් ම හමු වූ කසල බාල්දියට කවියා දමා ඈ නොපෙනී ගියේ සර්වලෝක විනාසාය යනුවෙන් හැඳිනිය හැකි මේ ලෝකයේ කිසිවකු නොදත් භාෂාවකින් මන්තරයක් මතුරමිනි.

එතැන් සිට ගත වූ පැය අටක කාලයක් කවියා සිය උප්පත්ති කේන්ද්‍රයේ සඳු ලැග හුන් රාශියේම සෙනසුරුද වූයෙන් උපන් ජන්ම ඒරාෂ්ටක අවස්ථාවෙන් ඉපදීම කරණ කොට මියෙන්නට තරම් ප්‍රභල දුර්ගන්ධ වූ කැලි කසල මධ්‍යයේ නිරුපද්‍රිතව ජීවය අකාලයේ මියෙන්නට වූ අවසාන හෝරාව පන්නා ගෙන ගොස් ජීවත් වීමේ තවත් උත්ප්‍රේරණයක් සලසා ගත්තේ හිරු සමගින් කැලි කසල ගොඩ වෙත පියඹා ආ සෙනසුරුගේ වාහනය වූ ද කපුටන්ගේ අනවරත කරච්ච‍ලයේ රිද්මය රස විඳිමෙනි.

චන්ද්‍රයා සිය අකාෂ පථයේ සහචර සෙනසුරා සමග වූ සංයෝග වූ අවස්ථාව ක්‍රමයෙන් දිය කර ශනිට වඩා වේගයෙන් තව දුරටත් සිය ගමනේ යෙදුනෙන් ජන්ම ඒරාෂ්ටකය පහවී කවියා නගරයේ කැලි කසල හමුදාව භාරයට පත් වූයෙන් වහාම පත්‍ර වාර්තාකරුවන් රොත්තක් මැද්දේ ඔවුනගේ කැමරාවල සැනෙලි මැද්දෙන් සිය මුව අයා කිරි ඇබින්දක් දෙන නිරිඳෙක් ඇත්දෝහෝයි අසන්නාක් මෙන් හෙලූ බැල්ම විජයග්‍රහණය වීමත් සමගම අලුත උපන් ළදරුවන්ට දෙන කිරි මිශ්‍රණ සොයමින් යන්නට කිසිවකු නොවූයෙන් කැලි කසල එකතු කරන ස්ථානය අසල වූ බුලත් කඩය කරමින් වෙළහෙලදාමෙන් ජීවත් වූ ඇගි අක්කා වහා සිය හැට්ට බොත්තම් විවර කොට සිය වමත් තන පුඩුව දුන්නෙන් එහි ඇති කිරක් නොවූවද ඇති තාක් වූ උණුසුම මධ්‍ය‍යේ කවියා සිය පළමු මව ලෙස ඇය සිහියේ ඇඳ තබා ගත්තතේය.

එතැන් පටන් කවියා කපුටු බෝ රුක අසල ටියුබ් ලයිට් හපා කන කලු ගල් කැට වතුර සමග බී ගිලින මැජික් කාරයාගේ දිවා සහ සැන්ඳෑ සංදර්ශනය ද ඇගි අක්කා සමග දවල් දවසේ ම බුලත් මිටි බඳින හැන්දෑවෙද්දී ඉහ මුදුනට කර හවරිය ඔතා කෙස්ස බැඳගෙන විලවුන් නාගෙන පාරට බසින ප්‍රෙමක්කා ද අතර කාලය ගෙවී සියල්ලන්ටම නොදැනී මහ පාරේ තාප්ප මත අලවා ඇති අටකලම්පන්නයක් වූ පෝස්ටර ද පාරේ ඉබා‍ගාතේ යන් වහු කුණු බල්ලන් ද උන්ගේ ඇඟවල් මත වැස හුන් මැක්කන් ද කඩමින් ලොකු විය. කවියා කිසි විටෙකත් තමාගේ මව හෝ පියා හෝ නොදැන සිටීමෙන් ඔහුගේ සිත ඉමහත් සැහැල්ලුවෙන් පැවතුන අතර කළු ගල් ගිලින මිනිහා දිනක් කවියාගේ රත්තරන අතින් අල්ලා බලා කළ පරීක්ෂණය ඇවෑමෙන් සිය පියා මෙලොව කොහේ හෝ ඉන්නා බවත් ඔහු තමන් මෙන්ම වෙනත් මැජික් කාරයෙකු ගේ සංදර්ශණ බලමින් ද වෙනත් ප්‍රේමක්කා කෙනෙකු ගේ ලැම පෙදෙස හොරැහින් බලමින් ද ඉන්නවා විය යුතුය යන්න කවියා එකහෙලා තීරණය කරන විට නගරසභාවේ හැන්දෑවේ හතරට පිඹින නලාව නාද වූයෙන් මෙලොව කිසිවෙකුත් නොදන්නා ඒ ඔහුගේ නව වන උපන් දින සාදය අහසේ හිරු ගමන් ගත් පථයේ සලකුණු වී තිබුණි.

කවියා කුණු වලට දමා යාමට ප්‍රථම කවියාගේ මව මැතිරූ මන්තරයක් වූයෙන් ද එය ඔහුගේ දෙසවන් මත රැව් පිළිරැව් දෙන්නට වූයෙන් ‍දිනක් මැජික් සංදර්ශකයා සිය කාසි එකතු කරන ටින් එකේ රැඳුනු කාසි ගණන් කරන වේලාවක් බලා හෙතෙම ළං වී ඇසුවේ තමා කොහෙන් මේ ලෝකයට පැමිණියේ දැයි කියාය.

උඹ ආවේ මේං මේ ගල් ගෙඩි බඩෙන් එන්නා වාගේම ය

කවියා සතුටට පත් වූයෙන් එතැන් සිට තමන් මෙලොව පැවතීම පිළිබඳ සියලු සැක සංකා හිරු දුටු ‍පිනි මෙන් ද උදෑසන ලූ කෙළ පිඩක් මෙන් ද සිය සිතින් අකාමකා දැමූයෙන් මැජික්කාරයාගේ ප්‍රථම ගෝලයා බවට පත්වීමේ වරම ද උදා කරගත්තේය. දින කීපයකින්ම ටියුබ් ලයිට් අතින් ගසා කුඩු කිරීමටත් කුඩා ගල් කැබලි හොඳින් ගිල දැමීමටත් කුඩා රබානක් ගෙන විරිඳු කියන්නටත් කකුලෙන් චිත්‍ර අඳින්නටත් කවියා පුහුණු වූයෙන් උත්පත්ති අවස්ථාවේ සිකුරා ලග්න ගතව සිටීමේ සියළු ගති සොබා පහළ වූයෙන් කවියා චිත්තාකර්ෂණීය රුවින් ද පළල් දෙවුරින් ද කඩවසම් ශෝභාමත් සිරුරින් ද අසාහාය කාය ශක්තියෙන් ද වර්ධනය ව මහළු මැජික් ශිල්පියා වෙනුවෙන් සංදර්ශණ තනිවම පැවැත්වීමට තරම් පළපුරුද්ද අත් කරගත්තෙන් දිනක් පෙට්ටියකට දමා වැසූ තරුණියක් දෙකට කපා පෙන්වීමෙන් පසු තරු පහේ හෝටලයක නිත්‍ය මැජික් පෙන්වන්නා බවට පත් වීමත් සමග සිය විංශෝත්තරී දශා චක්‍රයේ සිකුරුට අදාල වසර විස්සේ පළමු වර්ෂය ගෙවා යන්නට පටන් ගත්තේය‍‍‍.

කවියා සිය මැජික් හැකියාවෙන් පොහොසතුන් වශී කරගන්නට සමත් වූයෙන් සිය දුප්පත් මිතුරන් අතරට එකතු වූ නවීන පන්නයේ අරුමෝසම් විලාසිතා වැළඳ ගත් සුඛෝපභෝගී ජීවන ක්‍රමයෙන් ආලිප්ත වූ අලුත් ධනවත් මිතුරන් ද සිය ආශ්‍ර ආශ්‍රමයට පත් වූයෙන් දිනක් මැජික් සංදර්ශණාවසානයේ දී එබඳු ධනවත් තරුණ කණ්ඩායමක ආරාධනයෙන් කවියා සිය මැජික් ශිල්ප දක්වන්නට ඔවුනගේ මන්දිරයට ගියේය.

ඒ යන ගමනාතුර එක්තරා රටක වෛද්‍ය විද්‍යාව හදාරනු පිණිස ගොස් සිටි ධනවත් තරුණියක් පුරුෂාණු වෙනුවට අබ ඇට ගර්භාෂගත කර දරුවන් උපදවන ක්‍රමයක් කෙරෙහි පර්යේෂණයේ යෙදී සිටියා ය. ඇය සිහිනයෙන් දකින්නේ ද සැබෑ ලොව සිදුවන තතුම බැවින් ඇය අනාගත වාක්‍ය කියන්නියක ලෙස ද ප්‍රකටව සිටියාය. ඇය ‍මීට වසර හතකට පෙර සිය ප්‍රථම උපාධි නිබන්ධයේ දී ප්‍රකට කර සිටියේ ආකාෂ වස්තු වල චලිතයේ පවතින අක්‍රමිකතාවයක් නිසා පොළවේ කිසියම් නිශ්චිත ප්‍රදේශයක උපදින මැජික් ශිල්පියකු විසින් මුළු ලෝකය ම පාලනයට ගන්නා බවය. එමෙන්ම ඇය සිය උපාධි නිබන්ධයට විවිධ වර්ගයේ කවි සහ කතා ද බොහෝ ප්‍රමාණයක් අමුණා තිබූයෙන් ඇයට උසස් සාමාර්ථයක් දී නැවත උපන් ගම්පලාත වෙත වෛද්‍යවරියක් ලෙස බලගන්වා එවා තිබුණි.

ඇය ද සහභාගි වූ මෙම මැජික් සංදර්ශණය අවසානයේ දී ඇය විසින් ඒ කවියා රැගෙන ආ කණ්ඩායමේ කෙනෙකුට කීවේ තමා විසින් මින් පෙර අනාවැකි කියන ලද මැජික් ශිල්පියා මේ විය යුතු බවයි.

පෙට්ටියක ලූ ගැහැණියක් පණ පිටින් දෙකට කපන්නට සමත් මිනිහෙකුට මේ ලොව ඕනෑම දෙයක් කළ හැකි බව මෙම වෛද්‍යවරිය එම කණ්ඩායමට සිය ශල්‍ය වෛද්‍ය විද්‍යා දැනුමෙන් ඒත්තු ගැන්වූවාය.

මින් කුපිත වූ ධන කුවේරයන් මෙතුවක් තමන් අමන්දානන්දයට පත් කළ කවියා අල්ලා රජයේ මහාමාත්‍යාදීන්ට චෝදනාභිමුඛව පෙන්වා සිරගත කරන්නට වැඩකටයුතු කළෙන් සිය සිකුරු දසාවේ රාහු අන්තර් දශාව උදා වී ඇති බව කවියා දැන නොගත්ත ද එය රාත්‍රි අහසේ තාරුකා පංති අතර සටහන් ව තිබුනේය.

සිරගතව හුන් කවියා දිනක් සිර මැදිරි බිත්තියේ කලකට පෙර සිටියවුන් විසින් ලියා තිබූ වැකියක් කියවමින් සිටියදී සිරගෙදර ජේලර්වරයෙකු නිරීක්ෂණ සටහනක් ලොග් පොතේ දමා ගොස් තිබුනේ කවියා නොතේරෙන භාෂාවකින් නොයෙක් දේ සිරගෙදර බිත්ති මත ලියන බවත් ඒවා වහාම පරීක්ෂාවට ලක් කළ යුතු බවත් ය.

එනයින් ඉන් පසුවදාම හිරගෙදරට වන් අක්ෂර විශ්ලේෂණ මහා ප්‍රාඥයන් පිරිසකගේ නිර්දේශයෙන් වහා කැඳවූ මහාධිකරණ බලතල සහිත ඒක පුද්ගල කමිටුවක තීරණය වූයේ කවියා විවිධ ජනතා නැගිටීම් වලට තුඩු දෙන අපභ්‍රංෂ විප්ලවවාදී කවි විශේෂයක් ලියා ඇති බවත් ඔහු දේශ ද්‍රෝහියකු බවත් ඔහු වහා ක්‍රියාත්මක වන පරිදි ප්‍රථම එල්ලා මැරීමේ සංදර්ශනයේදීම එල්ලා මරා දැමිය යුතු බවත්ය.

මැජික් ශිල්පියා කවියෙකු ලෙසත් විරෝධාර විප්ලවවාදී විමුක්තිකාමියකු ලෙසත් සුජාත පුත්‍රයන් අතින් මිය ගියේ එසේය.

‍අත්‍යවශ්‍ය සටහනක්

2009-10-12T20:59:00.000-07:00

‍අත්‍යවශ්‍ය සටහනක්

මා අනාගත ලේඛකයකු විය හැකියැයි කිසිවකු වරදවා වටහා ගනිතැයි ම‍ට සිතුනි. මන්ද යත් මගේ අනාගත ලේඛන දිවිය උදෙසා ඔවුහු මට උපදෙස් ආචාර ධර්ම සහ ඥාණය ලබා දීමට ස්වේච්ඡාවෙන් ඉදිරිපත් වන බැවිනි. අයෙක් මට අක්ෂර වින්‍යාස ගැන ද තවෙකෙක් ව්‍යාකරණය ගැන ද මට ආද‍රයෙන් ද හාසයෙන් ද අපහාසයෙන් ද උපදෙස් දෙති. තවත් අය ප්‍රතිචාර සමාචාර කිරීමේ වත්පිළිවෙත් ගැන සිය ඥාණ කෝෂ්ඨාගාරය කලතමින් විග්‍රහ කතෝපකථන කරුණාවෙන් ද දයාවෙන් ද සෝපාහසයෙන් ද ඉදිරිපත් කරති. පරිශීලනය කළ යුතු පොත් පත් ඇදුරන් ගැන ලිඛිත දේශන පවත්වති. තවත් අය තවත් දේ කරමින් සිටිති. මේ සියල්ල දැන් ම‍ට මහත් සියොළගම දවා හළු කරන්නට තරම් බියකරු ලෙස දැනෙන ගින්නකි. ඒ බව මේ ප්‍රඥාසම්පත්තියෙන් ආඨ්‍ය වූවන්‍ට නොතේරෙන්නේ නොවෙයි. ඒ ඒ අයගේ ක්‍රමය ය. ඒ අය සතුරන්ට පහර දෙන‍්නේ මිතුරු උපක්‍රමයෙනි. මට මේ ගිනි රස්නය දැනෙන්නේ මේ දෙන උපදෙස් නිසාවෙන් නම් නොවේ. මේ උපදෙස් දෙන්නන්ගේ වාග් විලාසයන් අස්සෙන් සියුම්ව මතු වෙන ඔවුන් දැඩි ලෙස ලොවින් වසං කොට හංගාගෙන සිටින වෛරයේ ගින්නේ රස්නය නිසාවෙනි.

වඳුරෙකු කීබෝඩ් එකක ඇඟිලි ඔබමින් අනන්ත කාලයක් ගත කළ හොත් ඔහු විසින් සසම්භාවී ලෙස ටයිප් කරන අක්ෂර සංකේත සංකරණ සහ සංයෝජන සියල්ල අතර භගවත් ගීතාව වුවද ප්‍රතිරචනය වීමක් විය හැකි බව සම්භාවිතා ගණිතය කෙළ පැමිණි ප්‍රඥාවන්තයින් පවසා ඇත. මෙහි ප්‍රායෝගික සත්‍ය කුමක් වුවත් න්‍යායිකව නම් සිදු විය හැක්කකි.

මෙලෙස ම මම ද එබඳු වඳුරෙකු ලෙස නමුත් වෙනස් වඳුරු ක්‍රමයකට විවිධ වචන වාක්‍ය සහ අදහස් තැනින් තැනින් සොරකම් කොට සසම්භාවී ලෙස එකට තබා කිසිවක් අමුණා මෙතැන තබමින් සිටිමි. ඒ කිසිදු ලේඛන උපාංගයක් මගේ නොවේය. මගේ අතැඟිලි වල අගින් යතුරු ලියවෙන මේ සියල්ලේ මුල් පිටපත් මා සමග සම්බන්ධ වන්නේ ඉතාම සංකීර්ණ ආකාරයකට ය. ම විසින් කියවන අසන සහ සිතන ලද බහු විධ විකාර සහ ඒවාට තුඩු දුන් සමාජ සිදුවීම් අධ්‍යයන ආයතන සහ පුස්තකාල නැමති දැනුමේ බලාධිකාරයන් වල යාන්ත්‍රික කොපි මෙලෙස මා අතින් ඡායාපිටපත් බවට පත්‍ වීම ලේඛන කලාවක් නොවේ. මවිසින් කිසිදු අලුත් අදහසක් හෝ ලිවීමේ ප්‍රාතිහාර්යයක් සිදු කර හෝ කරමින් ඉන්නේ ද නැත. මම කිසිදු අලුත් වචනයක් නිමවා නැත. මා විසින් ප්‍රයෝජනයට ගන්නේ ද අනිත් බොහෝ අය කල්ප කාලාන්තරයක් තිස්සේ අදහස් උදහස් කියා පෑමට යොදා ගත් වචනම ය. එහෙයින් ඒවා සම්බන්ධව මට අයිතියක් ඇත්තේ ද නැත. මේ වචන පුරුද්දා හදන වැකි සමහර විට අරුතක් ජනනය කළ ද බො‍හෝ විට එවැනි දෙයක් ද නොවෙන වග කාට වුවත් පැහැදිලිය. එනයින් අලුත් අදහස් නිර්මාණය කිරීමක් ද නොවේ. මේ කියවන වැකිය පවා ඔබ මී‍ට පෙර කොහේ දී හෝ කියවා ඇති බවට නොඅනුමානය. මේ සියළු අදහස් වෙනත් කවුරුන් හෝ මින් පෙර ද පවසා ලියා ඇත. එක අතකින් වියරණ බිඳී ගොස් හෝ ලිවීමෙන් මා කරන්නේ ඒ අදහස් ම බිඳුනු වියරණයකින් නැවත කීමක් විය හැකිය.

දැන් කීමට ඇත්තේ ලිවිය යුතු සියල්ල මට පෙර ලිවීම නමැති කාර්ය සාධිතයන් අතින් ලියැවී හමාර වී ඇති බවය.

සියළුම අදහස් මට පෙර සිටි අයගේ හිස් මතින් උත්පාත වී මහ පොලොව වෙත සපැමිණ පොත් පත්වල ලියැවී මුද්‍රණය වී ඇත.

සිතන්නට දැන් අලුතෙන් කිසිවක් නැත. සියල්ල සිතිය යුතු අය සිතා අවසන් කර ඇත.

බිඳුනු වියරණයකින් පරණ දෑ නැවත කියවන්නට ලැබීම ඔබේ අභාග්‍යය විය හැකිය.

මා දැන් කළ යුත්තේ වියරණ බිඳීම පමණි.

ප.ලි.

එහෙයින් මා විසින් මෙහි ලියා තබන ඕනෑම දෙයක අයිතිය ඔබ සතුය. ඒවා නැවත ලිවීම නැවත විකෘති කිරීම සහ නැවත නැවත තැන් තැන් වල ලියන්නට හෝ තමන් කැමති අකැමැති ඕනෑම දෙයක් මේ ලියවිලි වලට කරන්නට ඔබට සියළුම බලය සහ අයිතිය ඇත්තේය.

මේවා ලියා ඇත්තේ ඔබට ද මා මෙන්ම ලෝකයේ ලියා ඇති සියළු දේ විකෘති ලෙස කියවා ගැනීමට ඔබට සහ මට ඇති අයි‍තියේ නාමයෙනි.

ඇය ශෝකී නම් වූ ඇස්ටරොයිඩයයි

2009-10-05T20:35:00.000-07:00

ඇය ශෝකී නම් වූ ඇස්ටරොයිඩයයි

මේ අහන්න කෆ්කා. දැන් ඔයා අත්දකින දේ තමයි හුඟාක් ග්‍රීක ශෝකාන්තවල ගරු අරුත වෙලා තියෙන්නේ. මනුස්සයා තමන්ගේ ඉරණම තෝරා ගන්නේ නැහැ. ඉරණමයි මනුස්සයා ව තෝරා ගන්නේ. ඒකයි ග්‍රීක නාටකයේ මූලික ලෝක දර්ශනය. එ‍තකොට ඇරිස්ටෝටල්ට අනුව ඛේදවාචක අර්ථය එන්නේ ප්‍රධාන චරිතයේ නරක ගුණයක් නිසා නොවෙයි. යහපත් ගුණයක් නිසා. ඒක යි උත්ප්‍රාසය. මං මේ කොතනටද එන්න හදන්නේ කියලා දන්නවා ද? මිනිස්සු ඛේදවාචක ඇතුළේ තව තව එරෙන්නේ ඒ ගොල්ලන්ගේ දෝසයක් නිසා නෙවෙයි. ඒ ගොල්ලන්ගේ සුචරිතයක් නිසා. හොඳම උදාහරණය සොෆොක්ලීස්ගේ ඊඩිපස් රෙක්ස්. ඊඩිපස් ඛේදවාචකයට මුහුණ දෙන්නේ එයාගේ කම්මැලිකමක් හරි ගොබ්බකමක් හරි නිසා නෙවෙයි. එයාගේ තිබිච්ච වීරකම සහ අවංකකම නිසා. අන්න ඒකෙන් තමයි අනිවාර්ය උත්ප්‍රාසය උපදින්නේ.

කෆ්කා මුහුදු වෙරළේ-හරුකි මුරකමි -පිටුව 286
ගාමිණි වියන්ගොඩ පරිවර්තනය

ජිනදාසට නගරයේ කිසිදු ඩිස්පැන්සරියක නිදි පෙත්තක් මිළ දී ගන්නට නොහැකි විය. කිසිදු තැබෑරුමක මත් පැන් පොදක් නොවීය. නිදි පෙති මෙන්ම මත් පැන් ද සියල්ල විකි‍ණී අවසන්ව තිබූයෙන් සමහරු ඕඩිකොලොන් බෝතල් සහ වයින් ස්පිරිතු මෙන්ම ටර්පන්ටයින් වැනි රසායනික ද්‍රාවණ සොයා කඩ සාප්පු පීරමින් යන්නට වූහ. පොල් ගස් කරටි වල අමුණා බැඳ තැබූ කුඩා මැටි මුට්ටි වලින් සෑම පොල් ගහකම මුදුන් හැඩ වී තිබුනි. කිසිදා මදින්නට යොදා නොගත් පොල් ගස් ද රා මැදීමට යොදා ගෙන ඇති අයුරැ හාත්පස දකින්නට ලැබුනි. සමහරු පළතුරු වර්ග බැරල් වල දමාගෙන ඒ මතට ඊස්ට් ඉස පැසවන්නට උත්සාහ ගනිමින් සිටියහ. කිසිදා සයිඩර තාක්ෂණය නොදත්තවුන් සිය ගෙමිදුල් වල කසිප්පු- සීනි කරිංඤ්ඤං- සයිඩර් යනාදී මෙකී නොකී හැලි අරක්කු තරගයට මෙන් පෙරන්නට වූහ.

මේ සියල්ලන්ට මත් වන්නට ඇවැසි වූ මොහොතයි.

ජිනදාස අවසානයේ කළුකඩකාරයෙකු මුණ ගැසී අරක්කු බෝතලයක් මිල දී ගන්නට සිය සේසතම දුන්නේය. ඔහුට මේ බෝතලය මෝය කටේ ගිය පොල් ලෙල්ලක් මෙන් දැනුනි.

මිනිසුන් ට අවශ්‍යව තිබුනේ ඒ විපත්තිදායක මොහොතේ අවසිහියෙන් සිටීමටය. ඒ තවත් පැය දොලහකින් මහ පොලොව මත පතිත වන ඇස්ටරොයිඩයක් හේතුවෙන් පෘථිවිවාසී සියල්ලන් දැවී විනාෂ වී යන්නට නියමිත වූ බැවිනි. මුළු නගරයම ‍මුළු රටම මෙන්ම මුළු ලොවම කැළඹී සිය අවසාන මොහොත තත්පර ගණනින් ගණන් කරමින් හිඳිනා අවසන් වරුව එය විය. අහසේ පායා තිබූ සඳ මෙන්ම ඊට මදක් කුඩාවට දිලිසි දිලිසි හුන් ඇස්ටරොයිඩය මහ පොලොව ඉලක්ක කර ගෙන එමින් සිටින මොහොතේ එය දර්ශනය වන අර්ධ ගෝලයේ රටවල්වල වැසියන් හට කාලය ගෙවුනේ ඉමහත් නොසන්සුන් බවකිනි.

මෙන්න එසැනින් සැන පුවත්. එසැනින් සැන පුවත් ඔබ වෙත ගෙන එන්නේ ආකර්ෂා ය. දයාබර ‍හිතවතුනි. තවත් ලෝක විනාෂයට ඇත්තේ පැය එකොලහකුත් විනාඩි තිස් හයකුත් තත්පර පනස් දෙකකි. නාසා ආයතනය ප්‍රකාෂ කරන පරිදි ග්‍රාහක අංශුව පෘතුවියේ ඝට්ඨනය වන්නේ උත්තර අක්ෂාංශ විසි දෙකයි තිස් දෙකයි අතර සහ නැගෙනහිර දේශාංෂ එකසිය එකොලහයි එකසිය විසි තුනයි අතර කළාපයට ය. දැනට ගණනය කර ඇති නිරවද්‍යතාවය අනුව මේ මොහොතේ අහසේ දිස්වන පූර්ණ චන්ද්‍රයාගේ ආපාතන කෝණයට සමාන ලෙස ඇස්ටරොයිඩයේ ආපාතන කෝණය සම වන මොහොතේ සිට විනාඩි තුනක කාලයක් ඇතුලත එය පෘථිවිය මත ගැටෙන්නට නියමිතය. මේ ගැටුමට පූර්වයෙන් පෘථිවි වායුගෝලය හරහා ගමන් කරන විනාඩියක කාලය තුල වායුගෝලයේ උෂ්ණත්වය සූර්යයාගේ උෂ්ණත්වයෙන් අර්ධයකට පත්වන හේතුවෙන් ඇස්ටරොයිඩයේ ගමන් පථයේ ඡේදන ලක්ෂ්‍යය වන ඉහත දැක්වූ අක්ෂාංශ සහ දේශාංශ කේන්ද්‍ර කරගත් අරය කිලෝමීටර පන්දහසක් වන සී‍මාවේ සියළු ගොඩබිම් සහ සාගර ප්‍රදේශවල සියලුම දේ වාෂ්ප වී යන අතර එමගින් විශාල තාප ප්‍රමාණයක් මුදා හැරෙන හෙයින් එම මොහොතේ සිටම පෘථිවිය මත සියළුම ජීව ක්‍රියා සහිත සත්ව සංතතිය විනාෂ වන්නට ක්‍රමයෙන් පටන් ගන්නා බවත් ප්‍රථම තත්පර දහය ඇතුලත පෘථිවිය මත සියළු ජීවින් පිලිස්සී යන බවත් නාසා ආයතනයේ ප්‍රකාෂ‍කයෙක් මීට ස්වල්ප වේලාවකට පෙර මාධ්‍ය හමුවේ ප්‍රකාෂ කොට ඇත. දැනට ඇමරිකා එක්සත් ජනපදය සිය උපරිම තාක්ෂණය භාවිතා කො‍ට මෙම ග්‍රහක අංශුව විනාෂ කිරීමට ගත් සියළු උත්සාහයන් ව්‍යර්ථ වී ඇති අතර දැනට ඇති තාක්ෂණික සීමාවන් හරහා ඉතිරි වී ඇති පැය එකොළහ තුල ක්‍රියාත්මක කළ හැකි කිසිදු ක්‍රියාදාමයක් නොමැති බව ඇමරිකානු ආරක්ෂක සේවය නිල නි‍වේදනයක් නිකුත් කරමින් ප්‍රකාෂයට පත් කර ඇත.

සියල්ලෝ ළඟ ළඟ එන මරු දකිමින් වික්ෂිප්තව සිටියහ. ඇස්ටරොයිඩයේ ගැටුම ස්ථිර ලෙසම ප්‍රකාෂයට පත්වූ මීට වර්ෂයකට පෙර සිටම පෘථිවිවාසීන් එම අවස්ථාවට මුහුණ දීමට බොහෝ අමාරුවෙන් සිත් සාදා ගන්නට පටන් ගත්තේ ලෝක ව්‍යාප්ත මාධ්‍ය ජාලය විසින් නිරන්තරයෙන් නිකුත් කළ මෙම ව්‍යසනයේ නොවැලැක්විය හැකි හේතූන් කෙරෙහි හට ගත් විශ්වාසය ක්‍රමයෙන් වර්ධනය වන්නට වූයෙනි. මුලින්ම ලෝකවාසීන් විශ්වාස කළේ ඇමරිකානුවන් හෝ බ්‍රිතාන්‍ය ජාතිකයන් හෝ චීන ජාතිකයන් විසින් ක්‍රියාත්මක කරනු ලබන අභ්‍යාවකාෂගත අධිබල පරමාණු බෝම්බ රැගත් අභ්‍යවකාෂ යුධ යානා එය මත පතනයන් හේතු කොට ගෙන මෙම ඇස්ටරොයිඩය එහි ගමන් මගේදීම විනාශ කිරීමට සමත් වනු ඇතැයි කියාය. එවැනි ක්‍රියාන්විතයන් කීපයක්ම අසාර්ථක වූ බව මීට පෙර මාස ගණනාවක් තුලම ප්‍රවෘත්ති සේවා මගින් අනාවරණය කළෙන් සියල්ලෝ මහ පොළොවින් සමුගැනීමට එකාවන්ව තීරණය කළහ. සමහරැ කල් තියාම සිය දිවි හානි කරගන්නට යොමු වීමත් සමග ලෝකයේ සියළු තැන්හි පෙර කිසි කලෙක නොවූ විරෑ ලෙස ශෝකජනක ආරංචියෙන් පිරී ගියේය. බොහෝ ධනවත් අය ඇමෙරිකාවේ ක්‍රියාත්මක වෙමින් පැවති අභ්‍යවකාශයට පැන යාමේ මෙහෙයුම් වලට මුදල් බැඳීමට යොමු වූහ. එම මුදල් ප්‍රමාණයන් ඩොලර් බිලියන ගණනින් වූයෙන් ලංකාවෙන් එම අවස්ථාවෙන් ප්‍රයෝජන ගැනීමට යා හැකි වූවෙකු ලෙස වාර්තා වී සිටියේ රජ පවුලේ අයෙකු පමණි. කෙලෙස හෝ පෘථිවි වාසී පවුල් හතරක් මෙම අභ්‍යවකාශය කරා පැන යාමේ දුලබ අවස්ථාව උදා කර ගෙන තිබුනි. ඔවුන් පෘථිවිය හැර යන්නට ගත්තේ මීට හරියටම මාස හතකට පෙරය. ඔවුන් නැවත පෘථිවිය කරා පැමිණීමට නියමිත වන්නේ මෙම විනාෂයෙන් අවුරැදු පහකට පසුය. කෙසේ වෙතත් පවුල් හතරකට අවුරැදු පහකට ජීවත් වන්නට තරම් ආහාර පාන සහ අනෙකුත් පහසුකම් අධිතාක්ෂණික උපක්‍රම යනාදිය තිබුන ද පෘථිවියේ යළි පැමිණ ජීවත් වන්නට කිසිදු ලෙසකින් ඔවුනට අවකාෂයක් නොවන වග විද්‍යාඥයන් තිර ලෙසම ප්‍රකාශ කළ ද ඔව්හු මෙම ව්‍යසන‍ය හැබැහින් දැක හැකි තරම් කාලයක් ජිවත්ව මිය යන්නට තිර ලෙස අදිටන් කරගත්තෝය. බිල් ගේට් ද ඔවුනතර විය. සැබැවින්ම මෙම ඇස්ටරොයිඩ ගැටුමෙන් පසු අවුරුදු විසිපන්දහසක් යන තුරැ පෘථිවි පෘෂ්ඨයේ හිරු ආලෝකය ‍පතිත නොවන බවත් අධික විකිරණයන් හේතුවෙන් කිසිදු ජීවියෙකුගේ පැවැත්ම වලංගු නොවන වගත් විද්‍යාඥයන් හෙලිදරව් කර ඇත. මෙම සියලු සිදුවීම් මධ්‍යයේ සුපුරුදු ලෙස ‍සිය ගුවන් විදුලි විකාශ පවත්වන පෞද්ගලික එෆ් එම් නාලිකා තම සේවාදායකයන්ගේ ලෝකාවසාන පණිවිඩ නිකුත් කරමින් සිටින්නට විය.

"ලෝකාවසානය තෙක් අප හා විශ්වාසයෙන් ගනුදෙනු කළ ගනුදෙනුකාර භවතුන් ට අපි තිර ලෙසම ඊළඟ අත්භවයේද මෙම මහ පොලොව මතම ඉපදී මෙම ව්‍යාපාර ඒ ආකාරයෙන්ම පවත්වා ඔබ සියළු දෙනා සමග නැවතත් එක්වන්නේ යැයි ද එතෙක් අප හා ආ ගමනට මෙසේ තුති මල් කුසුම් පුදන බව සීමාසහිත නවලෝක සමූහ ව්‍යාපාරය ප්‍රාර්ථනා කර සිටියි."

පම් පම් පම් පම් පම්
පම්ප පරරි රම්පම් පම්- පම්ප පරරි රම්පම් පම්
පම්ප පරරි රම්පම් පම්- පම්ප පරරි රම්පම් පම්
පම් පම් පම් පම් පම්...
‍
"ලෝකයේ අවසානයට ලං ව ඇති මේ මොහොතේ ඔබගේ දෙපා අනාදීමත් කාලයක් තිස්සේ සුරැකි ඩී එස් අයි සමූහ ව්‍යාපාරය මෙලෙස අප සියල්ලන් උපදින මතු අත් භවයක ද මේ ආකාරයටම දෙපා ලබා අපගේ විශ්වාසනීය පාවහන් මිළ දී ගෙන සමුර්ධිමත් නව ලොවක් තනන්නට අප හා එක්වන්නට වරම් ලැබේවා කියා මේ ප්‍රාර්ථනා ගෙනෙන්නේ ඩී එස් අයි සමූහ ව්‍යාපාරය!"

අවකාෂයේ
නිමක් නැති වූ
අඳුරෙන්
ආ වූ හිරැ කිරණයෙන්

නැගී...

පාවී ...

පම් පම් පම් පම් පම්
පම්ප පරරි රම්පම් පම් පම්ප පරරි රම්පම් පම්
පම්ප පරරි රම්පම් පම් පම්ප පරරි රම්පම් පම්
පම් පම් පම් පම් පම්...
පම් පම් පම් පම් පම්...

"මේ ලොව අවසාන හෝරා කීපයේ දී අප මේ සූදානම් වන්නේ අපගේ මකරා ලකුණ දරණ ඇස්බැස්ටස් ෂීට් පාවිච්චි කර හිසට සෙවණක් තනා ගනිමින් අපගේ ව්‍යාපාර කෙරෙහි ඉමහත් විශ්වාසයක් තැබූ ගනුදෙනුකාර භවතුන්ට ලබන්නා වූ මේ ලෝක විනාශයෙන් මතු උපත ලබන ලෝකයේදීත් අප හා එක්ව මේ ආකාරයෙන්ම ගනුදෙනු කරන්නට වරම් ලැබේවා කියා පැතුම් ගෙන එන්නටය. පැතුම් ගෙන එන්නේ මකරා ඇස්බෙස්ටොස්! ලෝකය විනාශ වුවත් මකරා ඇස්බැස්ටොස් ඉතිරි වේ!! "

කාලාත්‍රයේ...

කාලාත්‍රයේ...
පසු යාමයේ
රස පොලොවේ
ඇස ගැටී රත්හැල් රස වැටී
රත්හැල්ලේ රසවැටී
කය නැති හිත ගල් වී

ඕ ඕ ඕ ඕ...ඕ ඕ ඕ ඕ...
ඕ ඕ ඕ ඕ...ඕ ඕ ඕ ඕ...
ඕ ඕ ඕ ඕ...ඕ ඕ ඕ ඕ...
ඕ ඕ ඕ ඕ...ඕ ඕ ඕ ඕ...

"සූරූපී ලළනාවනි, ළඳුනි , වනිතාවනි මේ... ලොව විනාශ වන්නට පෙර ඔබ අත්විඳින අවසන් නිමේෂයයි. ඔබගේ පෙම්වතා ස්වාමියා අවසන් වරට ඔබ දකින්නේ මේ හෝරා කීපයේ දීයි. එම අවසන් හෝරා කීපය ඔබේ පෙම්වතාගේ ස්වාමියාගේ දෙනෙතට රසඳුනක් වන්නට මෙන්න වික්ටෝරියා සීක්රට් ලාංජරි දැන් ‍ඔබට ඉතාම පහසු මිලට! දෙකක් මිලදී ගත් විට නොමිලේ තුනක් ලබා ගැනීමට හැකි ස්ථාන... මාතලේ ෆැන්සි හවුස් -බුත්තල සාරි මන්දිර්- අගුණකොලපැලැස්සේ තමරා එන්ටර්ප්‍රයිසස්- දික්වැල්ලේ පමු‍ණුව ස්ටෝර්ස්- හාලි ඇල නිව් චින්තා ට්‍රේඩර්ස්....පිටකොටුවේ මනමෝදීනි විලාස් යනාදී දිවයින පුරා ශාඛා විසි හතකින් ... වික්ටෝරියා සීක්රට් සමගින් සුන්දර ලෝකාවසානයක්!"

පම් පම් පම්
ස්වයංජාත රත් හැල් නෑ රස පොලොවේ
ස්වයංජාත රත් හැල් නෑ රස පොලොවේ
ස්වයංජාත රත් හැල් නෑ රස පොලොවේ
ස්වයංජාත රත් හැල් නෑ රස පොලොවේ
පම් පම් පම් පම් පම්

ගුවන් විදුලි යන්‍ත්‍රයේ නිමක් නැති ලෝකාවසාන පණිවිඩ ප්‍රචාරයන්ට නොදෙවෙනිව රූපවාහිනී සේවා ද ලෝකාවසාන මොහොත ගැන විද්වත් සාකච්ඡා සහ විනෝද වැඩසටහන් මෙහෙය වන්නට උනන්දු වී ඇත්තේ සමස්ථ ජනප්‍රජාවගේ අවසන් හුස්ම පවා සැහැල්ලුවෙන් හෙලන්නට හැකි වන පරිදිය.

එක්තරා රූපවාහිනි චැනලයක් හදිසියේම ප්‍රචාරය කරන්නට ගත්තේ ලංකාවේ සිටින ධනවතුන් විසින් දුප්පතුන් කෙරෙහි ලෝකාවසානයේ දක්වන්නට යෙදුනු සිය අනුකම්පා සහගත සද්කාර්යයක් ගැනය. එනම් එම රූපවාහිනි වැඩසටහනට ඉදිරිපත් වන අයගෙන් අසන ප්‍රශ්න වලට පිළිතුරු දීමෙන් ජයග්‍රහණය කරන්නන්ට ඔවුන් ඉල්ලන ඕනෑම දෙයක් ලබා දෙන්නට මෙම ධනකුවේරයන් සූදානම් වී ඇති බවයි. එම වැඩසටහනට ඉදිරිපත්ව ජයග්‍රහණය කළ ඉඳුරුව ප්‍රසන්න ජයලත් නම් වූ විසි හතර හැවිරිදි තරුණයාගේ ඉල්ලීම වූයේ සිය පවුල සමග බකිංහැම් මාලිගාව බලන්නට යන්නට අවස්ථාව ලබා දෙන ලෙසය. වහාම ක්‍රියාත්මක වූ ධනකුවේරයෝ ඔවුනට පළමු පංතියේ බ්‍රිතාන්‍ය ගුවන්සේවා ටිකට් පත් ලබා දී ලෝකාවසානයට පෙර තිබූ අවසන් ගුවන් ගමනට එකතු කර එම සිහිනය සැබෑ කරගන්නට ඉඩ ඇරියහ . එම තරුණයා ඇතුළු පවුලේ සැම ඇඳිවතින්ම බ්‍රිතාන්‍ය බලා පිටත් වූයේ පවුලේ සියල්ලන්ම අන්දුන් කුන්දුන් තත්වයේ සිටියදී මය.

තවත් අයෙකු එම වැඩසටහනින් ජයග්‍රහණය කොට ඉල්ලා සිටියේ ජැක් ඩැනියෙල් ලීටර හතරේ බෝතලයකි. ඉතාම අපහසුවෙන් සිංගප්පූරුවෙන් වහාම ඩීඑච්එල් කර ගෙන්වා ගත් එම බෝතලය දැකුමෙන් කොස්වත්තේ සේනාරත්න සිහි විසංඥ නොවූවා පමණි. සත්‍ය වශයෙන්ම හැලි අරක්කු පෙරීමෙන් හෙම්බත්ව සිටි හෙතෙම ඉතිරි පැය දහය සිහි විසංඥ වනතුරු බොන්නේ යැයි කියා රූපවාහිනි විකාශ මධ්‍යස්ථානයෙන් පිටව සිය මිතුරන් සමග මග දිගට මධුපානය කරමින් කොස්වත්තට සේන්දු විය.

තවත් ජයග්‍රාහිකාවක් සිය ඉල්ලීම ලෙස ඉදිරිපත් කලේ රංජන් රාමනායක මහතා සමග ලෝකාවසාන සැන්දෑව ගත කරන්නට අවශ්‍ය බවය. එම ඉල්ලීම ඉටු කිරීමට කෙසේ හෝ උත්සාහ කළ යුතු වූයෙන් රංජන් රාමනායක සම්බන්ධ කරගැනීමට යෙදූ සියළු උපක්‍රමයන් අසාර්ථක වූ බැවින් සියළුම ධනකුවේරයන් ලජ්ජාවට පත්වී ඇගෙන් වෙනත් ඕනෑම වරමක් ඉල්ලන ලෙස බැගෑපත් වීමෙන් ගැටළුව සිවු ගුණයකින් වර්ධනය විය. මෙවර ඇය ඉල්ලා සිටියේ ශිහාන් මිහිරංග සමග සැන්දෑව ගත කිරීමට අවශ්‍ය බවයි. මෙයින් ද කැළඹුනු ධනකුවේරයෝ කරකියා ගත හැකි කිසිවක් නොවූයෙන් වැඩසටහන අතරමග නතර කර දමා දුප්පතුන් බයිට් කිරීමේ ලෝකාවසාන සංදර්ශනය ද නිමාවට පත් කළහ.

එම සුප්‍රසිද්ධ නාලිකාව සිය වැඩසටහන අතර මග නතර කර දැමුවද අනිකුත් තරගකාරී නාලිකා සිය වැඩසටහන් අඛණ්ඩව පවත්වන්නට යෙදුනෙන් සිය ඡායාරූපය මුද්‍රණය වූ රුපියල් දහසේ නෝට්ටු ද පාර්ලිමේන්තුවේ සෙංකෝලය හැරමිටියක් ලෙස ඇණ ඇණ යන්නට සිතැඟි වූ පරණ සමසමාජකාරයෙකු ද සිය සිහිනය සැබෑ කරගත්තේය. තවත් පශ්චාත් නූතනවාදියෙකුගේ ඉල්ලීමක් වූයේ සිය ජීවිතයේ අවසන් ඉල්ලීම ලෙස රාජාසනයේ වසුරැ හෙලන්නට ඇවසි බවයි. එම ඉල්ලීම ඉටු කරන්නට ඔහු සමග පිටත් වූ රූපවාහිනි කණ්ඩායම ලෝකාවසානයට පෙරම මරු දුටු බව එම රූපවාහිනියේම අවසන් පුවත් නිවේදනයේදී විකාශ විය.

බොහෝ අය පිරිත් සජ්ජායනා -සාමුහික බයිබල් සහ කුරාණ කියවීම් සහ ආගමික වතාවත්වල යෙදී සිටිය ද ගෝල්ෆේස් පිටිය පුරාම දක්නට ලැබුනේ විවිධ ලෝකාවසාන සංදර්ශනයන්ය. සන්ෆ්ලවර්ස්ලා ඉදිරිපත් කළ යුගන්ධර රාත්‍රිය සියල්ලන්ගේ චිත්තාකර්ෂනයට ලක්විය. සෑම ගීතයක් අවසානයේම අති විශාල අහස් වෙඩි දැවීමෙන් ලෝකාවසානයට අරුතක් එකතු කරන්නට ඔවුන් බොහෝ මුදල් වියදම් කර තිබුනි. සමහරුන් සාගරයේ නොගැඹුරු පෙදෙස්වල කුඩා බෝට්ටුවල නැගී සිටියේ එමගින් ලෝකය ගිනි ගෙන දැවෙන අවස්ථාවේ දී මුහුදට පැන එම ගිනි නිවා ගන්නට හැකිය යන විශ්වාසයෙනි. තවත් සමහරු විශාල බෝක්කු තුල ගුලි වී සිටියේ එමගින් තම දිවි රැකෙතැයි විශ්වාස ‍කළ හෙයිනි. සමහරක් වයෝවෘද අය මේ කිසිවක් ගණනකට නොගෙන එදිනෙදා කටයුතු වල යෙදී සිටියහ. ගෝල්ෆේස් පිටියේ තැන් තැන්වල තරුණ තරුණියෝ සිය සිතැඟි ලෙස අවසන් කාලය ගෙවමින් සිටියහ. ඔවුන් සමහරු බලාගත් අත බලාගෙන සිටි අතර සමහර ජෝඩු උමතුවෙන් මෙන් ඔවුනොවුන් සිප වැළඳ ලෛංගික අභිචාරයන්හි යෙදී සිටියහ. කිසිවෙකුත් කිසිවෙකු කෙරෙහි ද්වේශයක් වෛරයක් ඉරිසියාවක් නොවුනෙන් ඉමහත් සැනසිල්ලකින් ඔවුන් සියල්ලෝ සිය ජීවිත වල මෙතෙක් රැඳි ව්‍යාජ සළුපිලි උණා දමා අන්‍යොන්‍ය ප්‍රේමයෙන් වෙළී සිටියහ.‍

ගෝල්ෆේස් වෙරළ තීරයේ එක කෙලවරක අති දැවැන්ත එල්සීඩී තිරයක වි‍ශාල ඉලක්කම් වලින් ඉතිරිව ඇති කාලය තත්පර ගණන් වලින් දිස් වෙමින් තිබුනි. ඉඳහිට එම තිරයේ සටහන් වූයේ මෙම දැවැන්ත තිරය එම්ටීවී මාධ්‍ය ජාලයේ අනුග්‍රහයෙන් සුවහසක් ලෝකාවසාන සංදර්ශන හිතකාමීන්ගේ පහසුව පිණිස තබා ඇති බවයි.

එදා රාත්‍රී අහසක් නොවීය. හරියටම ගණනය කර තිබූ වේලාවටම අහසේ සඳු පෙනුන මානයේ එතරම්ම විශාල ලෙස කහ පැහැති බෝලය දිස් වන්නට විය. ඒ සමගම මුළු අහසම රක්ත වර්ණ විය. ගිනි දළු දසත පැතිරෙන්නට විය.

තව අරක්කු බෝතලයක් මිළ දී ගන්නට සල්ලි සොයා බැංකුවක් කඩමින් හුන් ජිනදාසගේ ගෝනියේ වූ සල්ලි කොල ඔහුට පෙර අළු විය.

[විශේෂ ස්තුතිය උපුටා ගත් වර්ණ ගීතය වෙනුවෙන් නදීක ගුරුගේට නදීක ගුරුගේ/ඉන්ද්‍රචාප ලියනගේ/කසුන් කල්හාර යන අයවලුන්ට The Romantic Opera සීඩී තැටියට]

මහා ජල පාතනය

2009-09-02T20:32:00.000-07:00

ඒ නොපෙනෙන සියල්ල විශ්වාස කරන්නා වූ ද පෙනෙන්නට තිබෙන සෑම දෙයක්ම අවිශ්වාස කරන්නා ද වූ මිනිසාගේ යුගයයි.
භාෂාවේ තර්ක ශාස්ත්‍රය ඉපදෙමින් සිටි සමයයි‍.

කාලය මැනීම පිළිබඳ අදහසක් කිසිම ප්‍රාණියෙකුට නොමැති වූයෙන් දරැවන් ද දෙමව්පියන් ද එකිනෙකා මතක නොතබාම ජීවත් විය. පරම්පරා අතර වෙනසක් ගැන ද කිසිවෙකුට කිසිම අවබෝධයක් නොවුනෙන් ‍පියවරැන් සමග දියණියෝද සහෝදරියන් සමග ස‍හෝදරයෝ ද පුතනුවන් සමග මව්වරැ ද අහඹු ලෙස උදා වූ සීතල රාත්‍රීන් හි අඳුරැ වන පෙත්වල අත්හැර දමා ඇති ගල්ගුහා වල සහ කිසිවෙකුත් විසින් නොලැග හුන් ගස් බෙනවල ද එකිනෙකාගේ උණුසුමේ දි සංවාස ගත වූහ‍. ඔවුනොවුන්ගේ ජනකාණුවල පැවැති ජීව රසායනික ගති ගුණ හේතුන් කරණ කොට ගෙන සුදුසු පරම්පරා පවතින්නට ත් නුසුදුසු විකෘති පරම්පරා සූන්නද්ධුලි වන්නට ද වූයේ චාල්ස් ඩාවින් ඉපදෙන්නටත් අවුරැදු මිලියන ගාණකට පෙරය. වැඩකට නැති එවුන් වඳ වී ගොස් වැඩකට උචිත එවුවන් පවතින්නට ද එය පසුකාලීනව නියමයක් වන්නට ද පටන් ගත්තේය. මිනිසුන් එකිනෙකා කිසිවෙකුගේ මුහුණක් මතක තියා ගන්නට උනන්දු නොවුනෙන් කිසිවෙකුත් කිසිවෙකුට ප්‍රේම නොකරන්නට වූයෙන් දරැවන්ට පියවරැන් මේ යැයි අදහසක් හෝ දරැවන්ට මව්වරැන් මේ යැයි අදහසක් නොවීය. ආහාරයට ගත යුතු‍දේ ගැන හෝ නොගත යුතු දේ ගැන ඔවුනට කිසිදු අවබෝධයක් නොවුනෙන් සමහරැන් පස් ගල් වැලි දැව සහ අසූචි ද අනුභව කලෙන් විවිධ අසාත්මිකතාවන්ට ගොදුරැව මි‍යැදුනේය. ඒ මළකඳන් එම ආහාර පාන පරිභෝජනය කළ තැන්වලම රැඳුනු අතර ඒවා කාබනික ප්‍රතික්‍රියා වලට ගොදුරැ වන්නට විය. ඒ අතර වන ළඳුවල තැනිතලාවල ගල් තලා මත මිනිසුන් හුදකලාවේ මියැදෙන්නටත් මියැදෙන මිනිසුන් ගේ කුණු වූ සිරැරැවලින් ගලා ගිය ඕජාවලින් සහ වායූන්ගෙන් පරිසරයම දුර්ගන්ධයෙන් වැසී යන්නටත් වූයෙන් සමහර මිනිසුන් අලුත් බිම් සොයා ඉබා‍ගාතේ සැරිසරන්නටත් ජලය ආශ්‍රිත ගං දෑලවල නැවතී ගිමන් හරින්නටත් වූයෙන් කුඩා මිනිස් කණ්ඩායම් සහිත ජනපද බිහි වන්නට විය. ඒ එක ජනපදයක ගැහැණියකගේ මුහුණුවර මතක තියා ගත් එක් මිනිසෙක් නැවත නැවත එම ගැහැණිය ම සංවාසයට ගන්නට වූයෙන් වෙනකෙකු හා එම ගැහැණිය සංවාස ගත වීම දකිනු නොරිසි වූ ඔහු ඇය රඳවනු වෙනුවෙන් සාමුහිකව වැටී හුන් ජනපද ගල් ගුහාවෙන් වෙන්ව සිය දෑත් භාවිතා කොට තනා ගත් නිවෙසක් ගස් දෙබලක නිර්මාණය කරගැනීමත් සමගම මිනිස් සංහතිය තර්ක ශාස්ත්‍රය අර්ථ ශාස්ත්‍රය සමගම ජ්‍යාමිතිය මෙලොවට ගෙන එන ලද්දේය. එයින් නොනැවතුනු ඔව්හු පොල්කට්ටක දිය පුරවා එම ජලය එහි රැඳී ඇති ආකාරය ගැන පරීක්ෂා කර මහ මුහුදේ ජ්‍යාමිතිය සසඳා තමන් ජීවත් වන මෙම පොලෝ තලය පොල්කට්ට්ක් මෙන් ගැඹුරක් ඇති පැතැලි බේසමක් යැයි තීරණය කලෙන් වෙන කවරදාකටත් වඩා සැහැල්ලුවෙන් ඔවුහි නින්දට වන්හ.

එක වගේ මුහුණු තිබූ සියළු මිනිසුන් විවිධ මුහුණු ඇති අය බවට ඉන් පසුව වෙනස් වන්නට පටන් ගත්තෙන් ද මතක තියා ගැනීම ආශ්වාදනීය චමත්කාරයක් බවට ඔවුනොවුන් පසක් කර ගනිමින් ද අනිත් අතින් ඔවුනොවුන්ගේ මුහුණුවල තිබූ විකෘතිතා නිසා එකිනෙක නොරැස්සන්නට ද තමන්ගේ යැයි පෞද්ගලික සීමාවක් පළමුවෙන් තම සිරැරෙන්ද දෙවනුව තම සිරැරට මදක් ඔබ්බට ද බල පවත්වන්නට ඔවුන් උත්සාහ ගත්තෙන් මිනිසුන් තමන්ට මරණය යැයි අදෘශ්‍යමාන දෙයක් පවතින බවත් එය කල් දමා ගැනීම යනු ජීවත් වීම බවත් තේරැම් ගත්තේය. වයසට යෑම යනුවෙන් දෙයක් එකිනෙකා ගේ රමණ උද්දාමයන් ක්ෂය වීමත් සමග ඔවුන් ක්‍රමයෙන් හඳුනා ගනී. රමණ උද්දාමයන්ගේ වෙනසට හේතුව අ‍හසේ විටින් විට පායා එන අතපානු දුරක නොවු ආලෝකමත් වස්තුව හේතුවෙනැයි ද එම වස්තුව නිසා කාලය උපදින බව ද ඒ කාලයේදීම මිනිසුන්ගේ ඔලුවෙන් එලියට බට දෙවිවරැ ගස් බඩ ගා රැක් දේවතාවන් බවට පත්වී මුහුණු වෙනස් වූ මිනිසුන් ගෙන් ගරැ බුහුමන් ලබන්නට ද පටන් ගත්තෙන් දෙවිවරැ යැයි සෝබනීය මුහුණු ඇති පිරිසක් ගස් උඩට වී පහල සිටින මිනිසුන් දෙස නිරන්ත‍‍රයෙන් බලා සිටින බවත් නොබෝ කලකින්ම සියලු මිනිසුන් විසින් තර්කාණුකූලව තේරැම් ගත්තේය. කාලය බොහෝ ඉක්මනින් ගෙවී යාමත් සමග ඔවනොවුන් හඳුනා ගැනීමට නම් භාවිතයට ඒමෙන් සියළු දේ සඳහා නිර්ලෝභී ලෙස නාම පද ලැබෙන්නට වූයෙන් ජ්‍යාමිතියේ පිහිටෙන් පොළව බෙදා ගැනීමේ අවශ්‍යතාවය ඇති විය. පොලවේ ඇසට අසුවන මායිමේ සියල්ලටම නම් සහ ගම් දෙන්නට සියල්ලෝ නොපසුබට වූහ. ගංගාවක් දෙගොඩතලා යද්දී සිය ගම් බිම් පමණක් නොව වගා කටයුතු කළ බිම් කට්ටි ද එතුවක් කල් සංවාසයට වෙන් කරගත් ගැහැණු ද නැවතත් තමන් සතු කර ගැනීමටත් වගා කළ ඉඩම් පොළව මත නැවත සළකුණු කරගැනීමට ඔවුන් කල්පනා කළ හෙයින් සිය සිරැරැවල තරමට ගැලපෙන ඇඳුම් ද ඉඩම් ද සකස් කරගත්තේය. හදිසියේ වනයෙන් එලියට ආ මොහොතක හිරැ අහසේ මුදුනේ දීප්තිය දෙමින් බබලන බව දර්ශනය වූවෙන් එදෙස නොබලන්නටත් බලනවා වෙනුවට ඊට හිස නමා සිටීමටත් ඔවුන් පුරැදු වූයෙන් ගස්වල ඉන්නා දෙවියන්ගේ ලොක්කා අහසේ ඉන්නා හිරැ බවත් හඳුනා ගන්නට අප්‍රමාද විය. සියල්ලට අධිපති හිරැ හෙයින් සැන්දෑවේ ඔහු විවේක ගන්නේ යම් සේද මේ මිනිසුන් ඔහුව අනුකරණයට නිර්ලෝභී වී නිදා ගැනීම සඳහා රාත්‍රිය වෙන් කරගත්තෙන් වඩාත් සැපසේ නිදිසුව විඳින්නටත් එම නිද්‍රාගත අවස්ථාවේ මැජික් දකින්නටත් ඔවුන් ප්‍රිය වූහ. මේ මැජික් වලට සිහින යැයි ඔවුන් නාමකරණය කලේ මිනිසා දුටු ප්‍රථම හීනයෙන් අවුරැදු ලක්ෂ ගාණකට පසුවය.

කාලයාගේ ඇවෑමෙන් ගේට්ටු තනන්නෙකු ජනේල සාදා එකිනෙකාගේ වත්කම් සමග හුවමාරැ කරගත්තෙන් ජනේල මිනිස් අවශ්‍යතාවක් බවටත් සියල්ලන් ශ්‍රමයෙන් උපයා ගත් සියළු දේ එම ගේට්ටුතනන්නා වෙතට එක් රැස් වීමටත් පටන් ගත්තෙන් ගේට්ටුතනන්නා ජනෙල් හිමියන් අස්වසනු වස් කාලය ගත වීමෙන් ශරීර වයසට යෑම මිථ්‍යාවක් බවත් සදාකාලික යෞවනෝදයේ රහස සිරැර පාවිච්චියෙන් තොරව පවත්වා ගැනීම බවත් කල්පනා කිරීමේ දි කායික ශ්‍රමය වගුරනවාට වඩා සිය දහස් ගුණයකින් ශරීරය පීඩාවට පත්වන බවත් පෙන්වා දීමෙන් පසු තමන් විසින් නිපදවන ලද ජනේල දිහා මුළු කාලයම යොදවා කල්පනා රහිතව බලා සිටීමෙන් සදාකාලික ජීවනයේ රහස තමන්ට අත් දකින්නට ලැබෙන බව කීමෙන් පසු එතුවක් ලෝකය පැතලි වස්තුවකැයි සිතා සිටි‍ මිනිසුන් මේ තමන් ජීවත් වන වස්තුව මතුපිට ගෝලාකාර බවත් මේ ගෝලාකාර බව හේතුවෙන් ලෝකය පුරාම තඹ කම්බි අතුරා මකුළු දැලක් නිර්මාණය කළ හැකි බවත් ඔප්පු කරගත් අතර ගේට්ටුතනන්නා ඉන්පසු මේ මකුළු දැල වියා සිය අධිරාජ්‍යය ස්ථාපිත කරගත්තේය. බහුතරයක් මිනිසුන් ඔහුට අනුව හුදකලාව අලස සුව විඳිමින් කල්පනා රහිතව කාලය ගත කිරීම තෝරා ගත්තේය.

ලෝකය ගෝලාකාර බව ව්‍යවස්ථාගත වූයෙන් කැළඹුනෝ සෑම ගංගාවක් අසලම ගොඩනැගුනු ජනපදවල සිටියෙන් ඔවුන් ඒ මොහොතේ සිට ඉමහත් භීෂණයක් ලොව පුරා පතුරන්නට කුරැල්ලන් අතේ සංදේශ ලියා යැවූහ. එම සංදේශයේ මෙලෙස ලියැවී තිබුනි.

ලෝකය මෙතුවක් කල් සමතලා වූ‍ හෙයින් ද එය මිනිස් වාසයට ආරක්ෂා සහිත ස්ථානයක් ව පැවතුනේය. එනමුත් අප කෙරෙන් දුරස්ථ වාසයේ ඉන්නා ගේට්ටුකාරයා විසින් ලෝකය ගෝලයක් බවට පත්කරන ලද්දෙන් මෙතුවක් ලෝ කුහරයේ රැඳී තිබූ මේ මහා සාගර ජලය කිසියම් මොහොතක මෙම ගෝලයෙන් ගලා ඉවතට යන බවත් එම අවස්ථාවට සූදානම් වන්නට නෝවා නම් පුදගලයෙක් සාදා ඇති නැවට සියල්ලන් එකතු විය යුතු බවත්ය.

මෙම මහා ජල පාතනයට හසුවන්නන් අභ්‍යවකාෂයේ ඈත අඳුරැ කෙළවර සදාකාලිකව සිරගත වන බවත් ඔවුනට යළිත් තම නෑ මිතුරන් දකින්නට වන්නේ මේ මහ පොලොව යථා පරිද්දෙන් පැතැලි වූ දිනයක බවත් වැඩිදුරටත් ‍එම සංදේශයේ කියැවුනි.

මෙය කියවීමෙන් සියල්ලන් භීතියට පත්විය. ඔවුහු කඳුමුදුන් සොයා සංක්‍රමණය වන්නට විය. ඔවුන් එතුවක් පාවිච්චි කරමින් හුන් ජනේල තැන තැන අතැර දමා වැටී තිබෙනු දක්නට හැකි විය. මින් ගේට්ටුකාර‍යාගේ ආදායම මන්දනය වීමෙන් ඔහු කුපිත වන්නට ගත්තේය. ඔහු සිය දියණියන් හට ගුගුලේය. දියණියන් වහා නෞකාවල නැගී සිවු දෙසට මුහුදු රකුසන් කෙරෙහි ගොදුරැවනු වස් සාගරගත විය.
මෙම ජල ගැල්මෙන් ගැලවීමට නෝවා ගේ සමතල ලෝක නැවට යනවාට වඩා ගෝලාකාර ජනේල ලෝකයේ හුස්ම හිරවී මැරීයාම ශ්‍රේෂ්ඨ බව කණ්ඩායමක් ස්ථිරව තීරණය කලෙන් ඔව්හු ජල ගැල්මට ඔරොත්තු දෙන බංකර විශේෂයක් අත් හැර දමන ලද ජනේල එකතු කර තනාගත්තෙන් නෝවාගේ නැවේ සාක්කිකරැවන්ට අතිශය ලජ්ජාවට පත් කරමිනි.

නෝවගේ සාක්ෂිකරැවෝ වහ වහා ළඟ එන ‍මේ ලෝක මහා ජල පාතනය ඔප්පු කරන්නට පර්යේෂණයක් සංවිධානය කළහ. ලෝක ගෝලයේ අනුරැවක් තනා එයට ජල බාල්දියක් වක්කිරීමෙන් සියළු ගංගා සහ කඳුමුදුන් දිය වී යන අයුරත් එනමුත් නෝවාගේ නැව එම ජල කඳමත පාවෙමින් ආරක්ෂා වන අයුරැත් පෙන්වා දීමෙන් අනතුරැව නිවුටන් හැර අන් සියල්ලෝම නිවුටන් අතැර නෝවාගේ සාක්කිකරැවන් අතරට එකතු විය. එම පර්යේෂණයේ සාක්කිකරැවන් ඔල්වරසන් දුන්නේය. ඔවුනට ලොව වටා රවුමක් යාමට ද මෙම ජලපාතනයත් සමග නොමිලේ අවස්ථාව උදාවන බව කීමෙන් සියල්ලෝ තම තමන් රැචි ආහාර ද්‍රව්‍ය තම්බා වියලා බෝතල් කරගත්තේ මෙම අපුරැ ලෝක සවාරියේදි හපා හපා යන්නටය. ඔව්හු සිතා සිටියේ තමන් වගා කරමින් හුන් ගංගා ද්‍රෝණි යනු මේ ලෝකයේ එකම වාටිය ලෙසය. දැන් වාටි අතුරැදහන්ව ඇති හෙයින් සියළු සාගර ජලය ඉවත් වීමෙන් යම් දිනෙක ඔවුනට ජීවිත කාලයටම කන්න අවශ්‍ය ආහාර භවබෝග එකවර වගා කර නිස්කලංකයේ ඉන්නට හැකි වනු ඇති බව නෝවාගේ නැවේ දිනපතා සූදානම් කර තිබූ සංදර්ශණයේදී වාමනයකු ලෙස වෙස්වලාගත් නරයකු රඟ දැක්වීය.

ඉන්පසු හුදකලා නිවුටන් අතිශය දුෂ්කර කාලයක් ගත කර සාගරවල මුහුදු ජල මට්ටම් මැන බලා එම මුහුදු මට්ටම ක්‍රමයෙන් ඉහල යන වග දැනුනෙන් ව්‍යසනය අත ළඟබව වටහා ගත්ත ද නෝ‍වා ගේ නැවට නැගීම ප්‍රතික්ෂේප කළේය.

බංකර පිහිටා ඇති සමහර තැන් හඳුනා ගත හැකි කෘතිම බුද්‍ධියෙන් යුත් චන්ද්‍රිකාවක් හදිසියේම කඩා වැටුනේ මේ ආකාරයට තමන්ගේ ඉඩම් කට්ටි නැවත සොයා ගනිමින් බිම් මිනුමෙහි යෙදී හුන් ගංගාවාසී කණ්ඩායමක් සිය උපකරණ අටවං හුන් තැනිතලා පෙදෙසකටයි.

ඔවුන් ගේ කණ්ඩායම පස්දෙනෙකුගෙන් සමන් විත වූයෙන් ඔවුනට ආහාර ජලය සහ බෙහෙත් ලෙස ගත හැකි ද්‍රව්‍ය සීමිත ප්‍රමාණයක් වූයෙන් මෙම කඩා වැටුනු යන්ත්‍රය කෙරෙහි ඔවුනගේ අවධානය අවම විය. ඔවුනට යම්තම් ප්‍රමාණවත් වූ ආහාර තවත් කෙනෙකුට බෙදා ගැනීම උදෙසා ප්‍රථමයෙන් විරැද්ධ වූයේ නිවුටන් ය.

චන්ද්‍රිකාවේ අභ්‍යන්තරයේ වූ යන්ත්‍රය සිය සූර්යබලයෙන් ක්‍රියාත්මක වන අඩු පඩු විහිදා මරණාසන්න මිනිසෙක් මෙන් හොෂ් හොෂ් ගා හඩතලමින් ඒමේ අත වැනෙන්නට විය. නිවුටන් ඔවුන්ගේ ආහාර ගබඩා කර තබන ලද පොට්ටනි දෑතින් හැරෑ වලවල් තුලට ක්ෂණිකව ඔබා එමත වැලි අසුරන්නට විය. මැටි පුවරැවක සටහන් වු පිඹුරක් බලමින් හුන් ඇනසිගෝරස් ගෞතමදාස තවත් සගයෙකු වූ පෛතගෝරියානු නිමලසේන ට අතින් සංඥා කලේ සිටවා තිබූ ලී පොලු අතරින් ඇස් තබා එල්ලය ගෙන තවත් එබඳුම ඉන්නක් සිටවනු පිණිස ය.

ලෝක සාගර ජල පාතනය පිළිබඳ පර්යේෂණ කරමින් ලෝ වටා සංචාරය කළ මහාචාර්යවරයෙකු කුඩා දේ ලොකු කර බලන කණ්ණාඩියක් රැගෙන වෙරළ දිගේ ඇවිද ගිය අතර පොලවේ සිටවූ ඉන්නක් දුටුයෙන් ඒ නයිල් වාසීන් ගේ වටිනා බිම් මිනුම් උපකරණයක් බව සිය සටහන් පොතේ සටහන් කර ගත්තේය.

පොළව මත හිට වූ ඉන්න රැගෙන ගිය හෙතෙම එය කෞතුකාගාරයේ තැන්පත් කළ අතර සිය කලබලය නිසා තැනිතලාවේ දමා ආ කාචය සොයාගත් මිනුම්දොරැවන් එය සවිකර ආකාෂවස්තු නිරීක්ෂණය කළ හැකි යන්ත්‍රයක් නිපදවා ගත්තෙන් තමා ව‍ටකර ඇති ලෝකය අති විශාල බවත් බිම් මැනීම නිරර්ථක ක්‍රියාවක් බවත් පසක් කර ගත්තේය.

මිනින්දොරැවන් ගේට්ටුතනන්නා ට අභියෝග කරමින් පොලවේ මහ හිලක් සාදා සියළු සාගර ජලය එතුලට දමා ආරක්ෂා කරගැනීමේ වැඩපිලිවෙලක් රහසිගතව ක්‍රියාත්මක කළ බැවින් හදිසියේ පොලව කැණීම් මධ්‍යයේ කළු දිය දහරක් මතුවීමෙන් සියල්ලන් පොලව කැනීම නවතා දමා එම කළු දිය දහර අධ්‍යයනය කරන්නට ගත්තේය.

වැඩිහිටියකු කීවේ එම කළු දිය දහර දෙවියන්ගේ අසූචි බවත් එය ශුද්ධ දෙයක් ලෙසත් කවදා හෝ ගේට්ටුතනන්නා මේ දීපංකරයට පැමිණ මෙය අයිතිකර ගන්නා බවත් මේ දෙවියන්ගේ දෙය මිල කළ නොහැකි බවත්ය.

කොලු ගැටයකු බාල්දියක් පුරවා ගත් දෙවියන්ගේ අසූචි එම මහල්ලාගේ හිස මත හෙලීමෙන් සියල්ලෝ ඔල්වරසන් දී එම බොර‍ තෙල් ස්නානයට පටන් ගත්හ.

විශ්වයේ කෙළවර තමාට යා නොහැකි තැනක සියළු සත්‍ය සැඟවී ඇති බවත් එය කවදා හෝ තමන් හෙලි කරගන්නා බවත් කියමින් මිනින්‍ ‍දෝරැවන් තරගයට මෙන් අහස නිරීක්ෂණය ට අර දුරේක්ෂය භාවිතා කළ අතර ඔවුන් තමන් සිටි තැන සිට නුදුරින් දුටු කන්දේ මුදුන විශ්වයේ කේන්ද්‍රය බව වටහා ගත්හ. තවද සාගර ජල පාතනයෙන් නෝවා ගේ නැවේ ඉන්නා අයට ලොව වටා රවුමක් යන්නට ලැබුන ද අර සියළු සත්‍ය සැඟවී ඇති විශ්වය කෙළවරට යාමට කවදාවත් අවකාෂයක් නොලැබෙන බව දැන ගත්තෙන් ජලපාතනයට මුහුණ දීමට ඔවුහු උද්යෝගී වූහ. සියළුම රාත්‍රීන් හිදී අහස සියුම්ව නිරීක්ෂණය කළ ඔවුහු සාගර ජල මට්ටම් ඉහල යන්නේ විශ්වයේ සිට ජලය මහ පොලවට කාන්දු වන හෙයිනැයි ද නිගමනය කරමින් එම කාන්දුව සිදුවන අහසේ ඉම සොයන්නට වන්හ. තව ද ඉහට උඩින් පේන තරැගොන්නේ එක තරැවක් කවදාවත් සෙලවුනේ නැති හෙයින් එය එල්ලේ දෙවියන් සිටින බවත් එය කන්ද උඩින් පෑයූ බවත් එයට උතුර තරැව යයි කියන්නට ද ඔවුන් සියල්ලන් එකඟ විය. කඳු මුදුන ආශ්චර්යමත් ස්ථානයක් බවට පත් විය. එය නැරඹීමට කඳු තරණය කර යාමට කාලය වෙන්කර ගත් ඒ උදවිය ඉන්පසු එහි හිරැ දෙවියන් ද වර්ෂයකට දින හැටපහක් ද ඇති වග සොයා ගත්තේය.

ඉන්පසු කැලැන්ඩරය මිහිමත සෑම ගහක වැලක කොලයකම ලෙල දෙන්නට විය. කාලය වෙනදට වඩා වේගයෙන් ගෙවෙන බව කාටත් වැටහුනි.

කැලැන්ඩරය ලැබීමත් සමග මිනිසුන් හඩන්නට ද සිනහ සෙන්නට ද පුරැදු විය‍.

හඩන්නට වූයේ කිසිම ඉතිරියක් නොකර ම දින ගෙ‍වී යන බව තේරැම් ගිය හෙයිනි.

සිනහ සෙන්නට වූයේ ඊළඟට ඔවුන් ඔරලෝසුව නිපදවන බව දැන සිටි හෙයිනි. කාලය සූක්ෂමව මනින්නට වූ තරමටම තමන් ගේ ආයුෂ වැඩිවන්නේ යැයි තර්කාණුකූලව ඔව්හු වටහා ගත්හ.

ඔවුන් දෙපිලම බලාපොරොත්තුවෙන් හුන් මහා සාගර ජල පාතනය තවමත් සිදු නොවීම ගැන දෙගොල්ලන්ම වික්ෂෝභ විය. කාලය මැනීමට පරමාණු ඔරලෝසුද නිර්මාණය කරගත් ඔවුහු නැව වෙනුවට ආකාෂ යානා තනා ගෙන කල් බලමින් සිටින්නට වූහ.

030909